Hareła znakamitaja sabornaja miačeć u Kordavie: častka sklapieńniaŭ abrynułasia
Adzin z najvybitniejšych prykładaŭ isłamskaj architektury ŭ Jeŭropie, pieratvorany paśla Rekankisty ŭ katalicki sabor, niahledziačy na razbureńni i zadymleńnie, adkryŭsia na nastupny dzień dla tysiač turystaŭ, jakija chočuć pabačyć hety ŭnikalny pomnik Suśvietnaj spadčyny JUNIESKA.
Pažar u Mieskicie, byłoj sabornaj miačeci Kordavy (Ispanija), pačaŭsia pozna ŭviečary piatnicy ŭ pamiaškańni pamiž kaplicami Chryščeńnia i Ducha Śviatoha, dzie zachoŭvalisia ŭboračny invientar, u tym liku elektryčnyja padmiatalnyja mašyny.
Pavodle papiaredniaj viersii, pryčynaj moh stać karotkaje zamykańnie abo pierahruzka padčas zaradki adnoj z mašyn. Ahoń chutka raspaŭsiudziŭsia ŭvierch, zakranuŭšy draŭlanyja kanstrukcyi dachu i paškodziŭšy niekalki kaplic.
El fuego en la Mezquita de Córdoba, visto de cerca poco después de iniciarse https://t.co/8N0i0SrZGc pic.twitter.com/2aAvFNKtWW
Pažar u Kordaŭskim sabory, źniaty vidavočcami.
Najbolš paciarpieła kaplica Dabravieščańnia, sklapieńni jakoj abrynulisia ŭ vyniku pažaru. U hetaj kaplicy XVIII stahodździa znachodzicca ałtarny abraz pracy Piedra Marena, skulptury aniołaŭ, habieleny z cykłu pra Alaksandra Makiedonskaha i inšyja mastackija kaštoŭnaści.
Pavodle słoŭ dekana sabora Chaakina Albierta Ńjevy, paškodžany ŭ asnoŭny vierchniaja častka retabła — pryściennaha ałtara — i asobnyja elemienty dekoru.
Paciarpieła taksama dach kaplica Śviatoha Mikałaja z Bary, ale hatyčnyja sklapieńni vytrymali, a kaplica Ducha Śviatoha, adzin z najkaštoŭniejšych reniesansnych pomnikaŭ horada, zakurana dymam.
Ahułam paciarpieła kala 50 kvadratnych mietraŭ z 13 000 kvadratnych mietraŭ, jakija zajmaje sabor. Značna bolš surjoznych nastupstvaŭ udałosia paźbiehnuć dziakujučy apieratyŭnym dziejańniam pažarnych i ŭzhodnienym zachadam uładaŭ. Pažarnaja kamanda zdoleła svoječasova izalavać ačah uzharańnia, nie dapuściŭšy raspaŭsiudžańnia ahniu na inšyja častki pomnika.
Uvosień u sabory płanujuć ustalavać sučasnuju sistemu pažaratušeńnia z vodnym tumanam, anałahičnuju toj, što vykarystoŭvajecca paśla pažaru ŭ paryžskim Notr-Damie.
Paśla pieršačarhovych rabot pa rasčystcy ad dymu budzie padrychtavany prajekt restaŭracyi i kansiervacyi, kab viarnuć paškodžanym častkam histaryčny vyhlad.
Sabornaja miačeć Kordavy — adzin z najvybitniejšych pomnikaŭ isłamskaj architektury ŭ Jeŭropie. Jaho budaŭnictva pačałosia ŭ 786 hodzie pry emiry Abd ar-Rachmanie I, a ŭ X stahodździ chalif Al-Mansur ažyćciaviŭ apošniuju vialikuju rekanstrukcyju, dadaŭšy vosiem niefaŭ. Paśla zachopu horada karalom Fierdynandam III u 1236 hodzie miačeć była pieratvorana ŭ chryścijanski sabor. Za ŭsiu svaju bolš čym tysiačahadovuju historyju budynak pieražyŭ tolki dva pažary da siońniašniaha: u 1910 i 2001 hadach.
U subotu ranicaj sabor znoŭ adkryŭsia dla turystaŭ, akramia paškodžanaj zony, jakaja zastajecca aharodžanaj. Ekśpierty padkreślivajuć, što pomnik u cełym nie straciŭ svajoj architekturnaj cełasnaści i zastajecca biaśpiečnym dla naviedvańnia.
Ciapier čytajuć
«Čaściej za ŭsio žučok staviać niedaloka ad razietak». Jak siłaviki prasłuchoŭvajuć biełarusaŭ pa telefonie i ŭ kvaterach8
Kamientary