Šviejcarski hramadski basiejn zabaraniŭ uvachod usim zamiežnikam — usio praz drennyja pavodziny francuzaŭ
Hości z susiedniaj Francyi łajalisia i kupalisia ŭ bialiźnie. Ciapier pakutavać buduć usie zamiežniki.
U Šviejcaryi basiejny — dla šviejcarcaŭ: u kamunie Parantrui ad 5 lipienia ŭvodzicca radykalnaje abmiežavańnie. U miascovy adkryty basiejn ciapier u pieršuju čarhu buduć puskać tolki hramadzian Šviejcaryi. Jak paviedamiła administracyja, zamiežnyja hramadzianie zvyčajna bolš nie dapuskajucca — za redkim vyklučeńniem, piša BILD.
Volny ŭvachod ciapier dazvoleny tolki šviejcarskim hramadzianam, ludziam, jakija pražyvajuć na terytoryi Šviejcaryi, a taksama asobam, što majuć pracoŭnuju damovu ŭ krainie. Zamiežnyja turysty zmohuć naviedać basiejn tolki pry najaŭnaści śpiecyjalnaj karty dostupu, jakuju vydajuć pa paćvierdžańni braniravańnia ŭ hateli abo kiempinhu rehijona.
Pryčyna takoha žorstkaha kroku — pavodziny turystaŭ z Francyi. Pavodle infarmacyi ŭładaŭ, sioleta letam ź ich boku časta adbyvalisia roznyja incydenty. Parantrui znachodzicca blizka ad francuzskaj miažy, i z pačatku kupalnaha siezonu, jak śćviardžaje administracyja, užo było vypisana šmat zabaronaŭ na naviedvańnie — u asnoŭnym hramadzianam Francyi.
Jak patłumačyŭ pradstaŭnik miascovaj administracyi, francuzy damahalisia da maładych žančyn, łajalisia, kupalisia ŭ bialiźnie, a kali im rabili zaŭvahi, to jany pačynali pavodzić siabie ahresiŭna.
Pavodle administracyi, mnohija z parušalnikaŭ pryjazdžajuć z prablemnych rajonaŭ Francyi. Adnak padkreślivajecca, što abmiežavańnie raspaŭsiudžvajecca na ŭsich zamiežnikaŭ, a nie tolki na francuzaŭ.
Faktyčna, ułady viartajucca da praktyki časoŭ pandemii COVID-19: jašče ŭ 2020 hodzie Parantrui abmiažoŭvaŭ dostup zamiežnikaŭ u basiejn, spasyłajučysia na ryzyku zaražeńnia pry ciesnym kantakcie miascovych žycharoŭ z turystami z Francyi.
Ciapier ža meta — zabieśpiačeńnie biaśpieki ŭsich naviedvalnikaŭ i padtrymka spakojnaj, pavažlivaj atmaśfiery. Abmiežavańni buduć dziejničać da 31 žniŭnia.
Ciapier čytajuć
Na vajnie va Ukrainie zahinuŭ były dyrektar dvuch aršanskich zavodaŭ4
Kamientary