Pamiatajecie kandydata ŭ prezidenty Usa? Jaho syn pajšoŭ vajavać za Rasiju
Były kiraŭnik ruchu «Antymajdan Minsk» Ivan Us u 2020-m udzielničaŭ u pratestach, a ciapier znoŭ prysiahnuŭ Rasii i Pucinu.
Ukrainski prajekt «Chaču žyć» apublikavaŭ śpis 596 hramadzian Biełarusi, jakija ŭ hetym hodzie padpisali kantrakt z rasijskaj armijaj i adpravilisia na front va Ukrainu.
Siarod hetych imionaŭ jość i adno paznavalnaje — 29-hadovy Ivan Us. Heta syn Dźmitryja Usa, vypadkovaha kandydata ŭ prezidenty ŭ Biełarusi ŭ 2010 hodzie.
Ukraincy zdabyli źviestki, što radavy Ivan Us padpisaŭ kantrakt 17 studzienia 2025 hoda i atrymaŭ žeton AB-061178.
Ivan Us zdabyŭ viadomaść u siaredzinie 2010-ch jak administratar prarasijskaj supołki «Antymajdan Minsk» u sacyjalnaj sietcy «UKantakcie». Jon płanavaŭ pravieści ŭ stalicy Biełarusi źjezd «Antymajdana», ale ŭrešcie admoviŭsia ad idei z pryčyn biaśpieki. U internecie isnuje videa pra toje, jak anarchisty i fanaty futbolnaha «Partyzana» złavili Usa i praviali vychavaŭčuju razmovu. Paśla hetaha aktyŭnaść chłopca źniziłasia.
Na niejki čas jon prapaŭ z hramadskaha žyćcia, ale ŭ 2020-m staŭ udzielnikam pratestaŭ. Ivanu dali 15 sutak za ŭdzieł u niadzielnym maršy 16 žniŭnia.
Pradprymalnik Dźmitryj Us byŭ zarehistravany kandydatam u prezidenty ŭ 2010 hodzie. Tady Alaksandr Łukašenka vyrašyŭ zapisać u vybarčyja biuleteni ŭsich achvotnych.
Uvohule Dźmitryj Us pieradusim dapamahaŭ źbirać podpisy Mikołu Statkieviču, ale zaadno nibyta sabraŭ 110 tysiač hałasoŭ u svaju padtrymku. Usu ciažka davałasia vybarčaja kampanija i ahitacyja — jon zmahaŭsia z nastupstvami insultu, tamu ledź razmaŭlaŭ.
Centrvybarkam zajaviŭ, što na vybarach za Usa prahałasavali 25 tysiač čałaviek (nie daciahnuŭ navat da 0,4%).
Tym nie mienš pad represii trapiŭ i jon. Usa aryštavali, na niejki čas adpuścili dadomu, ale ŭrešcie ŭsio adno prysudzili piać z pałovaj hadoŭ źniavoleńnia. Eks-kandydata ŭtrymlivali ŭ škłoŭskaj kałonii. Praź piać miesiacaŭ Usa pamiłavali.
Jon viarnuŭsia da drukarskaha kartahrafičnaha biznesu. Syn Ivan pracavaŭ pamočnikam u baćki.
-
Łukašenka na pieramovach u Amanie ŭstaviŭ takoje słova, što pierakładčyca na arabskuju razhubiłasia
-
U Lidzie pabralisia šlubam 15‑hadovyja chłopiec i dziaŭčyna. Samaj maładoj mamie Hrodzienščyny taksama 15
-
«U płanie byli jašče niekalki krain». Maršrut Łukašenki składali tak, kab nie nadta biła pa zdaroŭi
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy27
Kamientary