Mientusava raskazała, što adčuvała paśla taho, jak jaje fejkavyja zdymki zahruzili na pornasajt
«Heta taki akt prynižeńnia, tamu što žanočaje cieła naležyć dziaržavie».
Niekalki tydniaŭ tamu prałukašenkaŭskija telehram-kanały apublikavali zhienieravanyja štučnym intelektam aholenyja fatahrafii Maryny Mientusavaj. Taksama hetyja fejkavyja zdymki źjavilisia na pornasajcie. Maryna pabačyła navinu pra heta jakraz padčas efiru ranišniaha jutub-šou «Obyčnoje utro»
U novym vypusku TOKu viadučaja pryhadała padrabiaznaści:
«Mnie pryjšło ŭ telehram paviedamleńnie ad niejkaha ananimnaha karystalnika ab tym, što jak ža tak, Maryna, u vas ža dzicia, jak vam nie soramna? Vaša fatahrafija na PornHub. Sa spasyłkaj na «Žoŭtyja źlivy», zrazumieła».
Na dumku Maryny, čas dla adpraŭki paviedamleńnia byŭ padabrany admysłova.
«Pakolki heta było zroblena prosta padčas žyvoha efiru, i jany viedali, što ja nikudy nie mahu padziecca z efiru, što ja pavinna budu vysiedzieć jašče jak minimum hadzinu tam biez mahčymaści vyjści, ja dumaju, što heta było śpiecyjalna dla taho, kab mianie nadłamać, paździekavacca, publična prynizić.
Jany viedali, što hetaje paviedamleńnie pryjdzie prosta ŭ momant, kali my začytvajem naviny, heta značyć, ja budu bačyć telehram. Tamu ja dumaju, što heta takoje žadańnie prysaromić niejak, kab dastavić mnie niejkuju niazručnaść».
Pa słovach Mientusavaj, źjaŭleńnie takoha fejkavaha zdymka moža naškodzić nie tolki joj, ale i blizkim:
«Naprykład, babula naŭrad ci zrazumieje, što takoje dypfejk. Joj pakažuć fatahrafiju, jana dumaje: nu ŭsio, prastytutka. I ničoha ty z hetym nie zrobiš. I Boha padviała, i carkvu, i baćku, i cara».
Maryna adznačaje, što, niahledziačy na toje, što jana adreahavała z humaram, adčuvańnie ŭ ciele było kiepskaje.
«Žarty žartami, ale heta na samoj spravie ličbavy hvałt. My padletkam raskazvajem, što heta i jość ličbavy hvałt. Kali vykarystoŭvajuć tvaje fotazdymki dla taho, kab zrabić dypfejk».
Adrazu paśla efiru Maryna napisała pra hety vypadak PornHub, kab jaje zdymki prybrali.
Jana dadaje, što vypadak z dypfejkam śviedčyć pra asablivyja adnosiny da žančyn u publičnym poli i palitycy.
«Ni pra Kościu, majho suviadučaha, ni pra inšych palityčnych dziejačaŭ takich fatahrafij nie było zroblena. A pra žančyn… Nie ja pieršaja, nie ja apošniaja, na žal. Heta taki akt prynižeńnia. Miarkujučy pa rytorycy dziaržavy, jana dumaje, što žanočaje cieła naležyć joj, a nie tabie. To-bok jana vyrašaje, dazvolić ci nie abort, vyrašaje, kali tabie naradzić ci nie naradzić».
Mientusava akcentuje ŭvahu na važnaści adnaŭleńnia žančynami kantrolu nad svaim ciełam, svajoj hodnaściu, žyćciom i fotazdymkami. Hetamu jana navučaje i padletkaŭ, tamu što šmat dziaŭčat sutykajucca z padobnymi situacyjami.
«Adna sprava, ja, darosłaja ciotka, siadžu ŭ žyvym efiry, mahu niešta z hetym zrabić, mahu dać rady. Ja viedaju techniki miedytacyi, ja mahu sabie viarnuć kantrol nad svaim ciełam. Ale kali ty padletak, u ciabie ŭsio žyćcio napieradzie, i tabie padajecca, što lubaja infarmacyja ŭ internecie ciabie źniščyć. Voś heta katastrofa. Tak mohuć prosta źniščyć čałavieka».
Maryna Mientusava raskazała, kaho ličyć seks-simvałam Biełarusi
Prapahandysty zhienieravali hołyja zdymki Mientusavaj i zahruzili na pornasajt
Maryna Mientusava raskazała, čamu razyšłasia z mužam
Intymnaje videa zasnavalnicy startapa, źniataje bieź jaje zhody, trapiła ŭ internet. Joj spatrebiłasia try hady, kab usio vydalić
Kamientary