Deputaty pryniali prajekt zakona «Ab dziaržaŭnaj rehistracyi i likvidacyi (spynieńni dziejnaści) subjektaŭ haspadarańnia», paviedamlaje pres-słužba parłamienta. Dakumient unosić istotnyja źmieny ŭ pracedury stvareńnia i zakryćcia biznesu, nakiravanyja na spraščeńnie administracyjnych pracesaŭ i ŭzmacnieńnie kantrolu.
Zakon uvodzić rehistracyju kampanij pa typavych statutach i źmianiaje paradak vychadu ŭdzielnikaŭ z haspadarčych tavarystvaŭ, praduhledžvajučy abaviazkovaje nataryjalnaje paśviedčańnie takich dziejańniaŭ, piša Office Life.
Taksama siarod klučavych źmien — skaračeńnie terminu pradastaŭleńnia infarmacyi z Adzinaha dziaržaŭnaha rejestra ź siami da piaci dzion. Uzmacniajucca i patrabavańni da aktualizacyi dadzienych ab kampanijach, u tym liku infarmacyi ab bienieficyjarach.
Terminy pastanoŭki na ŭlik u padatkovych i inšych orhanach skaračajucca ź piaci da troch pracoŭnych dzion, i ciapier nie treba atrymlivać paviedamleńnie ab pastanoŭcy na ŭlik.
Kolkaść rehistrujučych orhanaŭ źmienšycca za košt vyklučeńnia administracyj svabodnych ekanamičnych zon. Ciapier rehistrujučy orhan budzie vyznačacca pa miescy znachodžańnia kampanii.
Zakon uvodzić abaviazkovaje ŭkazańnie adrasa elektronnaj pošty jurydyčnaj asoby ŭ rejestry, jaki budzie mieć jurydyčnuju siłu. U vypadku źmieny adrasa kampanii abaviazanyja paviedamić rehistrujučy orhan.
Dla praduchileńnia ryzykaŭ, źviazanych z pahrozami nacyjanalnaj biaśpiecy, rehistrujučyja orhany buduć zapytvać infarmacyju ab uładalnikach i zasnavalnikach kampanij pierad ich rehistracyjaj. Kali budzie ŭstanoŭlena, što dziejnaść kampanii pahražaje biaśpiecy, rehistracyja budzie adchilenaja.
Zakonaprajekt taksama dazvalaje sudu zabaraniać likvidacyju kampanij i ŭvodzić novyja praviły dla abarony pravoŭ kredytoraŭ. Rehistrujučy orhan zmoža admović u rehistracyi rearhanizacyi, kali ŭ kampanii jość niavykananyja abaviazacielstvy pierad kredytorami.
Kamientary