Bił Hiejts vyrašyŭ razdać amal usie svaje hrošy na praciahu najbližejšych dvaccaci hadoŭ
«Kali ja pamru, pra mianie buduć kazać roznaje, ale ja ćviorda nastrojeny zrabić tak, kab pra mianie nie skazali «jon pamior bahatym», — napisaŭ Bił Hiejts.
Zasnavalnik Microsoft Bił Hiejts abviaściŭ, što vyrašyŭ patracić 99% svaich hrošaj na dabračynnaść na praciahu najbližejšych dvaccaci hadoŭ, piša Bi-bi-si.
«Kali ja pamru, pra mianie buduć kazać roznaje, ale ja ćviorda nastrojeny zrabić tak, kab pra mianie nie skazali «jon pamior bahatym», — napisaŭ Bił Hiejts na svaim sajcie, pracytavaŭšy pierad hetym słovy amierykanskaha mahnata i fiłantropa Endru Karniehi pra toje, što toj, chto pamiraje bahatym, pamiraje zhańblenym.
Praŭda, pa stanie na zaraz, kali Hiejts razdaść 99% svaich hrošaj, to ŭsio roŭna zastaniecca miljarderam. U tekst pra svajo rašeńnie jon ustaviŭ hrafik, zhodna ź jakim jaho stan ciapier aceńvajecca ŭ 108 młrd dalaraŭ.
Fond Hiejtsaŭ (Fond Biła i Mielindy Hiejts) daŭno finansuje prajekty ŭ halinie achovy zdaroŭja i inšych śfierach, ale ciapier, jak patłumačyŭ zasnavalnik Microsoft, jon vyrašyŭ paskoryć traty: kali raniej jany z žonkaj płanavali, što fond budzie pracavać dziesiacihodździ paśla ich śmierci, to ciapier jon vyrašyŭ, što fond razdaść usie hrošy i začynicca ŭ 2045 hodzie. Hiejtsu hetaj vosieńniu spaŭniajecca 70 hadoŭ.
Pa raźlikach Hiejtsa, za hetyja 20 hadoŭ jaho fond patracić kala 200 młrd dalaraŭ — kančatkovaja suma budzie zaležać ad situacyi na rynku i inflacyi. Za 25 hadoŭ isnavańnia Fond Hiejtsaŭ užo vyłučyŭ 100 miljardaŭ na achovu zdaroŭja i raźvićcio ŭ roznych krainach.
U nastupnyja dvaccać hadoŭ fond, jak napisaŭ Hiejts, budzie pieraśledavać try hałoŭnyja mety: pieramoha nad chvarobami, jakija možna praduchilić, ale jakija ŭsio jašče zabivajuć maci i dziaciej; pieramoha nad infiekcyjnymi zachvorvańniami, uklučajučy malaryju i adzior, a taksama vyratavańnie ad halečy sotniaŭ miljonaŭ žycharoŭ roznych krain.
Na pytańnie, čym vyklikana hetaje rašeńnie, u intervju Bi-bi-si ŭ čaćvier Hiejts skazaŭ, što praz dvaccać hadoŭ u śviecie buduć inšyja bahatyja ludzi, i jany buduć lepš razumieć, jak dapamahčy ludziam vyrašać prablemy.
«Tut sprava ŭ terminovaści. My možam tracić značna bolš, kali tolki nie źbirajemsia žyć viečna, i ja viedaju, što hetyja traty buduć adpaviadać maim kaštoŭnaściam», — skazaŭ Hiejts.
Bił Hiejts i Poł Alen zasnavali Microsoft u 1975 hodzie. U hetym hodzie hetamu hihantu ŭ śviecie kampjutarnych i infarmacyjnych technałohij spaŭniajecca paŭstahodździa. Sam Hiejts u 2000 hodzie syšoŭ z pasady hienieralnaha dyrektara kampanii, a ŭ 2014 — z pasady staršyni praŭleńnia, a ŭ 2020 hodzie vyjšaŭ z savieta dyrektaraŭ.
U intervju Bi-bi-si były samy bahaty čałaviek płaniety Bił Hiejts znoŭ abvinavaciŭ ciapierašniaha samaha bahataha čałavieka płaniety Iłana Maska ŭ tym, što jaho Departamient efiektyŭnaści dziaržaŭnaha kiravańnia pry administracyi Trampa zabivaje dziaciej, skaračajučy vydatki ZŠA na dapamohu inšym krainam.
«Hetyja skaračeńni nie prosta zabivajuć dziaciej, jany zabivajuć miljony dziaciej. Ad samaha bahataha čałavieka ŭ śviecie ja takoha nie čakaŭ», — skazaŭ Hiejts.
Ciapier čytajuć
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?18
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci33
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci3
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju3333
Kamientary
Bił Hiejts - hieroj kanśpirałahičnych teoryj:
1) adna z papularnych teoryj abvinavačvaje jaho ŭ stvareńni COVID-19 dla čypizacyi nasielnictva;
2) ruch-siekta QAnon śćviardžaje, što amierykanskija demakraty: Bajden, Abama, Chiłary Klintan, bahaciei Soras i Hiejts, inšaja elita - jość satanisty, jakija ekspłuatavali dziaciej pa ŭsiamu śvietu dla sieksu i zdabyčy ź ich kryvi lekaŭ dla zachavańnia maładości ("kryvavy paklop" na novym uzroŭni), a Tramp - zbaviciel ad hetaj navały.
Mask i Tramp nieadnojčy padtrymlivali kanśpirołahaŭ, pierasyłali ich paviedamleńni. Tramp abaraniaŭ QAnon, chvaliŭ za patryjotyzm, a Mask (niadaŭna, u lutym) pisaŭ, što USAID spansavała bijazbroju, u tym liku COVID-19.