Stralanina ŭ aŭstryjskim Hracy: horad šakavany napadam na škołu i pahruziŭsia ŭ žałobu
U Hracy panujuć šok, smutak i niedavier paśla samaj strašnaj stralaniny ŭ sučasnaj historyi Aŭstryi, u vyniku jakoj zahinuli 11 čałaviek, uklučajučy napadnika, piša Bi-bi-si.
«My nikoli nie mahli sabie ŭjavić, što takoje moža zdarycca tut. Heta sumny dzień dla ŭsiaho horada», — skazała Reka, jakaja žyvie pobač sa škołaj.
Na praciahu mnohich hadoŭ Aŭstryja była pazbaŭlena masavych incydentaŭ sa stralaninaj u škołach.
Ale ŭsio źmianiłasia kala 10 hadzin ranicy ŭ aŭtorak, kali były vučań učyniŭ stralaninu ŭ siaredniaj škole niedaloka ad hałoŭnaha vakzała druhoha pa vieličyni horada Aŭstryi. Kali adbyŭsia napad, u škole išli ranišnija zaniatki. Niekatoryja vučni zdavali vypusknyja ispyty.
Palicyi spatrebiłasia 17 chvilin, kab uziać situacyju pad kantrol. Da momantu zakančeńnia stralaniny šeść žančyn i troje mužčyn byli miortvyja. Praź niekalki hadzin jašče adna darosłaja žančyna pamierła ŭ balnicy. Niekalki paciarpiełych byli špitalizavanyja, niekatoryja — ź ciažkimi traŭmami.
Strałok, 21-hadovy hramadzianin Aŭstryi, jaki mieŭ pry sabie dźvie adzinki ahniastrelnaj zbroi, skončyŭ žyćcio samahubstvam.
Były vučań škoły, jaki tak i nie zdaŭ vypusknyja ispyty, pavodle paviedamleńniaŭ, ličyŭ siabie achviaraj ździekaŭ. Miascovaja žycharka Reka skazała, što nie moža zrazumieć, jak takoje napadzieńnie mahło adbycca ŭ jaje horadzie.
«Hety rajon cichaje, biaśpiečnaje i pryhožaje miesca, — skazała jana. — Ludzi tut dobryja, škoła dobraja».
Prezident Aŭstryi Alaksandr Van der Bielen skazaŭ: «Hety žach niemahčyma apisać słovami. Toje, što siońnia adbyłosia ŭ škole ŭ Hracy, udaryła ŭ samaje serca našaj krainy. Heta byli maładyja ludzi, u jakich była ŭsia budučynia napieradzie».
Jon skazaŭ, što «ničoha na dadzieny momant nie moža palehčyć bol, jaki adčuvajuć baćki, babuli i dziaduli, braty i siostry, siabry zabitych».
Kancler Aŭstryi Kryścijan Štokier, jaki razam ź ministram unutranych spraŭ Hierchardam Karnieram prybyŭ na miesca zdareńnia, nazvaŭ heta «nacyjanalnaj trahiedyjaj, što skałanuła ŭsiu krainu».
U Aŭstryi abvieščana trochdzionnaja žałoba. Ściahi ŭ pałacy Chofburh u Vienie, dzie znachodzicca ofis prezidenta, buduć spuščanyja.
Aŭstryja źjaŭlajecca adnoj z samych uzbrojenych krain Jeŭropy: pavodle danych niezaležnaha daśledčaha prajekta Small Arms Survey, na 100 čałaviek prypadaje kala 30 adzinak ahniastrelnaj zbroi.
Adnak vypadki stralaniny ŭ škołach tut redkaść. Za apošnija hady adbyłosia niekalki incydentaŭ, u jakich kolkaść achviar była značna mienšaj.
Samy žorstki napad z vykarystańniem ahniastrelnaj zbroi ŭ Aŭstryi za apošnija hady adbyŭsia ŭ centry Vieny ŭ listapadzie 2020 hoda. Čatyry čałavieki zahinuli i 22 atrymali ranieńni, kali raniej asudžany za suviazi z džychadysckimi hrupoŭkami adkryŭ ahoń u centry horada, pierš čym byŭ zastreleny palicyjaj.
Kulamioty i pompavyja ružžy zabaronienyja, a na revalviery, pistalety i paŭaŭtamatyčnuju zbroju nieabchodna atrymlivać dazvoł. Vintoŭki i drabaviki dazvolenyja pry najaŭnaści licenzii na ahniastrelnuju zbroju abo palaŭničaj licenzii, a taksama dla členaŭ tradycyjnych strałkovych kłubaŭ.
Pavodle źviestak, toj, chto ŭčyniŭ stralaninu ŭ Hracy, vałodaŭ ahniastrelnaj zbrojaj na zakonnych padstavach i nie mieŭ sudzimaściaŭ. Pavodle adnaho z paviedamleńniaŭ, adzin z stvałoŭ byŭ nabyty ŭsiaho za dzień da napadu.
Pobač sa škołaj małady čałaviek na rovary naziraŭ, jak palicyja prapuskała aŭtamabili ekstranych słužbaŭ praz ačapleńnie.
«Heta žachliva, — skazaŭ jon mnie. — Heta moj dom. Ja nie mahu zrazumieć, jak tak šmat maich adnahodkaŭ zahinuli. Heta nie pavinna było zdarycca».
Niežyvym znojdzieny ŭ Varšavie Źmicier Kaśpiarovič — 43-hadovy były palitviazień, zavierbavany KDB6
Kamientary