U Žłobinskim rajonie ŭ piensijaniera znajšli bojeprypasy, dazvoł na zachoŭvańnie jakich skončyŭsia paŭstahodździa tamu
U kancy sakavika sud Žłobinskaha rajona razhledzieŭ kryminalnuju spravu pa abvinavačvańni 81-hadovaha viaskoŭca. Jak paviedamlaje miascovaja rajonka «Novy dzień», u pažyłoha mužčyny znajšli porach i patrony da hładkastvolnaj palaŭničaj zbroi, a taksama niekalki patronaŭ da małakalibiernaj vintoŭki.
U chodzie rasśledavańnia było ŭstanoŭlena, što ŭ 1967 hodzie padazravany aformiŭ palaŭničy bilet i nabyŭ dvustvolnuju hładkastvolnuju palaŭničuju strelbu dla zaniatkaŭ palavańniem. Termin dziejańnia palaŭničaha bileta i dazvoł na zachoŭvańnie zbroi i bojeprypasaŭ skončyŭsia ŭ 1976 hodzie i paśla taho nie abnaŭlaŭsia.
Na sudovym pasiadžeńni mužčyna całkam pryznaŭ svaju vinu. Sud pryznaŭ viaskoŭca vinavatym u niezakonnym nabyćci i zachoŭvańni bojeprypasaŭ i vybuchovych rečyvaŭ, što padpadaje pad č. 2 art. 295 KK Respubliki Biełaruś.
Piensijanieru było pryznačana pakarańnie ŭ vyhladzie štrafu ŭ pamiery 40 bazavych vieličyń.
Kamientary