U Biełaruś zavieźli mašyny rasijskaha «jadziernaha» viedamstva. Jany prymuć udzieł u paradzie
U Biełaruś pryvieźli braniravanyja mašyny, jakija naležać tak zvanamu «jadziernamu» upraŭleńniu Ministerstva abarony Rasii. Pra heta śviedčyć ličbavy kod, što zaŭvažyła «Svaboda» na rehistracyjnych numarach hetaj techniki z kadraŭ, zroblenych 3 krasavika 2025 hodu padčas repietycyi paradu da 9 traŭnia na aeradromie Lipki pad Mienskam.
Mienavita 12-je hałoŭnaje ŭpraŭleńnie Ministerstva abarony Rasiei, da jakoha mohuć adnosicca hetyja bajavyja mašyny, zajmajecca zachoŭvańniem, ekspluatacyjaj i absłuhoŭvańniem jadziernych bojeprypasaŭ, a taksama adkazvaje za biaśpieku ich zachoŭvańnia. U jaho skład taksama ŭvachodzić Słužba specyjalnaha kantrolu, jakaja sočyć za jadziernymi vyprabavańniami ŭ inšych krainach.
Rasiejskija aŭtamabilnyja numary čornaha koleru, bačnyja na mašynach z repetycyi, staviać na techniku ŭzbrojenych siłaŭ Rasiejskaj Fiederacyi. Dvuznačny ličbavy kod u ich pravym kucie abaznačaje vajskovuju akruhu ci rod vojskaŭ, za jakim technika zamacavanaja.
Ličbavy kod 39 zhodna z zahadam rasiejskaha ministra abarony ad 22 listapada 1999 hodu № 550 byŭ zamacavany za 12-m hałoŭnym upraŭleńniem MA Rasiejskaj Fiederacyi.
Hety zahad byŭ skasavany paźniejšym zahadam ad 3 žniŭnia 2005 hodu, u jakim takoha pieraliku ličbavych kodaŭ i prynaležnaści ich da vajskovych viedamstvaŭ užo niama. Ale eksperty, jakich apytała «Svaboda», śćviardžajuć, što, chutčej za ŭsio, heta było zroblena dziela sakretnaści, pry hetym prynaležnaść kodaŭ dziejničaje dahetul. Vajskovyja analityki abapirajucca mienavita na śpis, vykładzieny ŭ pieršym zahadzie.
Na kadrach z repetycyi paradu na aeradromie Lipki 3 krasavika 2025 hodu numary z kodam 39 stajać jak minimum na dvuch vidach techniki. U abodvuch vypadkach heta sučasnyja rasiejskija braniavanyja aŭtamabili, jakija pastupili ŭ ekspluatacyju litaralna ŭ pačatku vajny va Ŭkrainie.
Pieršy ź ich, toj, što źleva na zdymku vyšej, vielmi padobny na abaronieny sanitarny aŭtamabil «Linza» na bazie KamAZ-53949 «Tajfun-K» ad rasiejskaha zavodu «Riemdiziel». Vyrablać aŭtamabil pačali ŭ 2021 hodzie, paźniej dapracoŭvali. Na kadrach z repetycyi paradu, padobna, my bačym najnoŭšuju versiju mašyny. Jak paznačana na sajcie «Rosabaronekspartu», pryznačeńnie aŭtamabila — «pošuk, zbor i evakuacyja paranienych z pola boju, z asiarodkaŭ masavych sanitarnych strataŭ i technahiennych katastrofaŭ».
Druhi, pafarbavany ŭ plamavy kamuflaž, padobny na braniavany aŭtamabil dla pieravozki vajskoŭcaŭ «VPK-Urał» ci «Spartak» (AMN-590951, VPK-59095S ci AMN-59097). Raspracavany rasiejskaj «Vajskova-pramysłovaj kampanijaj». Jaho pačali vykarystoŭvać na vajnie va Ŭkrainie prykładna z vosieni 2022 hodu siły specyjalnych aperacyjaŭ.
Na kadrach z repetycyi paradu na aeradromie Lipki pad Mienskam ŭ paradnym raźliku možna zaŭvažyć ahułam kala 15 mašyn «Linza» i «Spartak».
Vyhladaje, što «Tavarystva čyhunačnikaŭ Biełarusi» zafiksavała pryjezd mienavita hetych branievikoŭ u Biełaruś u noč z 29 na 30 sakavika 2025 hodu. Tak, arhanizacyja tady paviedamiła ab prybyćci vajskovaha ešalonu ź nieviadomaha punktu adpraŭleńnia ŭ Rasiei na biełaruskuju stancyju Vorša-Centralnaja, dzie adbyłasia źmiena lakamatyvu.
Dalej, pavodle infarmacyi «Tavarystva čyhunačnikaŭ Biełarusi», z Voršy ešalon dajechaŭ da stancyi Aziaryšča pad Mienskam, dzie jaho razhruzili. Jon składaŭsia z adnaho pasažyrskaha vahona z rasiejskimi vajskoŭcami i čatyrnaccaci specyjalnych vahonaŭ-platformaŭ dla pieravozki bronieaŭtamabilaŭ (pa dźvie mašyny na kožnym). To bok ahulnaja kolkaść pryviezienych mašyn moža dasiahać dvaccaci vaśmi adzinak.
«Tavarystva čyhunačnikaŭ Biełarusi» taksama apublikavała zdymak z razhruzki aŭtamabilaŭ, zrobleny, jak paviedamlajecca, u 7.30-8.00 ranicy 30 sakavika na stancyi Aziaryšča pad Mienskam.
«Svaboda» hiealakavała heta zdymak i pravieryła ŭmovy nadvorja ŭ toj čas, usio i sapraŭdy supadaje. Nam taksama ŭdałosia znajści spadarožnikavy zdymak kampanii Planet Labs, zrobleny prykładna ŭ 15.00 taho ž dnia (zdymak jość u rasparadžeńni redakcyi). Na im bačny čyhunačny sastaŭ, jaki staić na stancyi Aziaryšča i składajecca prykładna z 15 vahonaŭ, što supadaje ź infarmacyjaj «Tavarystva čyhunačnikaŭ Biełarusi».
Vajskovyja aŭtamabili na zdymku padobnyja na «Linzu» i «Spartak», apisanyja nami raniej. A čyhunačnaja stancyja Aziaryšča znachodzicca naŭprost kala aeradromu Lipki, dzie hetyja aŭtamabili byli zaŭvažanyja 3 krasavika na repetycyi paradu da Dnia pieramohi 9 traŭnia.
Ci zastanucca ŭsie hetyja mašyny abo častka ź ich ŭ Biełarusi paśla praviadzieńnia paradu 9 traŭnia, nieviadoma.
Raniej «Svaboda» paviedamlała pra toje, jak imkliva ŭłady razbudoŭvajuć vajskovuju infrastrukturu pad Asipovičami, dzie, imavierna, moža rychtavacca schovišča dla rasiejskich jadziernych bojeprypasaŭ. U samych Asipovičach budujuć novyja anhary dla techniki, składy, žytło dla vajskoŭcaŭ, tut ža znachodziacca pieradadzienyja Rasiejaj aperatyŭna-taktyčnyja rakietnyja kompleksy «Iskander», jakija hetuju jadziernuju zbroju mohuć užyvać.
Usie apytanyja raniej «Svabodaj» vajskovyja eksperty vykazvali dumku, što kali ŭ Biełaruś pryviazuć jadziernuju zbroju, usie dziejańni ź joju pavinny ažyćciaŭlać vajskoŭcy z 12-ha hałoŭnaha ŭpraŭleńnia Ministerstva abarony Rasiei.
«Treba dakładna razumieć adnu reč, jakaja ŭ mianie asabista nie vyklikaje nijakich sumnievaŭ: usie aperacyi ź jadziernymi bojezaradami ci to na terytoryi Rasiei, ci to na terytoryi Biełarusi, kali raptam jany tudy buduć dastaŭlenyja, budzie ažyćciaŭlać vyklučna 12-je hałoŭnaje upraŭleńnie Ministerstva abarony Rasiei (12 HUMA), — kazaŭ u kamentary «Svabodzie» staršy supracoŭnik Instytutu AAN u daśledavańni prablem razzbrajeńnia Pavieł Podvih. — Heta značyć, usie aperacyi — absłuhoŭvańnie, transpartavańnie bojezaradaŭ, achova abjektu i achova perymetru — usio heta buduć rabić vyklučna rasiejskija vajskoŭcy. Inšych varyjantaŭ tut niama».
Z słovaŭ eksperta ŭ zamiežnaj i abaronnaj palitycy Rasiei Paŭła Łuzina, rasiejskaje kiraŭnictva pieraśleduje niekalki metaŭ.
«12 HUMA — adno ź niamnohich miescaŭ, dzie zastaŭsia ŭ najaŭnaści park sučasnaj vajskovaj techniki. Tak što adnym strełam dvuch zajcoŭ zabivajuć — i pasyłajuć śvietu čarhovy syhnał ab jadziernaj zbroi ŭ Biełarusi, i ŭsimi siłami pakazvajuć, što porach u parachaŭnicach jašče zastaŭsia, što nie zusim na asłach i matacykłach vajujuć», — kaža Pavieł Łuzin.
Jon dadaje, što źjaŭleńnie takoj techniki i ŭdaskanalvańnie ramonta-techničnaj bazy ŭ Biełarusi jašče nie aznačaje najaŭnaści na ciapierašni momant u Biełarusi jadziernaj zbroi.
Takuju ž dumku vykazvaje i Pavieł Podvih:
«U pryncypie źjaŭleńnia aŭtamabilaŭ 12 HUMA možna čakać — jany ž pavinny zabiaśpiečvać achovu i abaronu. Usio ŭkładvajecca ŭ zdahadku pra toje, što infrastruktura dla zachoŭvańnia bojezaradaŭ stvarajecca. Ale samo pa sabie źjaŭleńnie techniki nie havoryć ab źjaŭleńni samich bojezaradaŭ».
Ciapier čytajuć
Špakoŭski pra saŭładalnika «Varhiejminha» Kacałapava: Prafinansavaŭ pratesty na 296 tysiač dalaraŭ1
Kamientary