Za apošnija 10 hadoŭ hadavy abjom zdabyčy nafty ŭ Biełarusi vyras z 1,65 da 2 miljonaŭ ton, paviedamiŭ u intervju časopisu «Ekonomika Biełarusi» staršynia kancerna «Biełnaftachim» Illa Ikan.
«Techničnaje pieraŭzbrajeńnie dazvoliła naraścić abjomy bureńnia ŭ 2,4 razy (z 117 tysiač mietraŭ da 285 tysiač mietraŭ), u tym liku davieści dolu haryzantalnaha bureńnia z 0,5 da 19,5%, a taksama ŭ 2 razy pavialičyć kolkaść śvidravin, jakija ŭvodziacca štohod, z 35 da 70 u hod», — zajaviŭ Illa Ikan.
Pavodle słoŭ kiraŭnika kancerna, biełaruskija naftavyja radoviščy znachodziacca na zaviaršalnym, čaćviortym etapie raspracoŭki, tamu dla dalejšaha pavieličeńnia abjomaŭ zdabyčy nieabchodna ŭkaraniać inavacyjnyja technałohii, jakija dazvalajuć raspracoŭvać ciažkazdabyvalnyja zapasy nafty.
Dziakujučy novym technałohijam siońnia ŭ Biełarusi paśpiachova zdabyvajecca nafta tam, dzie raniej heta było niemahčyma abo niavyhadna. Zdabyča ź ciažkazdabyvalnych zapasaŭ značna vyrasła: z 750 tysiač ton u 2019 hodzie da 987 tysiač ton ciapier, što składaje 49% ad ahulnaha abjomu zdabyčy.
Asnoŭny pryrost zabiaśpiečvajecca za košt daraźviedki i bolš intensiŭnaj pracy na ŭžo viadomych radoviščach, pakolki vierahodnaść znachodžańnia bujnych novych radoviščaŭ u Biełarusi nievialikaja z pryčyny jaje hieałahičnaj vyvučanaści.
Łukašenka: My hatovyja zaklučyć vialikuju ździełku z ZŠA70
Kamientary