Tramp: Padumaju nad tym, kab departavać Maska z ZŠA. I nackuju na jaho DOGE
Prezident ZŠA Donald Tramp zajaviŭ, što hatovy razhledzieć mahčymaść departacyi svajho byłoha sajuźnika ŭ Paŭdniovuju Afryku.
Tramp adkazaŭ na pytańnie, ci płanuje jon departavać z ZŠA miljardera Iłana Maska.
Prezident ZŠA skazaŭ, što moža razhledzieć takuju mahčymaść. Bolš za toje, jon pahražaje nackavać na Maska jahonuju byłuju strukturu — Departamient pa ŭradavaj efiektyŭnaści, piša USA Today.
«Moža, nam daviadziecca nackavać na Iłana DOGE. Vy viedajecie, što takoje DOGE? DOGE — heta monstr, jakomu, mahčyma, daviadziecca viarnucca i źjeści Iłana. Chiba heta nie było b žachliva? Jon atrymlivaje šmat subsidyj», — zajaviŭ Tramp.
Mask sistematyčna krytykuje padatkovy zakonaprajekt Trampa, jaki pastupiŭ u Sienat. Biznesmienu nie padabajecca, što dakumient praduhledžvaje rost dziarždoŭhu. Miljarder pahražaje, što na prajmieryz pierad pramiežkavymi vybarami budzie finansavać praciŭnikaŭ tych kanhresmienaŭ ad Respublikanskaj partyi, jakija prahałasujuć za zakonaprajekt. Bolš za toje, Mask pahražaje stvaryć svaju partyju.
Tramp śćviardžaje, što sapraŭdnaja pryčyna niezadavolenaści Maska ŭ tym, što zakonaprajekt likviduje prahramu byłoha prezidenta Džo Bajdena, jakaja praduhledžvaje padatkovyja lhoty dla pakupnikoŭ elektramabilaŭ.
Novaja słoŭnaja pierapałka adbyłasia ŭsiaho praz dva tydni paśla taho, jak Mask zrabiŭ kroki da prymireńnia z prezidentam — uklučajučy asabistyja prabačeńni za abrazy, vykazanyja im paśla skandalnaha sychodu z administracyi Trampa ŭ červieni.
Mask naradziŭsia ŭ PAR. U 2002 hodzie jon staŭ hramadzianinam ZŠA, papiarednie atrymaŭšy hramadzianstva Kanady pa matčynaj linii. Da hetaha ŭ jaho była studenckaja viza ŭ ZŠA, a paśla pracoŭnaja viza.
Pamiatajecie vypusknika instytuta FSB, jaki raskatvaŭ pa Hrodnie sa ściaham Navarosii? Ciapier jon staŭ varšaŭskim biznesmienam29
Kamientary