Vajavać za Rasiju pajšoŭ były palitviazień z Homiela. U Biełarusi jon u śpisie «terarystaŭ»
U śpisie biełarusaŭ, jakija pajšli najmitami ŭ rasijskuju armiju, jość Alaksandr Vituchnoŭski. Jaho sudzili pa troch palityčnych artykułach, piša «Fłahštok».
U śpisie hramadzian Biełarusi, jakija vajujuć va Ukrainie na baku Rasii, jość Alaksandr Vituchnoŭski. Jaho dadzienyja całkam supadajuć z dadzienymi byłoha palitviaźnia z Homiela.
Pra Vituchnoŭskaha viadoma, što jon byŭ asudžany 25 kastryčnika 2023 hoda pa troch kryminalnych palityčnych artykułach: «arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich», «raspalvańnie varožaści abo roźni» i abraza Łukašenki.
Termin, pryznačany Vituchnoŭskamu, nieviadomy, ale, niahledziačy na abvinavačvańnie adrazu pa troch artykułach, nieŭzabavie chłopiec apynuŭsia na voli.
Heta stała zrazumieła dziakujučy abjavie pošukavaha atrada «Simuran», jaki paviedamlaŭ, što 10 maja 2024 hoda Alaksandr syšoŭ z domu i źnik. Praz dva dni źjaviłasia paviedamleńnie, što hamialčanina znajšli supracoŭniki milicyi i ź im usio ŭ paradku.
Z tych časoŭ nijakich źviestak pra Vituchnoŭskaha nie było. Apošnija zapisy na jaho adzinaj aktualnaj staroncy, znojdzienaj u sacsietkach, amal całkam pryśviečany anime. Deviz Taida desu ne ź japonskaj pierakładajecca jak «Heta lanota». Na dźviuch apošnich fotazdymkach — sełfi Alaksandra (24 červienia 2024 hoda) i razmyty zdymak čałavieka ŭ abmundziravańni, padobnaha na piechacinca, sa śpiny (24 listapada 2024). U sietcy jon nie źjaŭlaŭsia ŭžo daŭno.
Viadoma, što ŭ studzieni 2024 hoda MUS unies hamialčanina ŭ «śpis ekstremistaŭ», a KDB — u «śpis terarystaŭ».
Heta standartnaja situacyja: mnohich palitviaźniaŭ u Biełarusi ŭnosiać u takija śpisy — u tym liku, kab pahoršyć umovy ich utrymańnia ŭ kałonii, a taksama ŭskładnić žyćcio na voli.
Ciapier čytajuć
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary
"Pajšoŭ vajavać" hučyć, jak by pa svajoj voli pajšoŭ.
Ja b nie staŭ rabić takich chutkich vyvadaŭ. Što "pajšoŭ sam".
Pamiatajecie chłopca-narkamana na dopycie ŭ Butusava, jaki praz Rasieju chacieŭ źjechać u Hałandyju na pracu?
A jaho spajmali rasiejskija palicejskija i pastavili pierad vybaram: abo turma, abo kantrakt. I nachłusili, što vajavać nie pašluć. Vybar biez vybaru.
Ci moh hety chłopiec taksama sprabavać vyjechać praz Rasieju i trapić u łapy rasiejskaj palicyi? Nie vyklučaju takoha varyjantu.