Kitajskija aŭtamabili-hibrydy mocna apramieńvajuć karystalnikaŭ

Hibrydnyja i elektryčnyja aŭtamabili ŭpeŭniena zavajoŭvajuć darohi śvietu. Ich ličać transpartam budučyni — ekałahičnym i cichim. Adnak za bliskučym fasadam inavacyj chavajecca pytańnie, jakoje ŭsio čaściej turbuje navukoŭcaŭ i ŭładalnikaŭ: ci biaśpiečnyja hetyja aŭto dla našaha zdaroŭja? Havorka idzie pra elektramahnitnaje vypramieńvańnie, uzrovień jakoha ŭ sučasnych mašynach moža značna pieravyšać biaśpiečnyja normy.

U aŭtamabilach z ruchavikom unutranaha zharańnia asnoŭnymi krynicami elektramahnitnaha vypramieńvańnia źjaŭlajucca hienieratar, sistema zapalvańnia (śviečki, raźmierkavalnik), elektronika i inšaje elektraabstalavańnie. Ich praca zvyčajna maje impulsny charaktar i zaležyć ad cykłu ruchavika.

U hibrydnych aŭtamabilach hałoŭnymi krynicami elektramahnitnych paloŭ źjaŭlajucca ciahavy elektraruchavik, lityj-ijonnyja akumulatary, inviertary i zaradnyja pryłady. Pa siłavych kabielach mohuć prachodzić toki ŭ sotni ampier, što stvaraje bolš intensiŭnyja pali, čym u bolšaści aŭto z ruchavikom unutranaha zharańnia.

Prablema elektramahnitnaha vypramieńvańnia ŭ aŭtamabilach nie navina. Jašče ŭ 2002 hodzie adzin sa šviedskich časopisaŭ pravioŭ ekśpiertyzu i vyjaviŭ niečakana vysoki ŭzrovień elektramahnitnaha vypramieńvańnia navat u zvyčajnych bienzinavych aŭto.

Z rostam papularnaści hibrydnych aŭto niekatoryja kiroŭcy pačali skardzicca na niezvyčajnyja simptomy: hałaŭny bol, pavyšany cisk, sanlivaść za rulom. Samyja dapytlivyja nabyvali detektary mahnitnych paloŭ i z žacham bačyli, što ličby na pryborach zaškalvajuć.

U 2023 hodzie ŭkrainskija vučonyja z Charkaŭskaha nacyjanalnaha aŭtamabilna-darožnaha ŭniviersiteta na asnovie zamieraŭ vybudavali svojeasablivy «rejtynh niebiaśpieki». Uzrovień vypramieńvańnia ŭ elektramabili akazaŭsia ŭdvaja vyšejšym, čym u zvyčajnym aŭto z ruchavikom unutranaha zharańnia.

Adnak «čempijonam» staŭ hibryd: u im pole akazałasia jašče macniejšym, čym u čystym elektrakary. Bolš za toje, dla hibrydaŭ była vyjaŭlena pramaja zaležnaść: čym chutčej jedzieš, tym macniejšaje vypramieńvańnie.

Ciapier ža vučonyja ź Piermskaha nacyjanalnaha daśledčaha politechničnaha ŭniviersiteta ŭ Rasii vyrašyli pravieryć infarmacyju karystalnikaŭ ab šmatrazovym pieravyšeńni značeńnia elektramahnitnaha pola ŭ hibrydnych aŭtamabilach kitajskaj marki LiXiang.

Jany praviali ekśpierymient, padčas jakoha zamierali elektryčnyja i mahnitnyja pali, što ŭźnikajuć u kitajskim aŭtamabili LiXiang Li 9 padčas razhonu, tarmažeńnia i stajanki. Svaimi vynikami jany padzialilisia na staronkach časopisa «Transpart. Transpartnyja zbudavańni. Ekałohija».

Pavodle vynikaŭ, maksimalnyja pakazčyki byli zafiksavanyja pry razhonie: napružanaść elektryčnaha pola dasiahała 200 V/m — heta ŭ vosiem razoŭ vyšej za biaśpiečnuju normu.

Pry tarmažeńni fiksavalisia značeńni 50—100 V/m, a ŭ stanie spakoju — 0—10 V/m. Pa normach SanPiN maksimalna dapuščalnym ličycca elektryčnaje pole 25—40 V/m; pakazčyki 100—200 V/m śviedčać pra niehatyŭny ŭpłyŭ, a 200 V/m i bolš pryznajucca niebiaśpiečnymi dla zdaroŭja.

Na dumku daśledčykaŭ, pry praciahłym uździejańni elektramahnitnych paloŭ mahčymy nazapašvalny efiekt, što pavyšaje ryzyku nieŭrałahičnych parušeńniaŭ, depresii, a taksama ankałahičnych zachvorvańniaŭ.

Aŭtary adznačajuć, dla źmianšeńnia vypramieńvańnia vytvorcam nieabchodna vykarystać dadatkovyja miery biaśpieki. Mahčymyja rašeńni — vykarystoŭvać śpiecyjalnyja ekranavanyja materyjały, stavić novyja filtry pieraškod i aptymizoŭvać dyzajn elektroniki.

Zahadzia vyjavić i likvidavać niebiaśpiečnyja zony jašče na stadyi prajektavańnia, pavodle mierkavańnia vučonych, moža dapamahčy kampjutarnaje madelavańnie.

• 5
• 1
• 1
• 2
• 5
• 1
• 0
• 0