Fatohraf-ahient Miščuk nie pamiataje, jak rabiŭ svoj zdymak na pašpart prykryćcia. I jašče šmat što nie pamiataje
«Miedyjazona» parazmaŭlała ź Ivanam Miščukom — biełaruskim fatohrafam, što pracavaŭ u Varšavie i ŭ jakoha znajšli pašpart prykryćcia. Jon raskazaŭ, jak pierad adjezdam ź Biełarusi nibyta prynosiŭ u vajenkamat svaje fotazdymki, ale nie pamiataje jakija. Nie pamiataje Ivan i datu svajho zatrymańnia za ŭdzieł u pratestach, a taksama inšyja detali svajho žyćcia.
Miščuk pryjechaŭ u Varšavu pa studenckaj vizie vosieńniu 2021 hoda — na kursy «Akademii fatahrafii». Pierad pajezdkaj na vučobu Ivana nibyta vyklikali ŭ vajenkamat i paprasili prynieści fatahrafii. Jamu skazali, što heta «dla abnaŭleńnia jaho spravy».
Ciapier mužčyna nie pamiataje, jakija mienavita zdymki adnios u vajenkamat. Jak i nie pamiataje, adkul jaho fota z pašparta prykryćcia, apublikavany «Našaj Nivaj».
«Jano mahło ŭziacca adkul zaŭhodna, ja nie pamiataju», — adkazaŭ jon na pytańnie ab fotazdymku, što jość u pašparcie prykryćcia.
U 2022 hodzie fatohraf vyrašyŭ źjeździć u Kobryn da siamji. Kaža, što raźličvaŭ viarnucca pa praterminavanaj vizie, jak heta dazvalali kavidnyja normy. Ale ŭ jaho nie atrymałasia. «Miedyjazona» znajšła čałavieka, jaki skarystaŭsia padobnymi «padaŭžeńniami» dla viz i vyjechaŭ z Bresta ŭ Polšču ŭ lutym 2023 hoda biez dadatkovych dakumientaŭ.
U Biełarusi Miščuk nie adčuvaŭ siabie ŭ biaśpiecy, kaža jon, praz toje, što ŭ 2020 hodzie jaho nibyta zatrymlivali, kali jon byŭ z kamieraj kala akcyi. Ale datu zatrymańnia jon nie pamiataje — «kaniec žniŭnia ci pačatak vieraśnia». Pa słovach Miščuka, jaho nieŭzabavie adpuścili i papiaredzili, kab bolš nie traplaŭsia, bo paznali jaho jak fatohrafa.
Na vybarach u 2020-m, kaža fatohraf, jon simpatyzavaŭ Valeryju Capkału, ale praź niadopusk jaho da kampanii «adznačyŭ u błanku Siarhieja Čeračnia — za jaho, za kaho zaŭhodna, tolki nie za Łukašenku».
27 maja «Naša Niva» apublikavała źviestki pra druhi pašpart u biełaruskaha fatohrafa ŭ Varšavie. Takija dakumienty zvyčajna vydajucca ahientam MUS, KDB, vajennaj raźviedki abo Pahrankamiteta dla vyrašeńnia apieratyŭnych zadač.
U Varšavie Miščuk fatahrafavaŭ biełaruskija mierapryjemstvy i rabiŭ pryvatnyja fotasesii, naprykład, dla Aliny Koŭšyk i Julii Šamietaviec.
Kamientary
4 hady nie tak šmat, a kali pamiać padmanvaje, to možna znajści prykładny pieryjad na svaich archiŭnych fotach.