Chto ŭ bank niasie, a my — Šulmanu

Byŭ biznes — stała šou. Niby sieryjał, druhi miesiac ciahniecca praces biełaruskaha šou‑biznesmena №1. Na im prysutničała Nasta Šamrej.

Paciarpiełyja raskazvajuć pra machlarstvy Hienadzia Šulmana, kiraŭnika pradziusarskaj kampanii «Kłas‑Kłub DK». Abvinavačany baronicca: kaža, što ŭ biznesie jaho spravy dreń, kacić bočki na ŭkaz prezidenta 2006 hoda… Pakazańni paciarpiełych i abvinavačanaha kardynalna roźniacca. Heta jašče bolš zabłytvaje i tak nialohkuju kryminalnuju spravu.

Adzin z paciarpiełych — daŭni siabar abvinavačanaha. Dyrektar pryvatnaj firmy Leanid Špilko vučyŭsia z Hienadziem Šulmanam na adnym kursie Instytuta kultury. Siabravali siemjami, jeździli razam na šašłyki.

A ciapier, padčas sudovych sprečak, pryncypova nazyvajuć adzin adnaho na «vy». Skončyłasia siabroŭstva paśla taho, jak Leanid pazyčyŭ Hienadziu 60 000 dalaraŭ.

Prybytku niama, a »Roleks» kupiŭ

Adnak usie terminy syšli, a hrošaj adnakurśnik nie addavaŭ. Usio spasyłaŭsia na niaŭdačy ŭ spravach. Leanid navat pačaŭ cikavicca šou‑biznesam, kab dapamahčy paradami. Šulman u spravy «Kłas‑Kłuba» siabra nie dapuskaŭ, prasiŭ pačakać nastupnaha mieha‑prajekta, na jakim dakładna ŭžo zarobić. Prajekty prachodzili, a hrošy nie źjaŭlalisia, i tolki množylisia apoviedy pra stratnyja kancerty (naprykład, śpiektakl Hryškaŭca z poŭnaj załaj hledačoŭ). Urešcie,

Leanid nie vytrymaŭ: padaŭ na siabra ŭ sud. Upeŭnieny, što hrošy Šulman spuściŭ na bahiemnaje žyćcio.

«Kali maja žonka idzie ŭ kramu, ja daju joj kapiejki, nie chapaje na chaładzilnik. A jon kupiŭ Rolex, viačerajuć u restaranach. Paśla admovaŭ viarnuć pazyku kupiŭ synu mašynu, niachaj niedarahuju — $ 5—7 tys., ale ž heta taksama hrošy. Ja nie mahu na poŭdzień pajechać, a jaho syn — to ŭ Krym, to ŭ Sočy. U Izraili žyŭ paŭhoda. Na jakija srodki?» — aburajecca pazoŭnik.

Sud must go on

Nie ŭsie paciarpiełyja «kredytory» byli blizkimi siabrami abvinavačanaha. Mnohija — siabry Špilko. Jak Aleh Čartkoŭ, dyrektar pryvatnaj firmy, jaki bačyŭ Šulmana ŭsiaho paru razoŭ. Daviedaŭšysia ad Špilko, što pradziusar šukaje hrošy dla arhanizacyi kancertaŭ,

Čartkoŭ prynios čałavieku z dobraj reputacyjaj 25 tysiač dalaraŭ. Pryčym, adznačyŭ paciarpieły, u 2007‑m, na momant pazyki, jon byŭ biespracoŭnym.

«Voś vy, tavaryš sudździa, za svabodnyja hrošy nabyvajecie błuzku, chtości niasie ich u bank, a ja — pazyčyŭ Šulmanu», — razvažaje Alaksiej Ślesarenka, spartoviec, ziamlak Leanida Špilko. Svaju 31 tysiaču dalaraŭ «z chvościkam» jon addaŭ ledźvie znajomamu Šulmanu, kab pasiabravać z «krutym» šoumenam dy zajmieć vyhadnyja suviazi siarod bahatych. Dumaŭ, kali dapamoža čałavieku za tak, mo i toj kali adździačyć. A Šulman ničoha maładomu spartoŭcu nie abiacaŭ.

Hienadź Šulman nar. u 1960. Vučyŭsia ŭ PTU №8 pry Minskim miechaničnym zavodzie, pracavaŭ na zavodzie, adsłužyŭ u vojsku. U 1983 pastupiŭ u Instytut kultury. Z 1987 zajmajecca arhanizacyjaj hastrolna‑kancertnaj dziejnaści. U 1992 stvaryŭ AAT «Kłas Kłub DK» i pracavaŭ z zamiežnymi kancertnymi ahienctvami pa ŭklučeńni Biełarusi ŭ hastrolnyja hrafiki suśvietnych zorak. Siarod zorak, jakija pryjechali ŭ Biełaruś, dziakujučy pracy kampanii, značacca Deep Purple, Scorpions, Nazareth, Robiert Płant, Patrysija Kaas i Krys de Burh.

Anatol Čaševič, darektar firmy «Ryełci», znajomy z Šulmanam z 1990‑ch. Užo tady, pa słovach paciarpiełaha, pradziusar pačynaŭ svaje machlarstvy. Niezdarma razvaliŭsia Alternatyŭny teatr, u svoj čas unikalny prajekt. Paśla stvaralisia i likvidavalisia firmy, u nazvach jakich Anatol Čaševič navat zabłytaŭsia. Ad žniŭnia 2004 da 2007 hoda Šulman arandavaŭ pamiaškańni pad ofis u firmie «Ryełci». Adnak za arendu płaciŭ nierehularna, tłumačyŭ heta dziełavymi ciažkaściami. Nabiehła 32 miljony rubloŭ zapazyčanaści. Tady Čaševič, pavodle jaho słovaŭ, vyrašyŭ pazyčyć siabru jašče 32 ŭłasnyja miljony rubloŭ na vyratavańnie biznesu. I ni «chvastoŭ» za arendu, ni taje pazyki ad Šulmana bolš nie pabačyŭ.

Kožnaja historyja — vichor emocyj. Ahulny ton: Šulman paprasiŭ hrošaj, paciarpiełyja dapamahli pavažanamu čałavieku, a jon vyjaviŭsia machlarom i bankrutam. Nieadnojčy prahučała ad paciarpiełych: nie adny jany takija, jość ludzi, jakija pazyčyli i jašče bolšyja sumy, ale ŭ sud padavać nie zachacieli. Inačaj, vidać, paŭstała b pytańnie, adkul jany sami tyja sumy ŭziali.

Aproč nieviartańnia pazyk, u spravie Hienadzia Šulmana značacca niavypłaty zarobkaŭ buchhałtaru i kiroŭcu; zapazyčanaść pa apłacie arendy Minskaha ladovaha pałaca, Doma aficeraŭ, hatela «Minsk» za arendu numaroŭ dla zorak estrady…

Paśla pakazańniaŭ paciarpiełych słova dali Šulmanu. Jaho vystupu vielmi čakali ŭsie prysutnyja ŭ zale suda.

Nie kožny dzień słuchaješ šou‑biznesmena, jaki, pavodle abvinavačańnia, umudryŭsia za čatyry hady dziejnaści nanieści materyjalnuju škodu na 641,2 miljona rubloŭ.

Sto tysiač jeŭra — nievialikija hrošy

Pačaŭ Šulman ad Adama. I havaryŭ jon try dni. Treba adznačyć,

charyzma ŭ hetaha čałavieka takaja, što mnohija prysutnyja, pasłuchaŭšy jaho, byli b hatovyja choć zaraz pazyčyć jamu. Choć pierad hetym čuli śviedčańni paciarpiełych.

Dva razy na miesiac u Minsk zaprašali viadomych artystaŭ savieckaha teatra i kino (naprykład, Akudžavu, Smaktunoŭskaha). U «Kłas‑Kłub» prychodzili dziełavyja ludzi z žonkami adpačyć paśla ciažkaha pracoŭnaha dnia. Dla ich ładzilisia teatralizavanyja šou. Hienadź Šulman asabliva adznačaje, jak heta było nova i nieardynarna, navat ź Ministerstva kultury chvalili. Da 1997 hoda jany pracavali jak pradziusarski centr Alternatyŭnaha teatra.

U 1997 hodzie «Pryjorbank» vykupiŭ pamiaškańni, dzie mieścilisia Alternatyŭny teatr i «Kłas‑Kłub». Kampanii załamili arendu, i jana vymušanaja była syści z budynka. I ŭžo ŭ 1998 hodzie «Kłas‑Kłub» pačaŭ burliva raźvivacca. Siarod pieršych zaprošanych im u Minsk zorak byli kumiry 80‑ch Scorpions. Spravy kampanii išli vydatna.

Adnak

u mai 2006‑ha jak hrom ź jasnaha nieba vyjšaŭ ukaz prezidenta ab kancertna‑hastrolnaj dziejnaści. Zadnimi datami, ad 1 studzienia, usie pryvatnyja kampanii musili spłacić PDV z prybytku. U firmy Šulmana ŭźnikła niezapłanavanaja dzirka ŭ biudžecie u pamiery 180 młn rubloŭ.

Da zakryćcia hadavoha bałansu, kazaŭ Šulman, udałosia kampiensavać tolki tracinu sumy. I było pryniataje rašeńnie ab bankructvie. Praź miesiac syn Šulmana, na toj momant student, staŭ zasnavalnikam novaj kampanii «Kłas‑Kłub Intertejment».

Paralelna ź likvidacyjaj firmy Šulman vyrašaje pasprabavać siabie ŭ stalicy Rasii: «Paśla praviadzieńnia pieramovaŭ u pačatku 2007‑ha raspačali pieršy prajekt. Heta było zroblena na srodki, pazyčanyja ŭ Špilko i inšych, taksama trochi było maich hrošaj. U Maskvie ja pakinuŭ kala 100 tys. jeŭra — heta byli nievialikija hrošy. Dla prykładu, moj finansavy partnior ukłaŭ kala 3 miljonaŭ dalaraŭ u prajekt, jaki my musili rabić razam, — kancert Džordža Majkła ŭ Alimpijskim. Na žal, u Maskvie praca nie pajšła».

Maskvičy «prajavili svaje ambicyi», i Šulman apynuŭsia za bortam rasijskaha šou‑biznesu. Viarnuŭsia ŭ Minsk. Zakruciŭ tut usio pa novaj. U 2007 zakryli siezon na stadyjonie «Traktar» — aŭtamotašou Patryka Borni. Paralelna płanavali siezon 2007—2008. Uvieś čas pracavali, niahledziačy na ciažkaści ź likvidacyjaj kampanii i stvareńniem novaj. Šulman siońnia ličyć, što siezon 2007—2008 byŭ samy niaŭdačny i nierentabielny, adnak tady jon spadziavaŭsia na lepšaje i sprabavaŭ pastavić kampaniju na nohi. Mienavita ŭ toj čas kamuści mahło padacca, što Šulman nie moža płacić pa rachunkach, adnak pradziusar kaža, što ščyra staraŭsia vypravić situacyju.

U 2008 hodzie paśla sieryi niaŭdałych kancertaŭ kampanija Šulmana znoŭ pačynaje praces likvidacyi. Z pryčyny ŭsio taho ž ukaza prezidenta «Kłas‑Kłub Intertejment» ledź vypłaciŭ PDV u biudžet, ale na toje, kab raźličycca ź Ladovym pałacam, hatelem «Minsk» i inšymi jurydyčnymi asobami, ź jakimi daviałosia sustrecca ŭ sudzie, hrošaj nie chapiła.

Ale Šulman i tady nie zhubiŭ aptymizmu. Nieŭzabavie jaho dbańniami ŭźnikła Pryvatnaje ŭnitarnaje pradpryjemstva «Kłas‑Kłub Džaz Kraft». Hetaja kampanija isnuje da siońnia. Praŭda, jaje dyrektar pakul siadzić u turmie.

Viersija Šulmana

Ukaz prezidenta, «niezavajavanaja» Maskva, šerah niaŭdałych kancertaŭ — usio heta trochi tłumačyć materyjalny stan firmy Šulmana. Ale jak razabracca ŭ pryvatnych siabroŭskich pazykach?

Hienadź u sudzie pryznaŭsia, što jon sapraŭdy pazyčaŭ hrošy ŭ znajomych i nikoli hetaha nie asprečvaŭ. Praŭda, pierakonvaje, što hrošy jon braŭ pad pracenty i spraŭna płaciŭ 4% u miesiac. Tolki letam 2007‑ha, kali biznes razładziŭsia, paprasiŭ pracenty spynić i asnoŭnyja pazyki paabiacaŭ pastupova viarnuć.

Hienadź nastojvaje, što paciarpiełamu Alaksandru Kanhalovu jon viarnuŭ pazyku i ŭsio pracenty. Raśpisku zabirać i nie padumaŭ navat. Chto ž viedaŭ, aburajecca Šulman, što siabar‑ekanamist pojdzie z papierčynaj chłusić u sud?

U vypadku z Anatolem Čaševičam viersija Šulmana taksama roźnicca. Abvinavačany pryznaje, što nasamreč byŭ vinien «Ryełci» za arendu. «Adnak, kali Čaševič niervavaŭsia i prasiŭ vypłacić tyja hrošy, ja napisaŭ jamu raśpisku, niby nie firma, a ja sam vinien hetyja 32 miljony». A Čaševič, pavodle Šulmana, pradjaviŭ u sud i dakumientacyju pa arendzie, i tuju raśpisku:

«Voś i vyjšła, niby ja vinien dva razy hetuju sumu».

Jašče cikaviejšaja historyja z astatnimi paciarpiełymi.

Pa słovach Šulmana, aproč Kanhalova, jamu pazyčaŭ hrošy tolki jaho siabar Leanid Špilko. Jamu ž vypłačvalisia i pracenty. Adnak, jak tolki šou‑biznesmen pierastaŭ płacić abiacanaje spraŭna, Špilko pryvioŭ svaich siabroŭ i skazaŭ: «Heta ty nie tolki mnie vinien, heta byli ich hrošy».

Niekatorych siabroŭ Špilko Šulman i nie viedaŭ navat. Adnak, jak čałaviek sumlenny, vymušany byŭ napisać usim raśpiski i paśpiašacca z vypłataj. Pry hetym Špilko, pavodle słovaŭ šou‑biznesmena, uhavorvaŭ nie płacić adrazu ŭsim patrochu, a viartać vialikimi sumami kožnamu z kredytoraŭ pa čarzie. Jon ža siabar, maŭlaŭ, jon usich supakoić. I pieršaj była Volha Radkievič, blizkaja siabroŭka Špilko, jakoj Šulman vypłaciŭ pazyku. Astatnim nie paśpieŭ, bo apynusia ŭ turmie.

— Hienadź Michajłavič, ci admaŭlalisia vy kali‑niebudź ad hrošaj? — spytaŭ sudździa.

Šulman trochi zadumaŭsia:

— Viedajecie, admaŭlaŭsia. Mnie muž Ahurbaš prapanoŭvaŭ miljon dalaraŭ, kab ja staŭ jaje pradziusaram. I ja admoviŭsia.

Jak habrej skincheda pabiŭ

Plus da ŭsiaho, u spravie Šulmana prysutničaje abvinavačańnie ŭ «chulihanstvie, jakoje ździejśniła hrupa asob». Jak heta sprava za 2002 hod, jakaja tady była i začynienaja, trapiła ŭ ahulny kacioł — nievytłumačalna. Taksama ciažka ŭjavić, jakija novyja źviestki moža mieć śledstva praz vosiem hadoŭ.

Pavodle słovaŭ advakatki, pakazańni paciarpiełaha za 2002 i 2009 hady kardynalna roźniacca.

U 2002 hodzie Šulmanu patelefanavaŭ syn i raskazaŭ, što jaho, vučnia habrejskaj škoły, pabili siem skinchedaŭ. Baćka pryjechaŭ da škoły, padyšoŭ da adnaho z «brytahałovych», paru razoŭ patros i adpuściŭ. Padletak «pavaliŭsia i ŭdaryŭsia hałavoj ab dreva». Šulman kaža, što byŭ mocna zły, nie dobra razumieŭ, što rabiŭ, ale dobra pamiataje, jak było. Nijakich šaści ŭdaraŭ nahami, rukami i tvaram ab ziamlu nie było, tym bolš nie było pahrozaŭ zacisnuć palcy bahažnikam mašyny. Usio napisanaje ŭ zajavie paciarpiełaha ŭ 2009‑m — vydumka i nie adpaviadaje rečaisnaści vaśmihadovaj daŭniny, śćviardžaje Šulman.

Sud pakul nie skončany, šou praciahvajecca, nastupny etap — apytańnie śviedkaŭ. Pakul były šou‑biznesmen №1 siadzić na Vaładarcy, vysoki sud musić vyrašyć hałavałomku z troch kryminalnych artykułaŭ, siami kredytoraŭ‑siabroŭ, šerahu nieapłačanych pazykaŭ i adnoj staroj chulihanki.

Nasta Šamrej

• 0
• 0
• 0
• 0
• 0
• 0
• 0
• 0