Napadniku na Łatušku prysudzili 1400 jeŭra štrafu i departacyju
Historyk Jaŭhien Kazancaŭ viartajecca ŭ Biełaruś.
Historyku Jaŭhienu Kazancavu, jaki napaŭ na Paŭła Łatušku ŭ Varšavie, prysudzili štraf u pamiery 6000 złotych (bolš za 1400 jeŭra) i departacyju, paviedamlaje Reform.news.
Nahadajem, prakuratura Varšavy rasśledavała napad na palityka Paŭła Łatušku. Incydent adbyŭsia 2 lipienia 2025 hoda padčas lekcyi z nahody 35-hodździa Uschodniejeŭrapiejskaha instytuta pry Varšaŭskim univiersitecie.
Pa dadzienych prakuratury, padčas publičnaha vystupu ŭ Paŭła Łatušku byŭ kinuty śmiećcievy bak ź źmieścivam. Akramia taho, napadnik vykrykvaŭ u adras palityka abraźlivyja słovy: «zdradnik», «hańba», «zabojca», śćviardžajučy, što Łatuška nibyta «chacieŭ spalić usiu apazicyju».
Vinavatym u incydencie akazaŭsia hramadzianin Biełarusi, student Varšaŭskaha ŭniviersiteta pa imieni Jaŭhien Kazancaŭ. Jak vyznačyła śledstva, jaho dziejańni kvalifikavanyja pa dvuch artykułach Kryminalnaha kodeksa Polščy — paklop (art. 212 §1) i zamach na niedatykalnaść asoby (art. 217 §1), paviedamlaje pres-słužba akruhovaj prakuratury Varšavy.
Užo na nastupny dzień, 3 lipienia, maładomu čałavieku byli aficyjna pradjaŭleny abvinavačvańni. Na dopycie ŭ jakaści padazravanaha jon pryznaŭ svaju vinu, raskajaŭsia i patłumačyŭ, što dziejničaŭ u stanie afiektu. Pavodle jaho słoŭ, učynak byŭ nieabdumanym. Kazancaŭ taksama prynios publičnyja prabačeńni za toje, što zdaryłasia.
Padazravany dobraachvotna pahadziŭsia na pryznačanaje pakarańnie — štraf u pamiery 150 dzionnych stavak pa 40 złotych kožnaja, a taksama apłatu sudovych vydatkaŭ.
Akramia kryminalnaha pieraśledu, prakuratura pryniała rašeńnie ab departacyi studenta. U adpaviednaści z zakonam ab zamiežnikach, u dačynieńni da Kazancava padadzieny aficyjny zapyt u Varšaŭskuju Pamiežnuju słužbu ab prymusovym viartańni jaho na radzimu.
Jak adznačyŭ pres-sakratar Akruhovaj prakuratury Varšavy, prakuror Piotr Antonij Skiba, sprava nabyła dziaržaŭnaje značeńnie z-za charaktaru i miesca ździajśnieńnia złačynstva. Parušeńnie adbyłosia ŭ publičnym univiersitecie padčas aficyjnaha mierapryjemstva, što pahoršyła acenku dziejańniaŭ napadnika.
Adrazu paśla napadu Kazancaŭ raspavioŭ žurnalistu Reform.news pra svaje matyvy. Mužčyna pryznaŭsia, što ŭ jaho skončyłasia viza, što «vyhareŭ» i nie zmoh abaranić navukovuju pracu. Pavodle jaho viersii, napad na Łatušku dazvolić jamu svabodna viarnucca ŭ Biełaruś.
Vyklikajuć niedavier słovy Kazancava ab «nieabdumanaści» ŭčynku. Za niekalki dzion da incydentu, 29 červienia, jon pasprabavaŭ sarvać vystupleńnie jašče adnaho biełaruskaha palityka Zianona Paźniaka. U toj raz Kazancaŭ vykryknuŭ «Hańba!» i tut ža źbieh.
Kamientary
Dziŭna. I čamu heta ŭ JEZ niama abmienaha fondu łukašystaŭ, kab mianiać ich na palitviaźniaŭ, na taho ž Pačobuta? Zabojcu šakutu, jakoha začymści adpuściła Małdova, možna było b na šmat kaho abmianiać. Mo heta z-za taho, što ich adpuskajuć a nie aryštoŭvajuć? - Nu nie. Heta zanadta prostaje tłumačeńnie. Treba sabrać paru admysłovych samitaŭ dy abmiarkavać prablemu paru hadoŭ, potym sfarmavać kamisiju - mo tady i atrymajecca daviedacca sapraŭdnuju pryčynu... ale ž usioj praŭdy my nikoli nie daviedajemsia...
Išoŭ piaty hod akupacyi Biełarusi i 11-y vyjny va Ŭkrainie.