Piać faktaŭ pra novaha pres-sakratara MZS, jaki chamavataściu kosić pad Maryju Zacharavu
Rusłan Varankoŭ, jaki adznačyŭsia krynžovym padarunkam u Maskvie — padaryŭ Zacharavaj siakieru, užo niekalki miesiacaŭ pracuje pres-sakratarom MZS Biełarusi. «Salidarnaść» pahladzieła, jakija ŭ jaho bijahrafii jość cikavyja staronki.
U pačatku červienia Rusłan Varankoŭ padaryŭ siakieru-kałun vytvorčaści MTZ pradstaŭnicy rasijskaha MZS Maryi Zacharavaj. Maŭlaŭ, takim čynam, jany razam buduć «siekčy praŭdu-matku».
Treba adznačyć, što pasył nie acanili navat u kamientarach na staroncy biełaruskaha MZS u Facebook. Naprykład, tam apublikavali nastupnuju ilustracyju.
Mahčyma, vy mahli prapuścić, što ŭ Biełarusi niadaŭna źmianiŭsia pres-sakratar MZS: u pačatku krasavika Rusłan Varankoŭ źmianiŭ Anatola Hłaza, adpraŭlenaha pasłom u Turcyju.
Voś što viadoma pra bijahrafiju novaj asoby ŭ biełaruskim zamiežnapalityčnym viedamstvie.
Skončyŭ licej u Mahilovie
Heta vynikaje ź infarmacyi, raźmieščanaj Rusłanam Varankovym u Facebook. U abłasnym centry jość niekalki licejaŭ, jaki mienavita jon skončyŭ — nie ŭdakładniajecca. Niadaŭna ŭ honar Mižnarodnaha dnia siamji dypłamat padzialiŭsia svajoj fatahrafijaj z baćkami.
U 2001-2006 hadach Varankoŭ vyvučaŭ mižnarodnaje prava ŭ BDU, vałodaje anhlijskaj i francuzskaj movami. U 2007-2008 hadach pracavaŭ u ministerstvie justycyi, paśla pierajšoŭ u MZS.
Abłom z pryznačeńniem hienieralnym konsułam u Ńju-Jork
Niekatory čas Varankoŭ prapracavaŭ daradcam i juryskonsultam u Pastajannym pradstaŭnictvie Biełarusi pry AAN u Ńju-Jorku, adkazvajučy, u pryvatnaści, za jurydyčnyja i biudžetnyja pytańni, a taksama za baraćbu z teraryzmam. Byŭ abrany staršynioj Śpiecyjalnaha kamiteta pa statucie AAN.
Zatym dypłamat zaniaŭ pasadu namieśnika načalnika ŭpraŭleńnia Azii, Aŭstralii i Akijanii MZS.
U lipieni 2021 hoda ŭ karjery Varankova adbyłasia, jak tady zdavałasia, znamianalnaja padzieja. Łukašenka pryznačyŭ jaho hienieralnym konsułam u Ńju-Jork.
Užo ŭ kastryčniku na patrabavańnie amierykanskich uładaŭ Hienieralnaje konsulstva Biełarusi ŭ Ńju‑Jorku było zakrytaje. Adnosiny dźviuch krain pieražyvali čarhovy kryzis sa skaračeńniem dypłamatyčnaj prysutnaści.
Udzieł u aryšcie «kalinoŭca» Vieramiejčyka
Vosieńniu 2024 hoda ŭ Chašyminie byŭ zatrymany i vydadzieny biełaruskamu KDB były bajec pałka Kalinoŭskaha Vasil Vieramiejčyk. Naŭrad ci ŭ baku ad toj apieracyi moh zastacca Rusłan Varankoŭ.
Sprava ŭ tym, što viasnoj 2022 hoda paśla niaŭdałaj pracy ŭ Ńju-Jorku jon byŭ pryznačany hienieralnym konsułam Biełarusi jakraz u Chašyminie, najbujniejšym horadzie Vjetnama (raniej viadomym jak Sajhon).
Nie chavaje žonki
Darečy, padčas pracy hienieralnym konsułam u Chašyminie Varankoŭ niekalki razoŭ udzielničaŭ z žonkaj u publičnych mierapryjemstvach. Naprykład, u fiestyvali tradycyjnaha vjetnamskaha kaściuma aazaj.
A taksama ŭ śviatkavańni miesiacovaha Novaha hoda, padčas jakoha muž i žonka nadzieli aazaj i vypuścili karpaŭ u sažałku.
Varankoŭ pierajmaje skandalny styl Zacharavaj
U pačatku krasavika hetaha hoda dypłamata čakała pavyšeńnie da pres-sakratara MZS Biełarusi. U viedamstvie Varankova nazvali «dypłamatam ź vialikim vopytam i ŭražlivym pasłužnym śpisam».
Padarunak Maryi Zacharavaj u vyhladzie siakiery nie vypadkovy.
Prykmietna, što Varankoŭ, jak i jaho papiarednik Anatol Hłaz, aryjentujecca na «tramvajny» styl rasijskich dypłamataŭ — abraźlivy i ahresiŭny. Takim čynam dypłamaty biaruć na siabie jašče i funkcyju prapahandystaŭ dla ŭnutranaj aŭdytoryi.
Prykłady? 10 krasavika ŭ paviedamleńni MZS Biełarusi było zajaŭlena, što ankiety dla ludziej, jakija ŭjazdžajuć z krain SND u Łatviju — heta «niby siaredniaviečny karancin», a ŭ Estonii nibyta jość «vybarčy aparteid» (tam zabaranili hałasavać na miascovych vybarach hramadzianam Biełarusi i RF).
23 traŭnia Varankoŭ paabiacaŭ zmročnuju budučyniu jeŭrapiejcam z-za mytaŭ na biełaruski impart, uzhadaŭšy vykazvańnie «na złość mamie vušy admaroziać».
Całkam mahčyma, Varankoŭ maje namier pieraplunuć u chamstvie svajho papiarednika Anatola Hłaza.
Ciapier čytajuć
Były viadučy BT, jaki zvolniŭsia ŭ 2020-m i vyjechaŭ u Słavakiju, raskazaŭ, jak žyvie ciapier2
Kamientary