Drony atakavali naftapierapracoŭčy zavod i čyhunku ŭ Leninhradskaj vobłaści — hruzavy ciahnik syšoŭ z rejek
U Leninhradskaj vobłaści atakavany bieśpiłotnikami Kiryšski naftapierapracoŭčy zavod, a taksama syšoŭ z rejek hruzavy ciahnik.
U rasijskim horadzie Kiryšy (Leninhradskaja vobłaść) adbyłasia ataka bieśpiłotnikaŭ na miascovy naftapierapracoŭčy zavod, adzin z najbujniejšych u Rasii — jaho mahutnaść — kala 21 młn ton nafty ŭ hod.
Pavodle hubiernatara rehijona Alaksandra Drazdenki, u rajonie Kiryšaŭ było źbita try bieśpiłotniki, abłomki adnaho ź ich stali pryčynaj pažaru na terytoryi zavoda. Pažar, jak śćviardžajuć ułady, apieratyŭna likvidavany, achviar niama.
Niekatoryja telehram-kanały, u tym liku ŭkrainski Exilenova+, pišuć, što bieśpiłotniki nanieśli pramy ŭdar pa NPZ i publikujuć fota hareńnia.
U toj ža čas rasijskaje ministerstva abarony paviedamiła, što tolki za noč było źbita 80 bieśpiłotnikaŭ u roznych rehijonach krainy. Najbolšaja kolkaść BPŁA (30) zafiksavana nad Branskaj vobłaściu. U Leninhradskaj vobłaści, pavodle Minabarony, źbita dva BPŁA, choć hubiernatar kazaŭ pra try.
Akramia taho, u Łužskim rajonie Leninhradskaj vobłaści z rejek syšoŭ ciepłavoz ź piatnaccaćciu pustymi cysternami. Zdareńnie pryviało da prypynieńnia ruchu na hetym učastku i zatrymki dziesiaci elektryčak. Ułady nie vyklučajuć dyviersii.
Kamientary