Infiekcyjanist raskazaŭ, ci treba zdavać klašča na analiz i kolki razoŭ pić doksicyklin

1. Paśla vydaleńnia klašča dastatkova adnarazova pryniać doksicyklin. Pryčym adnarazovy pryjom dazvoleny nie tolki darosłym, ale i dzieciam luboha ŭzrostu, a taksama ciažarnym (daziroŭki dla roznych uzrostavych hrup možna pahladzieć tut).

Pryjom doksicyklinu na praciahu 3‑5‑10‑pažyćciova dzion NIE PADVYŠAJE efiektyŭnaść prafiłaktyki chvaroby Łajma i inšych bakteryjalnych kleščavych infiekcyj, ale pryvodzić da pabočnych efiektaŭ i admoŭna ŭpłyvaje na vašu mikrabijotu. Jak praviła, mikrabijotu lepš źbierahčy, uličvajučy, kolki antybijotykaŭ čałaviek u siarednim prymaje za žyćcio pa roznych pryčynach.

2. Daśledavać padabranych klaščoŭ na infiekcyi ŭ bolšaści vypadkaŭ BIESKARYCNA. Navat kali klešč inficyravany, miedyki NIE LEČAĆ klaščoŭ. Bolš za toje, tolki nievialikaja častka inficyravanych klaščoŭ pieradaje ŭzbudžalniki čałavieku. Taktyka ŭ dačynieńni da pacyjenta ź inficyravanym bakteryjalnym uzbudžalnikam klaščom takaja ž, jak i ŭ dačynieńni da pacyjenta z klaščom NIE inficyravanym pa danych daśledavańnia — usio toj ža adnarazovy pryjom doksicyklinu ŭ pieršyja 72 hadziny i nazirańnie za svaim samaadčuvańniem i miescam ukusu klašča na praciahu miesiaca.

Bolš padrabiazna hladzicie tut. 

3. Kali klešč vydaleny i pryniaty doksicyklin, źviartacca da doktara nie varta — mahičnych analizaŭ, jakija pakazvali b mahčymuju rańniuju infikacyju klaščom, nie isnuje.

Pieršyja antycieły ŭ kryvi pry kleščavym encefalicie naohuł adsutničajuć navat pry raźvićci pieršaj fazy infiekcyi, a pieršyja antycieły pry chvarobie Łajma źjaŭlajucca tolki praz 4— 6 tydniaŭ paśla źjaŭleńnia mihrujučaj erytemy na skury.

4. Usio, što źjaŭlajecca na skury ŭ pieršyja hadziny i navat 1—3 dni paśla ŭkusu klašča, luboje ahulnaje niedamahańnie ŭ hety termin — heta DAKŁADNA NIE KLEŠČAVAJA INFIEKCYJA. Jość paniaćcie inkubacyjnaha pieryjadu — času ad traplańnia ŭzbudžalnika ŭ arhanizm da pieršych simptomaŭ. I pry kleščavych infiekcyjach luboha pachodžańnia hety inkubacyjny pieryjad nie mienšy za try dni. Na skury davoli chutka moža źjavicca alerhičnaja reakcyja na kampanienty śliny klašča, a ahulnych niedamahańniaŭ moža być mnostva, i klešč tut daloka nie zaŭsiody vinavaty. Z uzrostam bolš karysna dadatkovy raz pravieryć uzrovień arteryjalnaha cisku (i pryniać miery pry nieabchodnaści), čym šukać vinavatych siarod členistanohich.

5. Antykleščavy imunahłabulin u Respublicy Biełaruś, pavodle dziejučych kliničnych pratakołaŭ i inšych narmatyŭnych dakumientaŭ, NIE ŬŽYVAJECCA dla postkantaktnaj prafiłaktyki kleščavaha encefalitu, bo nie pakazaŭ efiektyŭnaści ŭ praduchileńni zachvorvańnia, zhodna z mnohimi daśledavańniami i kliničnaj praktykaj.

Adzinaja efiektyŭnaja stratehija nie zachvareć — heta zahadzia vakcynavacca suprać kleščavaha encefalitu. U krainie jość niekalki vakcyn, i pa nieabchodnaści mahčymyja paskoranyja schiemy vakcynacyi. 

• 13
• 1
• 0
• 1
• 3
• 0
• 0
• 0