Hirkin: Vajna na źniasileńnie źniasiliła samu Rasiju, budzie revalucyja

Pravał «stratehii na vymotvańnie»

Źniavoleny pałkoŭnik FSB Ihar Hirkin (Strałkoŭ) pačaŭ svoj novy list z kałonii z analizu vajennaj stratehii, jakuju ŭziało na ŭzbrajeńnie Ministerstva abarony RF paśla miaciažu Pryhožyna. Jon apisvaje jaje źjedliva i prosta:

«Znajšli recept pieramohi: «Biarom šmat hrošaj, kuplajem šmat miasa, a potym tupa zakidvajem hetym miasam chachłoŭ! U nas miasa bolš, rana ci pozna chachły nie vytrymajuć i złamajucca!». Nazvali hetuju kretyničnuju stratehiju «vajnoj na źniasileńnie» (…) i abviaścili jaje «adzina pravilnaj». I «pajšła krucicca miasarubka», — hetym razam nie «Vierdenskaja» (jak u 1916-m), a «Danieckaja».

Adnak, pa słovach Hirkina, praz dva hady takoj taktyki vyniki akazalisia katastrafičnymi dla samoj Rasii. Jon pieraličvaje prablemy, jakija stali vidavočnymi: «Vyśvietliłasia, što: a) hrošy kančajucca; b) «miasa» taksama; v) vorah znajšoŭ sposaby i taktyku baraćby z «miasam», «raźmieńvajučy» absalutna niesuvymierna małyja ŭčastki miascovaści na niesuvymierna vialikija abjomy «miasa», jakoje šturmuje ich «u łob»».

U vyniku, śćviardžaje Hirkin, Rasija apynułasia dalej ad pieramohi, čym była ŭ pačatku ŭvarvańnia:

«U vyniku my za dva minułyja hady ŭziali šturmam sotni «chatak leśnika» (vykarystoŭvajučy viadomy miem časoŭ Pieršaj suśvietnaj), dali dziasiatki «bitvaŭ na r. Izonca» (adtul ža), zahubili reštki kadravaha vojska i bolšuju častku tych, kaho mabilizavali ŭ 2022-m, a taksama dobraachvotnikaŭ — i… stali značna dalej ad pieramohi nad voraham, čym byli».

Jon padkreślivaje, što Ukraina za hety čas nie tolki nie sasłabieła, ale i značna ŭzmacniłasia:

«Za 2 hady VORAH STAŬ MACNIEJŠY. Nie kolkasna chiba što (USU taksama niasuć vialikija straty). Ale technična i arhanizacyjna — całkam dakładna. Dva hady tamu ŭkraincy fizična niazdolnyja byli nanosić udary pa našaj ekanomicy i resursach za miežami pryfrantavych rehijonaŭ. Ciapier — heta zvyčajnaja reč, — zvyčajnaja štodzionnaść! Da Urała ŭklučna!

Vorah vielmi ćviordy i adčuvaje najmahutnuju vajenna-techničnuju i ekanamičnuju (i sacyjalnuju taksama!) padtrymku ŭsiaho NATA. Złamać jaho, uziaŭšy jašče niekalki sotniaŭ ničoha nie vartych (paśla tatalnaha razbureńnia) «chacinak miaśnika» (chaj sabie jany choć z Časaŭ Jar pamieram) — niemahčyma».

«Prablema ŭ kiraŭnictvie, jakoje nie zdolnaje da dziejańniaŭ»

Na dumku Hirkina, «niezamiennyja pravadyry» Rasii — tak jon nazyvaje koła Uładzimira Pucina — nie zdolnyja «ni ryzykavać, ni (tym bolš!) achviaravać. «Achviaravać» dla ich pavinna kraina i narody, jakija jaje nasialajuć».

Pavialičyć

Jak davodzić Hirkin, vyšejšaje kiraŭnictva Rasii baicca lubych rašučych dziejańniaŭ, bo jany pahražajuć jaho stabilnaści.

Hirkin śćviardžaje, što hałoŭnaja zadača ciapierašniaj ułady Rasii — samazachavańnie, a nie dasiahnieńnie pieramohi. Lubyja źmieny ŭsprymajucca jak pahroza.

«Firmovy styl jaho kiravańnia — «puskać usio na samaciok», a potym luby vynik «abjaŭlać dasiahnutaj metaj». Hałoŭnaja zadača — zachavańnie ŭłady dla siabie i dla hrupy paplečnikaŭ (…) Tak vyjšła, što luboje «aktyŭnaje dziejańnie» ŭ biahučaj vostra-kryzisnaj situacyi niaźmienna pryvodzić tolki da paharšeńnia stanovišča i, takim čynam, da rostu pahroz dla ŭłady».

Jon apisvaje kirujučuju elitu jak sastarełuju i niazdolnuju da ryzyki hrupu, dla jakoj stabilnaść važniej za efiektyŭnaść: «Stryžań [ułady] mocna pastareŭ i navat, miescami, struchnieŭ. Kožny rezki ruch vyklikaje vostry dyskamfort, a «statyčny spakoj» — adčuvańnie biaśpieki i stabilnaści».

Prahnoz Hirkina: nijakich źmien i niepaźbiežnaja revalucyja

Zychodziačy z hetaha, Hirkin robić vysnovu, što ŭłada nie budzie ničoha mianiać i praciahnie dziejničać pa staroj schiemie da poŭnaha vyčarpańnia resursaŭ.

«Praciahnuć «źbirać miasa za hrošy», pakul dla hetaha jość jašče choć najmienšyja mahčymaści. Pry hetym nikoha i ničoha ŭ «raschodavańni hetaha miasa» taksama mianiać nie buduć: adnojčy zapuščanaja, «mašyna pieramołvańnia» spynicca tolki paśla poŭnaha vyčarpańnia resursaŭ, jakija jaje siłkujuć».

Kali resursy skončacca, ułada, na jaho dumku, pasprabuje pravieści «ź dzikim spaźnieńniem» mabilizacyju, kab praciahnuć pracu «miasarubki».

Adzinym vychadam dla zachavańnia krainy Hirkin bačyć «revalucyju źvierchu», ale sam ža ličyć hety scenar amal małarealnym. «Usie astatnija «vychady» (…) abrynuć krainu ŭ žorstkuju smutu adrazu i adnačasova z projhryšam vajny».

Adnak šancy na taki pavarot padziej, pavodle jaho słoŭ, imkliva źmianšajucca, bo ciapierašniaja elita arhanična nie zdolnaja da revalucyjnych pieraŭtvareńniaŭ.

«Imaviernaść «revalucyi źvierchu» — nadzvyčaj nizkaja i praciahvaje padać. Prosta tamu, što «ŭ kłubie tych, kamu za 70» z «revalucyjnymi idejami» tradycyjna drenna. A ŭ nas nie prosta «kłub sastarełych», a jašče i «zboryšča sastarełych hiedanistaŭ».

Ihar Hirkin — rasijski śpiecsłužbist, jaki ŭ 2014 hodzie ŭznačaliŭ šturmavikoŭ, jakija ažyćciaŭlali zachop ukrainskaha Danbasa. U vyniku raznahałośsiaŭ z Kramlom jaho adchilili ad kiravańnia sieparatystami. Paśla hetaha jon staŭ krytykam maskoŭskich elit i hołasam ultrašavinistyčnaha kryła rasijskaha hramadstva.

Siońnia jon vykazvaje dumki tych słajoŭ, jakija rasčaravalisia ŭ vynikach impieryjalistyčnaj vajny va Ukrainie. Pavodle acenak zachodnich raźviedak, Rasija straciła kala 200—250 tysiač zabitymi i jašče kala miljona paranienymi, nie dasiahnuŭšy pastaŭlenych napačatku metaŭ.

• 17
• 0
• 24
• 0
• 0
• 0
• 0
• 0