Maci traich dziaciej prosić Łukašenku viarnuć ich z prytułku. Čynoŭniki patłumačyli, čamu ŭ jaje nie atrymałasia
Biełaruska Ajše Piłumian źviarnułasia da Alaksandra Łukašenki z prośbaj dapamahčy viarnuć joj troch małych dziaciej, jakich u sakaviku zabrali pad dziaržaŭnuju apieku. Apošnija hady tyja žyli ź jaje byłym mužam u Zelvienskim rajonie, ale baćka staŭ pić. Pa słovach Ajše, prymajučy kančatkovaje rašeńnie, čynoŭniki nie prapanavali joj zabrać dziaciej da siabie ŭ Minsk i abmiežavali ŭ pravach, choć na siońnia jana «maje ŭsie ŭmovy» dla ich vychavańnia.
«Alaksandr Ryhoravič, ja adekvatny čałaviek, jaki nie pje. Kali łaska, dapamažycie mnie viarnuć maich dziaciej. Jany nie pavinny byli trapić u prytułak, pry tym što ŭ ich jość maci», — maliła žančyna. Rolik ź jaje zvarotam sabraŭ šmat prahladaŭ i kamientaroŭ, i čynoŭniki adreahavali na jaho praz rajonnuju presu.
Zahadčyca siektara sacyjalnaj i arhanizacyjna-piedahahičnaj raboty adździeła adukacyi Zelvienskaha rajvykankama Volha Viežnaviec raskazała, što historyja siamji idzie karaniami ŭ 2020 hod, kali adbyŭsia razvod. Ajše Piłumian prasiła, kab dzieciam dali prava žyć ź joj. «Ale padčas sudovaha raźbiralnictva jana ad svaich patrabavańniaŭ admoviłasia, tym samym daŭšy zhodu na pražyvańnie dziaciej z baćkam».
Dali słova i namieśnicy dyrektara Dziarečynskaj siaredniaj škoły Natalli Karol, u jakoj vučylisia dzieci. U videa jana kaža, što maci nie cikaviłasia ich navučańniem, nie naviedvała baćkoŭskija schody.
Pry hetym dyrektarka škoły Iryna Kryštopčyk udakładniaje, što Ajše ŭ śniežni 2024 hoda ŭsio ž vychodziła ź joj na suviaź. A paśla navat pryjechała na ranišnik i baćkoŭski schod, dzie razmaŭlała z kłasnaj kiraŭnicaj, apraŭdvajučy svaju raniejšuju adsutnaść u žyćci školnikaŭ pracaj i navučańniem u Minsku, u jakija ŭkładałasia dla adnoj mety: adnojčy mieć umovy dla abjadnańnia ź dziećmi.
«Ale nadalej jana škołu nie naviedvała», — spravazdačycca dyrektarka.
«12 sakavika było pryniata rašeńnie ab tym, što troje dziaciej majuć patrebu ŭ dziaržaŭnaj abaronie i źmiaščeńni ich na dziaržaŭnaje zabieśpiačeńnie. Padstavaj pasłužyli fakty ŭžyvańnia baćkam śpirtnych napojaŭ, a taksama samaŭchileńnie maci ad abaviazkaŭ pa vychavańni dziaciej», — padsumavali ŭ kamisii pa spravach niepaŭnaletnich Zelvienskaha rajvykankama.
Ajše Pałumian z takim rašeńniem nie zhodnaja i płanuje dalej zmahacca za dziaciej. Pakul ža jana naviedvaje ich u prytułku.
«Ja viedaju, što toje, što ja redka pryjazdžała da dziaciej ciaham hetaha času [z 2020 hoda], heta drenna. I toje, što ja ŭchilałasia ad alimientaŭ, heta drenna. Tut ja vinavataja. Ale dziaciej u baćki ŭsio adno b adnojčy zabrali, i jany b apynulisia ŭ prytułku. I kali b ja nie ŭkładała ŭsie svaje siły i srodki ŭ navučańnie, u mianie b nie było mahčymaści za ich zmahacca», — upeŭnienaja Ajše, jakaja pracuje majstrychaj pa manikiury.
Biełaruski IT-miljarder Hurski: Maju pieršuju žonku zabiŭ hiembler5
Kamientary