Arhanizacyja pa biaśpiecy i supracoŭnictvie ŭ Jeŭropie (ABSIE) abviaściła, što «Minskaja hrupa» i źviazanyja ź joj struktury buduć zakrytyja da 1 śniežnia 2025 hoda. Heta rašeńnie stała vynikam sumiesnaha zvarotu Armienii i Azierbajdžana paśla padpisańnia dekłaracyi ab poŭnym spynieńni bajavych dziejańniaŭ pamiž hetymi krainami. Za likvidacyju hrupy prahałasavali ŭsie 57 dziaržaŭ — udzielnic ABSIE, piša «Radyjo Svaboda».
Dekłaracyi ab poŭnym spynieńni bajavych dziejańniaŭ była padpisanaja 8 žniŭnia 2025 hoda ŭ Vašynhtonie premjer-ministram Armienii Nikołam Pašynianam i prezidentam Azierbajdžana Ilchamam Alijevym pry pasiarednictvie prezidenta ZŠA Donalda Trampa. Heta stała padstavaj dla rašeńnia ab zakryćci «Minskaj hrupy».
Hrupa była stvorana ŭ 1992 hodzie dla sadziejničańnia mirnamu vyrašeńniu kanfliktu pamiž Armienijaj i Azierbajdžanam u Nahornym Karabachu. Za bolš čym 30 hadoŭ jana vystupała pasiarednikam u pieramovach, choć zapłanavanaja kanfierencyja ŭ Minsku tak i nie adbyłasia. Sustaršyniami hrupy byli Francyja, Rasija i ZŠA, a ŭ skład uvachodzili taksama Biełaruś, Finlandyja, Hiermanija, Italija, Šviecyja, Turcyja, Armienija i Azierbajdžan.
Efiektyŭnaść «Minskaj hrupy» z časam źnižałasia, a paśla vajny ŭ Nahornym Karabachu ŭ 2020 hodzie Azierbajdžan staŭ ličyć, što kanflikt vyrašany, i vystupaŭ za zakryćcio hrupy. Ministerstva zamiežnych spraŭ Azierbajdžana nazvała rašeńnie ab zakryćci «pakazčykam pryznańnia mižnarodnaj realnaści i adnaŭleńnia terytaryjalnaj cełasnaści krainy». Publikacyi zajavy MZS Armienii pakul nie było.
Kanflikt u Nahornym Karabachu pačaŭsia ŭ kancy 1980-ch hadoŭ z terytaryjalnych i etničnych sprečak pamiž Armienijaj i Azierbajdžanam i pryvioŭ da vajennych sutyknieńniaŭ. Pavodle roznych acenak, u kanflikcie zahinuła bolš za 30 tysiač čałaviek. Paśla pierachodu terytoryj pad kantrol Azierbajdžana ŭ 2023 hodzie amal usie armianie pakinuli hety rehijon.
Kamientary