Ratujučysia ad ałkaholu, paet Krutkin pabyvaŭ u dziŭnym rechabie — malitvy, padjom siarod nočy i zabarona na razmovy z rodnymi

Niekalki miesiacaŭ tamu Aleś trapiŭ u adnu ź vilenskich balnic z sindromam admieny, jaki źjaviŭsia ŭ jaho praz zaležnaść ad ałkaholu. Tam jon paznajomiŭsia z žančynaj, jakaja raskazała jamu pra mahčymaść trapić na reabilitacyju ŭ Hiermaniju. Krutkinu nabyli ŭsie kvitki, sustreli jaho ŭ Lejpcyhu i advieźli na mašynie ŭ reabilitacyjny centr.

Ustanovu, pra jakuju idzie havorka, zasnavali piacidziasiatniki. Reabilitacyja tam biaspłatnaja, pa prahramie jana doŭžycca adzin hod — praŭda, Krutkinu dazvolili syści praź miesiac.

Pavialičyć

Aleś raskazvaje, što jaho pohlad na reabilitacyju nie supaŭ z pohladami supracoŭnikaŭ centra:

«Naprykład, u čałavieka jość niejkaja zaležnaść. I jany bačać prablemu nie ŭ samoj zaležnaści, a ŭ tym, što heta byccam nastupstva taho, što čałaviek nie prytrymlivajecca Jevanhiella. A ja nie chacieŭ jevanhielizoŭvacca».

Centr znachodzicca ŭ katedžy za 30 kiłamietraŭ ad Lejpcyha. Sam katedž pabudavany niekalki dziesiacihodździaŭ tamu, ale prybudovam da jaho ŭžo bolš za sto hadoŭ.

Kali Aleś pryjechaŭ u centr, jon mieŭ pry sabie 170 jeŭra. Akazałasia, što pastajalcam centra nielha zachoŭvać pry sabie hrošy. Krutkinu prapanavali pieradać hrošy svajakam, ale jaho rodnyja byli daloka. Možna taksama hetyja hrošy achviaravać na dziejnaść centra ci pajechać razam z supracoŭnikam centra ŭ kramu i vydatkavać ich na karysnyja rečy nakštałt vopratki.

Pavialičyć

Pavialičyć

Režym dnia ŭ centry nie dla słabakoŭ:

«Ustajuć zvyčajna a piataj ranicy. Adrazu paśla padjomu treba iści na 15 chvilin na vulicu i špacyravać tam sam-nasam z saboj. Potym hornica — heta niedzie paŭtary hadziny, kali ŭsie molacca i čytajuć Jevanhielle, i treba skazać, što ty nie zrazumieŭ, a što tabie adkryłasia. 

Potym śniadanak, jašče jość abied i viačera. Tam supracoŭniki pa čarzie trymajuć post dva razy na tydzień, padčas jaho sutki nie jaduć. Ale dla nas, reabilitantaŭ, heta nie było abaviazkova».

Potym pačynajecca pracaterapija. Jana prachodzić prosta ŭ centry, bo za jaho miežy reabilitantam nielha vychodzić. Mahli, naprykład, zahadać prybrać dom ci niešta parabić na dvary.

Paśla pracy — znoŭ Biblija, potym abied i viartańnie da pracy. Dalej viačera, a potym — novyja mierapryjemstvy. U niadzielu davodziłasia pračynacca a 3:30 ranku — kab dałučycca da sazvonaŭ ź piacidziesiatnikami ź inšych krain.

Reabilitantam nielha čytać ničoha, akramia Jevanhiella. Kali pastupaješ u centr, treba addać telefon, tamu nie atrymajecca zvanić navat rodnym ci sačyć za navinami. Aleś uspaminaje, što tady, u mai-červieni, ničoha nie čuŭ pra vajnu Izraila i Irana — tolki zdahadvaŭsia, što niešta adbyvajecca na Blizkim Uschodzie, bo jaho zhadvali ŭ malitvach.

Krutkin spačatku staviŭsia da praktyk u centry skieptyčna, ale ciapier ličyć, što centr jamu dapamoh:

«Heta čas dla pieratrymki, kab prajšło niekalki miesiacaŭ, kali ty nie ŭžyvaješ ałkahol. Hety dośvied karysny pierš za ŭsio dla ludziej, jakija majuć kryšku viery, im tam lahčej.

Tamtejšyja supracoŭniki zbolšaha ŭ minułym byli narkamanami, kałolisia pa 15-20 hadoŭ i mieli vybar abo iści pa hetym šlachu, abo pamierci. Ja ź imi spračaŭsia, ale potym zrazumieŭ — jak možna heta rabić, kali centr 10-15 hadoŭ tamu dapamoh im nie pamierci? Hety čałaviek budzie ŭpeŭnieny, što jon dakładna maje racyju».

Pavialičyć

Pavialičyć

Krutkin tłumačyć, što ličyć reabilitacyju skončanaj možna tady, kali ciabie na jaje zakančeńnie błahasłaviŭ pastar, i nie abaviazkova heta budzie praz hod. 

Jašče adzin cikavy niuans — u centry niama nijakich śpiecyjalistaŭ, jakija mahli b pracavać z zaležnymi: ni narkołahaŭ, ni psichołahaŭ ci psichijatraŭ. 

Da śpiecyfičnych umovaŭ u centry Aleś stavicca z razumieńniem:

«Čałaviek moža ŭ luby momant syści, usio dobraachvotna, heta nie turma ci niejki nienasieleny vostraŭ, adkul nielha syści. Supracoŭniki zrazumieli ŭ niejki momant, što ja staŭlusia da Jevanhiella jak da čahości fiłasofskaha ci histaryčnaha. Tady jany ździvilisia — maŭlaŭ, jak tak možna siabie začynić pa svajoj voli, kali navat nie chočaš jevanhielizavacca? Ale toj, chto maje vieru, moža tam pravieści i hod, i dva».

Aleś Krutkin kaža, što paśla viartańnia z rechaba nie ŭžyvaje ałkahol.

• 2
• 0
• 3
• 2
• 1
• 1
• 0
• 0