Kampanija, jakuju ŭznačalvaje kiraŭnik handlovaj pałaty Ukrainy i Litvy, pastaŭlała miedabstalavańnie ŭ Biełaruś
Ranicaj — vystupleńni ŭ padtrymku Ukrainy, a ŭdzień — dziełavyja pieramovy pa pastaŭkach miedycynskaj pradukcyi ŭ Biełaruś. Tak, pavodle danych LRT, vyhladaje rasparadak dnia Kryściny Łajmy Aleknienie — kiraŭnicy Handlovaj pałaty Ukrainy i Litvy, a taksama dyrektarki kampanii Euromed Distribution, zarehistravanaj u Vilni.
Niahledziačy na publičnyja zajavy ab padtrymcy Ukrainy i asudžeńnie rasijskaj ahresii, jaje kampanija aktyŭna pastaŭlaje pradukcyju ŭ ustanovy Biełarusi — krainy, jakaja, jak nieadnarazova paviedamlałasia, akazvaje pramuju padtrymku rasijskim vajskoŭcam.
Pavodle dakumientaŭ, jakija majuć u rasparadžeńni žurnalisty, u 2024 hodzie kampanija atrymała dazvoł na ekspart miedycynskaj pradukcyi ŭ Biełaruś na sumu ŭ dziasiatki miljonaŭ jeŭra. U śpis uvachodziać jak prostyja miedycynskija prynaležnaści, tak i składanaje abstalavańnie, vyrablenaje ŭ krainach ES, Vialikabrytanii, ZŠA i Kitai. Dazvoł było vydadziena Ministerstvam ekanomiki i inavacyj Litvy — podpis pad dakumientam pastaviŭ namieśnik ministra Karolis Žemajcis u svoj apošni pracoŭny dzień na pasadzie.
Chacia miedycynskija tavary nie padpadajuć pad pramyja sankcyi, sam fakt ich pastavak u Biełaruś vyklikaje mnostva pytańniaŭ.
Aficyjnymi zakazčykami vystupili biełaruskija kampanii «Biełreamied» i «Tosilena», kančatkovymi atrymalnikami — dziaržaŭnyja balnicy, u tym liku i tyja, u jakich, jak paviedamlali ŭkrainskija i mižnarodnyja krynicy, lečać paranienych rasijskich sałdat, što vajavali va Ukrainie.
Ekśpierty padkreślivajuć: Biełaruś adyhryvaje klučavuju rolu ŭ łahistycy rasijskaj vajennaj mašyny i pradastaŭlaje svaju terytoryju, resursy i miedycynskuju dapamohu dla armii RF. Takim čynam, pastaŭki miedycynskaha abstalavańnia mohuć uskosna spryjać viartańniu rasijskich sałdat na front.
Samu Kryścinu Łajmu Aleknienie žurnalistam znajści akazałasia składana — na pramyja pytańni jana admoviłasia adkazvać, zajaviŭšy, što «treba ŭdakładnić» infarmacyju. Jana dadała, što akcyjanieram Euromed Distribution u ciapierašni čas vystupaje brytanskaja kampanija Euromed Healthcare Group, jakaja znachodzicca pablizu Mančestera. Lidar inicyjatyvy Stop prekybai su Rusija Ihnas Płunkśnis nazvaŭ dziejańni kampanii maralna nieprymalnymi. «Kali my adpraŭlajem miedycynskaje abstalavańnie tudy, dzie lečać rasijskich sałdat, jakija potym znoŭ buduć zabivać ukraincaŭ — heta saŭdzieł. Heta maralnaje złačynstva», — skazaŭ jon.
Pradstaŭniki ŭkrainskaj dyjaspary ŭ Litvie taksama vykazvajuć abureńnie. Zasnavalnik «Ukrainskaha doma» ŭ Vilni Alaks Matviejeŭ adznačyŭ, što ŭ hetaj situacyi parušajucca nie tolki maralnyja pryncypy, ale i davier da arhanizacyj, u naźvie jakich fihuruje Ukraina.
«Heta ŭžo nie pryvatny biznes, heta manipulacyja davieram. Sama farmuloŭka «Handlovaja pałata Ukrainy i Litvy» padrazumiavaje adkaznaść i salidarnaść z ukrainskim narodam. A tut — biznes na kryvi», — padkreśliŭ jon. Palitołah Vicis Jurkonis źviartaje ŭvahu na toje, što padobnyja ździełki mohuć prykryvać pastaŭki, jakija apynucca ŭ rukach tych, chto maje dačynieńnie da vajennych złačynstvaŭ va Ukrainie.
«Jak možna harantavać, što heta abstalavańnie nie apyniecca ŭ rasijskich špitalach abo nie budzie vykarystana dla lačeńnia rasijskich sałdat?», — zadajecca jon pytańniem.
Kamientary
Z takim palotam fantazij možna vinavacić pradavačku ŭ kramie, jakaja pradała hramadzianinu Biełarusi niejkuju chreń, jakuju nibyta potym možna vykarystoŭvać u vajennych metach.