Mierkavany kiraŭnik DHB Litvy: Rost kolkaści biełarusaŭ vyklikaje niepakoj, režym moža vykarystać ich suprać nas

i

Kandydat na pasadu kiraŭnika Departamienta dziaržbiaśpieki Litvy Remihijus Brydzikis zajaviŭ, što režym Łukašenki moža prymusić biełarusaŭ, jakija žyvuć u Litvie, pracavać suprać krainy.

Na pasiadžeńni kamiteta Siejma pa nacbiaśpiecy i abaronie Brydzikis, jaki zaraz zajmaje pasadu namieśnika kiraŭnika DDB, vykazaŭ mierkavańnie, što biełaruskija i rasijskija ŭłady zdolnyja ŭpłyvać na svaich hramadzian za miažoj, piša LRT.

«Režymy asobnych krain, sama dziaržaŭnaja ŭłada [ŭpłyvajuć] na mihrantaŭ, jakija da nas prybyvajuć. Tut, napeŭna, varta vyłučyć mienavita Biełaruś», — adznačyŭ Brydzikis.

Pavodle jaho mierkavańnia, Biełaruś i Rasija zrobiać usio, kab zachavać svabodu dziejańniaŭ svaich raźviedvalnych słužbaŭ u Litvie i inšych krainach Jeŭrasajuza.

«Ludzi, jakija pryjazdžajuć da nas, znachodziacca pad upłyvam z boku režymu. Dziaržava, u dadzienym vypadku — režym, moža ŭździejničać na ich svabody, pośpiechi, losy. Razumiejučy svaje mahčymaści i siłu, jany mohuć prymusić hetych ludziej dziejničać suprać krain i hramadstvaŭ, dzie jany šukajuć lepšaha žyćcia. My razumiejem, što Biełaruś, a taksama i Rasija, zrobiać usio, kab zachavać svabodu dziejańniaŭ u Litvie i zachodnim asiarodździ», — skazaŭ Brydzikis.

Patencyjny kiraŭnik DDB adznačyŭ, što ličyć svaim abaviazkam infarmavać tych, chto prymaje rašeńni, a taksama hramadskaść, čamu rost kolkaści biełaruskich hramadzian, jakija prybyvajuć u Litvu, vyklikaje zaniepakojenaść. Pavodle jaho słoŭ, prablema mihracyi nikudy nie źnikła i ŭ bližejšy čas nie źniknie.

Voś tolki statystyka abviarhaje słovy litoŭskaha śpiecsłužbista. «Naša Niva» raspaviadała, što biełarusy nasamreč źjaždžajuć ź Litvy. Tolki za try miesiacy 2025 hoda ich stała na 3772 čałavieki mienš. A za hod biełaruskaja dyjaspara ŭ Litvie skaraciłasia na 9105 čałaviek — amal na 15%.

Departamient dziaržaŭnaj biaśpieki źjaŭlajecca adnoj z struktur, jakija padtrymlivajuć uviadzieńnie bolš žorstkich sankcyj u dačynieńni da hramadzian Rasii i Biełarusi.

U minułym hodzie departamient prapanoŭvaŭ dazvolić biełaruskim hramadzianam, jakija majuć vid na žycharstva ŭ Litvie, viartacca na radzimu tolki adzin raz u hod, inakš jany mahli b stracić prava na pražyvańnie ŭ krainie. Zaraz Siejm razhladaje zakonaprajekt, jaki dazvolić pazbaŭlać biełarusaŭ VNŽ, kali jany jeździać na radzimu čaściej, čym raz u try miesiacy.

U minułym hodzie 598 biełarusaŭ byli pryznanyja tymi, chto ŭjaŭlaje pahrozu dla dziaržaŭnaj biaśpieki, hramadskaha paradku abo zdaroŭja nasielnictva.

• 3
• 0
• 1
• 3
• 1
• 0
• 2
• 0