U dzień svajho 81-hodździa vieteran biełaruskaha ruchu, lidar ruchu «Volnaja Biełaruś» Zianon Paźniak apublikavaŭ sistematyzacyju ahientaŭ KDB i FSB pa troch katehoryjach.
Zianon Paźniak
Zianon Paźniak adreahavaŭ na vysyłku z Čechii kolišnaj skarbnicy BNF Natalli Sudlankovaj. Nahadajem, miascovyja ŭłady pryjšli da vysnovy, što jana šmat hadoŭ pracavała na rasijskaje HRU.
Čytajcie:Ad BNF da HRU. Chto takaja Natalla Sudlankova, jakoj čechi zahadali pakinuć krainu
Paźniak pierakanany, što Sudlankova była zavierbavana jašče ŭ 1980-ja. Pa jaho mierkavańni, «spačatku jaje «ŭcialili» ŭ «Tałaku», potym, u 1988 hodzie ahient KHB Vasil Jakavienka pryvioŭ jaje ŭ Arhkamitet BNF (potym my vydalili Jakavienku z Arhkamitetu razam ź joj)». Piśmieńnik Vasil Jakavienka pamior u 2018 hodzie i nie moža adkazać Paźniaku.
Z temy Sudlankovaj palityk pierachodzić ahułam na temu ahientaŭ. Jon padzialaje ahienturu biełaruskaha KDB i rasijskaha FSB (u jaho razumieńni heta adno i toje ž) na niekalki katehoryj i dzielicca z padpisčykami hetaj kłasifikacyjaj
«1. Lehalnaja ahientura. Heta tyja asoby, jakija dziejničajuć lehalna ŭ peŭnaj krainie. Ich funkcyja viadomaja ŭładam hetaj krainy i hramadstvu. Takoj ahientury šmat», — tłumačyć Paźniak i pačynaje nazyvać imiony.
Siarod biełarusaŭ jaho niedavier vyklikajuć Anatol Labiedźka, Natalla Radzina, a taksama Aleś Michalevič i Mikoła Dziemidzienka. Apošnija dvoje pryznavalisia, što ŭ źniavoleńni pahadzilisia na viarboŭku, kab vyjści na svabodu.
Siarod rasijan zhadvajucca imiony televiadučaha Jaŭhienija Kisialova, ekanamista Andreja Iłaryjonava, a taksama byłoha supracoŭnika savieckaha KHB Juryja Švieca.
Druhi typ ahientury — hibrydnaja. «Heta asoby, jakija źjaŭlajucca biełaruskimi patryjotami, realna vystupajuć za volu i niezaležnaść Biełarusi i adnačasova źjaŭlajucca padpisnymi ahientami śpiecsłužbaŭ. Ich taksama mohuć pieraśledavać režymnyja ŭłady.
Častka ź ich rehularna siadzić u turmie i hetak dalej. Heta niebiaśpiečny typ ahientury, bo vyklikaje davier u biełarusaŭ (i źmiašańnie mazhoŭ u naiŭnych ludziej)», — piša Paźniak. Tut jon nie ryzykuje nazyvać imiony.
Narešcie, treci typ — «padstaŭnaja albo tajemnaja ahientura». «Heta zvyčajnaja pradažnaja publika, jakaja niaščyra padładžvajecca pad vobraz biełarusa i apazicyjaniera. Takich vielmi šmat, asabliva ŭ roznaj pisaninie dy prapahandzie. Jany pracujuć najčaściej pa schiemie 6ch4. Prabiełaruskija vystupy čarhujucca z achajvańniem, naprykład, biełaruskich dziejačoŭ, Vasila Bykava, biełaruskaj vajennaj emihracyi i hetak dalej», — miarkuje lidar ruchu «Volnaja Biełaruś». Na žal, znoŭ nijakich imionaŭ niama.
Padsumoŭvajučy, Paźniak adznačaje, što ahienty składajuć bolšaść členaŭ «usich hetych kvazi-apazicyjnych tusovak». Jon nazyvaje situacyju «fienamienalnaj» — «poŭny zachop śpiecsłužbami režymu psieŭda-apazycyjnaj dziejnaści ŭ hibrydnaj vajnie siarod nacyjanalna niedaraźvitych infantyłaŭ i bałvanoŭ».
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary