«Dudzia hladzieŭ? A Dudź — špijon». Biełarusy raskazali, jak ciapier prachodziać pravierki telefonaŭ i apytańni na miažy
Pry viartańni ŭ krainu biełarusaŭ i inšaziemcaŭ praciahvajuć ideałahična praviarać na miažy. «Miedyjazona» manitoryć čaty pa pierasiačeńni miažy i raskazvaje pra toje, jak takija pravierki prachodzili miesiac tamu.
«Zrabili skrynšot ekrana, i ŭ ich vyśviacilisia štrych-kody»
Jak pišuć karystalniki, padstavaj dla dadatkovaj pravierki pry viartańni ŭ Biełaruś moža stać doŭhaja adsutnaść u krainie, ukrainski pašpart, znachodžańnie čałavieka ŭ bazie «BIESparadki» — praz «administracyjku» pavodle pratesnych artykułaŭ.
Adna z udzielnic čata raskazała, što žyvie za miažoj bolš za 20 hadoŭ, niekalki hadoŭ nie pryjazdžała ŭ Biełaruś. Na miažy jana trapiła na pravierku.
«Razmova prajšła chutka: adviali ŭbok i zadali niekalki pytańniaŭ. Čamu tak doŭha nie pryjazdžała, dzie była i hetak dalej. Ja žyvu ŭ ES i pryjazdžaju redka. Telefon hladzieli, ale sacsietki nie praviarali. Adkryli dadatak z telefonnaj knihaj, niejkim aparatam zrabili niešta kštałtu skrynšota majho ekrana telefona i ŭ ich vyśviecilisia štrych-kody. Paśla hetaha spytali, u jakich sacsietkach ja zarehistravanaja. Ja adkazała, što ŭ inście, telehramie, jutubie. Sama prapanavała pahladzieć, kali cikava. Supracoŭnik, jaki sa mnoj kamunikavaŭ, hladzieć nie staŭ, addaŭ telefon. Kamunikacyja zaniała nie bolš za 3 chviliny».
Miarkujučy pa paviedamleńniach u čatach, pytańni mohuć uźniknuć z-za svajakoŭ za miažoj abo «padazronych» siabroŭ u sacyjalnych sietkach.
«U siabroŭki pravieryli telefon, spytalisia pra syna (adrazu pa numary vyznačyli, što ŭ Amierycy). Ton hutarki byŭ zadzirlivy».
«U ideale vyjści z «padazronych» hrup, vydalić ź siabroŭ ludziej, jakija «suprać» [ułady]. U mianie ŭziali telefon i ja bačyŭ, što hladzieli kantakty, fatahrafii, vajbier, vatsap, UKantakcie. U chłopca z aŭtobusa znajšli niejkuju pierapisku za 2020 hod i dali «daviedku», kab jon pa pryjeździe dadomu kudyści schadziŭ. Cikavilisia, dzie žyvu ŭ Polščy, kim i dzie pracuju», — dzielicca dośviedam adzin z udzielnikaŭ čataŭ.
«Dudzia hladzieŭ? A Dudź — špijon»
Pry praviercy telefonaŭ siłavikoŭ, siarod inšaha, cikaviać łajki i padpiski ŭ sacyjalnych sietkach. «Ekstremiscki» łajk — nahoda vyklikać narad milicyi i adpravić vas u RAUS «raźbiracca». Dalej moža być źmiaščeńnie ŭ IČU, sud, sutki i štraf.
U śpisie «ekstremisckich» materyjałaŭ tysiačy pazicyj, tamu niešta łajknuć, nie nadaŭšy hetamu značeńnia, lohka. Ludzi rajać staranna rychtavacca da pravierak.
«Rychtujcie svaje telefony na pravierku. Usie vašyja łajki ŭ sacsietkach buduć praanalizavanyja».
«100 razoŭ usio pierahledźcie — praviarajuć sacsietki, łajki. Ja čuła, navat vydalenyja».
«Za łajk možna ŭ izalatar zahrymieć. Vy možacie być i nie ŭ kursie, što łajknuli kahości try hady tamu, a jon ciapier ekstremist. I ŭsio, pajedziecie na sutki. Heta realnyja vypadki i nie adzin. Dudzia hladzieŭ? A Dudź — špijon. U vyniku jakraz da viačery z makaronaj paśpiavajecie».
«Prybiarycie ŭkrainskija sajty i numary telefonaŭ»
Asablivuju ŭvahu nadajuć ukraincam — pry ŭjeździe ŭ Biełaruś ich dakładna vykličuć na razmovu, pra heta taksama pišuć u čatach ab pierasiačeńni miažy. «Čakajem ukraincaŭ» — častaje paviedamleńnie tam.
Ludzi z ukrainskim pašpartami raskazvajuć pra svoj vopyt prachodžańnia pravierak:
«Prybiarycie ŭsie ŭkrainskija sajty i numary telefonaŭ. Prybiarycie fota ź simvolikaj, kab ničoha nie było pra padziei siońniašnija. Pytajucca ŭsio. Pra dziaciej mohuć spytać, dzie pracujuć, słužać. Lepš kazać praŭdu — u ich usio jość. Kali vy jedziecie ŭ Rasiju, u vas pavinien być kvitok na samalot da Šaramiećcieva, inakš vas nie prapuściać, kali niama rasijskaha pašparta (druhoha)».
Karystalniki ŭ čatach, byvaje, spračajucca pra pravierki — pra toje, što siłaviki mohuć «padkinuć» vam padpisku.
«Pry praviercy telefona chutka i niezaŭvažna padpisać vas na jaki-niebudź haŭnakanał nie składaje ciažkaści. Ale heta budzie vyhladać podleńka. Heta małavierahodna, ale kali čałaviek mroić pra čarhovuju zoračku na pahonach…»
«Usie inšaziemcy prachodziać pravierku z supracoŭnikam KDB: telefon całkam — sacsietki, halereja, łajki, padpiski, kantakty — daskanała. I niama takoha paniaćcia «supakoilisia». Heta (ich) praca».
Ci praŭda, što ŭzmacnilisia pravierki na biełaruskaj miažy? Što viadoma
U bazie siłavikoŭ «BIESparadki» bolš za 100 tysiač čałaviek
Kiroŭcy aŭtobusaŭ časta admaŭlajucca vieźci ŭ Biełaruś ukraincaŭ. Ci zakonna heta?
Praściej źlatać u Aziju: biełaruska raspaviała, jak dabirałasia z Hrodna ŭ Biełastok
«Adzin hladzieŭ telefon, druhi razmaŭlaŭ, a treci ŭ baku naziraŭ». Jak ciapier pravodziać dopyty na miažy Biełarusi ź ES
Ciapier čytajuć
U Cierciela prahučaŭ novy akcent: «razradka ŭ cełym toj napružanaści» ŭ adnosinach z Polščaj i Bałtyjaj13
Kamientary
Za tielefon i był takov.