«Pad zapis na kamieru zadavali pytańni, skaniravali telefon, pierapisku». Jak ciapier prachodziać dopyty na miažy Biełarusi
Štodnia ŭ punktach propusku na miažy Biełarusi ź Jeŭrasajuzam siłaviki praviarajuć telefony, pravodziać dopyty i zatrymańni. BGmedia vyvučyła, što apošnimi dniami pisali ŭ pryhraničnych telehram-čatach.
Na miažy dapytvajuć studentaŭ
Biełarus, jaki vučycca na mastaka ŭ Jeŭropie, raskazaŭ, jak dapytvali ludziej na vyjeździe ź Biełarusi ŭ Litvu 1 kastryčnika:
«U punkcie propusku RB častku pasažyraŭ vyvodzili ŭ kanfierenc-zału i zadavali ŭsialakija pytańni.
Chto, adkul, kudy i ź jakoj metaj. Čamu ŭ Polšču praź Litvu i da t. p. U asnoŭnym brali studentaŭ i chłopcaŭ takoha ŭzrostu.
U cełym usio prajšło dobra i nikoha nie źniali.
Nas na rejsie jedzie try mastaki — usich vyciahnuli na hetuju hutarku.
Pytalisia pra karciny, pra śpiecyjalnaść, pra siamju, čamu ŭ RB nie pastupili. Adnu ź dziaŭčat navat spytali pra chłopca… Pry samim zajeździe pytalisia pra dekłaravańnie hrošaj.
U Litvie chucieńka spačatku [pravieryli] pašparty, standartnyja pytańni chto, kudy i navošta, a zatym rečy na stužku. Detalova nie razhladali, pytańniaŭ bolš nie zadavali».
U pryhraničnych čatach pišuć, što na hutarki adpraŭlajuć «revalucyjanieraŭ», tych, chto trapiŭ u bazu, tych, chto daŭno nie byŭ u Biełarusi:
«30 vieraśnia ŭ 09.00 vyjezd ź Vilniusa. U 13.00 vyjechali ź miažy RB. Na RB skanier usich rečaŭ. Revalucyjaniery i ŭkraincy — na dopyt, jak zvyčajna».
«RP — RB, 02.10.25. U 21.53 prajšli pašpartny kantrol, čakajem astatnich z hutarki.
Tych, chto nie byŭ u RB bolš za hod, tych, chto ŭ bazie, ukraincaŭ.
U 01.15 na vyjezd».
U asnoŭnym udzielniki čataŭ biez padrabiaznaściej raskazvajuć pra dopyty na miažy. Viadoma, što padčas ich siłaviki patrabujuć razbłakavać telefon. A ŭ tych, kaho vyklikali na «hutarku», potym skrupulozna praviarajuć asabistyja rečy. I sami dopyty zajmajuć šmat času.
«RP — RB, 2 kastryčnika. Pryjechali na miažu ŭ 15.00, było 0 aŭtobusaŭ, litaralna za hadzinu prajšli palakaŭ i zajechali adrazu da biełarusaŭ. Ciapier vyjazdžajem, doŭha čakali ludziej z dopytaŭ».
«U 07.55 2 kastryčnika adpravilisia ad aŭtavakzała Vilniusa. Z 09.20 da 10.15 byŭ pašpartny kantrol u biełaruskim punkcie propusku. 2 čałavieki z aŭtobusa byli na hutarcy. U 12.05 pryjechali na vakzał u Minsku».
«RP — RB, 3 kastryčnika. U 08.30 vyjezd z Varšavy. Ciapier prajšli biełarusaŭ, čakajem ludziej z razmoŭ».
«RP — RB, 4 kastryčnika. Zatrymki z boku biełarusaŭ, tamu što praviarajuć unikliva ŭručnuju bahaž ludziej paśla hutarak. Praviaraje tolki adzin čałaviek. Pierad nami tak praviarali hadzinu prykładna 15—20 čałaviek».
«RP — RB, 6 kastryčnika. U 02.58 zajechali da palakaŭ, u 04.40 prajšli pašpartny, u 05.45 prajšli pašpartny RB, potym hadzinu čakali ludziej z hutarak. Vyjechali ź miažy ŭ 06.50».
«RP — RB, 6 kastryčnika. Nočču sama miaža da 50 chvilin.
Palaki ŭdakładniali pra padazronych ludziej kala miažy i štości pra rasklejenyja płakaty, biełarusy znoŭ prasili pakazać telefon».
Zamiežniki padrabiazna raskazvajuć pra dopyty na miažy Biełarusi
Hramadzianie Ukrainy i Rasii nie saromiejucca raskazvać pra dopyty na miažy Biełarusi. Asabliva kali dapytvali ich svajakoŭ.
Mužčyna padzialiŭsia padrabiaznaściami dopytu, jaki ŭčynili jaho mamie ŭnačy 6 kastryčnika ŭ punkcie propusku «Brest»:
«Varšava — Brest. Mama vyjechała 5 kastryčnika ŭ 23.50 pa polskim časie. Na polskim baku aŭtobusaŭ u čarzie nie było, adrazu zajechali. U 6 ranicy pa biełaruskim časie polskuju miažu prajšli, u 7 hadzin biełaruskuju prajšli.
Na polskim baku pravierka dakumientaŭ prajšła chutka, hutarka lohkaja. Na biełaruskaj pad zapis na kamieru zadavali pytańni, skaniravali telefon, pierapisku. Było šmat pytańniaŭ, chacieli padrabiazna viedać, što rabiła va Ukrainie, u kaho žyła, ci mieła znosiny sa śpiecsłužbami.
Mama była ŭ małodšaj dački ŭsie paŭtara miesiaca, što čakała novy zamiežny pašpart, rabiła ramont. Pra novy zamiežny pašpart nie skazała, kab nie było niečakanych raspytvańniaŭ. Jechała pa starym zamiežnym pašparcie, terminy jašče dazvalajuć. Udakładniali, ci nie zamužam dačka. Heta značyć, cikavić tolki tema stasunkaŭ z vajskoŭcami, ci maje chtości ŭ siamji dačynieńnie da vajskoŭcaŭ.
Zvyčajna mama jeździć da syna ŭ Čechiju, i, kali viartajecca ź Jeŭropy, cikavaść biełarusaŭ značna mienšaja, čym kali viartałasia z Ukrainy».
3 kastryčnika ŭ Biełaruś nie puścili hramadzianku Ukrainy. Joj pastavili ŭ pašpart štamp «ujezd zabaronieny». Pra heta ŭ pryhraničnym čacie raskazaŭ jaje znajomy:
«Dobry viečar, siońnia znajomuju ŭ Breście nie prapuścili, ukrainskija dakumienty, nie zmahła dakazać, što jedzie da mamy, prasili fota maminaha pašparta. Uvohule, raźviarnuli, u pašpart pastavili zabaronu ŭjezdu i datu siońniašniuju. Ci jość sens sprabavać jašče raz i, kali jość sens, to praź jaki čas? Moža chto sutykaŭsia?»
Mužčynu patłumačyli, što jaho znajomaja moža znoŭ pasprabavać zajechać u Biełaruś, ale joj treba padrychtavacca, kab jana prajšła pravierku supracoŭnikaŭ KDB:
«Kali tam tolki data siońniašniaha dnia i niama terminaŭ, to zaŭtra znoŭ možna budzie sprabavać».
Viaduć hutarki na miažy Biełarusi i z hramadzianami Rasii:
«1 kastryčnika ŭ 12:00 vyjezd z Łatvii, čarhi nie było, pad naviesam 1 aŭto, tam chvilin 20. Potym Biełaruś: rečy na skanier, 3 čamadany + para sumak + hutarka biez pratakoła ź biaśpiečnikam [supracoŭnikam KDB]. Usiaho ŭ 13.10 vyjezd ad biełarusaŭ. U mianie DNŽ Ispanii i pašpart RF».
Čaściej za ŭsio ŭ pryhraničnych čatach pišuć pra dopyty hramadzian Ukrainy na ŭjeździe ŭ Biełaruś. Pryčym mytniki praviarajuć ich rečy ŭručnuju, tady jak biełarusaŭ — praz stužku i skanier.
«Praha — Minsk, 1 kastryčnika. U 06.00 zajechali da biełarusaŭ. U 11.00 vyjechali na Brest. 7—8 hramadzian Ukrainy, čakali z hutarki».
«RP — RB, 4 kastryčnika. U 20.50 zapuścili na punkt propusku ŭ RB. U 21.25 prajšli pašpartny. U 21.50 pačali prachodzić mytny, usich ukraincaŭ praviarali ŭručnuju, astatnich na stužku, adzin čałaviek praviaraŭ. U 23.00 vyjechali ŭ Brest».
«RP — RB, 6 kastryčnika. U 03.30 pravierka pašpartoŭ u aŭtobusie ŭ RB. U 04.30 pašpartny kantrol i mytnia (sabaka + ručny dahlad, častkova praz skanier). U 05.05 sieli ŭ aŭtobus i čakajem ukraincaŭ. U 05.37 pajechali ŭ Brest».
(Arfahrafija i punktuacyja paviedamleńniaŭ vypraŭleny sa źmiestam, a niekatoryja ź ich skaročany).
Kamientary
A ŭ kahości svoj dom kala Viazanki, siabry jakich viedaješ ź dziacinstva, baćki, i prostyja svaje radaści.