«IT-bum, jak u nas da 2020». Džun nie znajšoŭ pracu ŭ Minsku, a ŭ Taškiencie z rukami adarvali

Historyja prostaja, ale niestandartnaja: chłopiec prosta nie zmoh znajści pracu ŭ Minsku, u toj čas jak ejčary z Uźbiekistana sami znajšli jaho i prapanavali ofier. Devby.io pahavaryŭ z Alaksiejem — pra ŭźbiekski IT-rynak, atmaśfieru ŭ kampanii i ŭražańni ad novaj krainy.

Jak pierajechaŭ

— U kancy 2024 hoda ja znachodziŭsia ŭ pošuku pracy. Šukaŭ pa ŭsioj Biełarusi — biespaśpiachova. Da hetaha času ja paśpieŭ papracavać 2,5 hoda — u nievialikim startapie, jaki raspracoŭvaŭ unutrany pradukt, tak što ličyŭsia Strong Junior, abo Middle.

Ejčar uźbieckaj praduktavaj kampanii sama napisała mnie ŭ Linkedin i prapanavała pasprabavać siabie na vakansiju raspracoŭščyka. Prajści sumoŭi było niaciažka, lahčej, čym u biełaruskich kampanijach, dzie časta ŭklučajuć kali nie live coding, to ałharytmičnuju siekcyju. A tut schiema była prostaja: spačatku teoryja, potym praktyka. Intervju pravodzili lid raspracoŭki i ejčar. Mnie dali paru nievialikich zadač — ja ich vyrašyŭ. U kancy śniežnia skazali: «Pryjazdžaj, my ciabie čakajem».

Navažycca na pierajezd u Taškient było niaciažka: ja adzin, siamji niama, u Biełarusi tolki baćki — čamu b i nie pajechać? Da taho ž ofier byŭ pryvabny — plus 80% da taho zarobku, što ŭ mianie byŭ u Biełarusi, i častkovaja kampiensacyja vydatkaŭ na žyllo. Tak u pačatku 2025 hoda ja sieŭ u samalot i prylacieŭ u Taškient.

Kvateru znajšoŭ z dapamohaj ryełtara jašče ŭ Minsku. Narmalnaja adnuška, nie raźbitaja, u siarednim stanie, tut kaštuje 400 dalaraŭ. Raniej było tańniej, ale zaraz šmat pryjezdžych, tamu ceny vyraśli.

Paśla troch miesiacaŭ vyprabavalnaha terminu mianie pieraviali na pastajanny pracoŭny kantrakt, jaki prałanhujecca kožny hod. Tak što zaraz ja adčuvaju siabie całkam upeŭniena.

Kampanija robić servis rasterminovak. Pakolki my majem spravu ź finansami, to pracavać možna tolki z ofisa. U našym departamiencie — kala 50 čałaviek, bolš za pałovu ź ich — miascovyja, pryčym nie tolki etničnyja ŭźbieki, ale taksama ruskija, karejcy, ludzi inšych nacyjanalnaściaŭ (Uźbiekistan — šmatnacyjanalnaja kraina). Šmat pryjezdžych z Kazachstana. Biełarusaŭ — troje: akramia mianie, jašče adzin raspracoŭščyk i adzin sisadmin.

Usia praca i dakumientacyja viadziecca na ruskaj movie. Miascovyja supracoŭniki mohuć pamiž saboj razmaŭlać na ŭźbiekskaj, ale kali padychodziš da ich i štości pytaješsia, jany adrazu pierachodziać na ruskuju.

Uźbiekistanski IT-bum

Možna skazać, što zaraz u Uźbiekistanie bum IT: paśla taho, jak źmianiŭsia prezident i kraina stała bolš adkrytaj, tut usio pačało chutka raźvivacca — bankaŭskija prahramy, płaciožnyja i inšyja servisy. Nie, heta nie biełaruskaja historyja, dzie IT-halina pačynałasia z aŭtsorsu, jaki absłuhoŭvaŭ zachodnija kampanii. Tut IT — heta miascovyja praduktavyja kampanii, jakija robiać servisy dla ŭnutranaha rynku.

U suviazi z burnym rostam IT-siektara kampanii šukajuć śpiecyjalistaŭ za miažoj. U asnoŭnym na postsavieckaj prastory, tak jak abaviazkovaja ŭmova — dobraja ruskaja mova. Ale nie tolki: naša kampanija, naprykład, zaraz šukaje kadry navat u Sierbii. Heta značyć, rynak žyvy, i kali ja raptam straču ciapierašniuju pracu, to zmahu znajści tut novuju. Pryčym pamiž miascovym śpiecyjalistam i ekspatam vybieruć ekspata.

Zrazumieła, što ŭ 2022 hodzie siudy pryjechała šmat rasijan i biełarusaŭ (pierš za ŭsio supracoŭnikaŭ EPAM), ale z toj chvali bolšaja častka ŭžo źjechała. Prosta mnohija vykarystoŭvajuć Uźbiekistan jak miesca dla «pierasiadzieć» pierad darohaj na Zachad. Naprykład, na Kipr. Čamu tudy? Tamu što heta ES, bieź piaci chvilin šenhienskaja zona, i tam šmat ruskamoŭnych kampanij. Jany razvažajuć tak: voś my źmianili łakacyju, jana ŭžo nie RF i nie RB, i značyć, možna ruchacca dalej.

Asabista mianie pakul usio zadavalniaje, a dalej budu hladzieć. Mahčyma, taksama zachaču pierajechać na Kipr.

Asiadajuć va Uźbiekistanie chiba što tyja, chto zajmieŭ tut siemji. Takija prykłady jość.

Adnosiny ŭ kampanii

Uźbiekistan — patryjarchalnaja kraina, ale nie mahu skazać, što adčuvaju niejkija hniatlivyja ŭstoi ŭ kampanii. Usio-taki heta ajciška, bolš demakratyčnaje asiarodździe, tut niama strohaj ijerarchii i abaviazku padparadkoŭvacca vyšejšamu supracoŭniku. Kali ŭ ciabie jość niejkaje pytańnie, možaš spakojna padyści i spytać. Taksama ŭ suviazi z našym fintech-damienam nam davodzicca znosicca ź dziaržorhanami, i taksama niama nijakich prablem — čynoŭniki nam narmalna adkazvajuć.

Karjerny rost u kampanii taksama mahčymy. Rehularna pravodziać asesmient, i, nakolki ja razumieju, možna daraści nie tolki da sieńjora, ale i da lida. Voś nakont SIEO ja nie ŭpeŭnieny.

Kumaŭstvo? Nu tak, jość takoje. Kali niechta dasiahnuŭ vysokaj pasady, jon moža pryvieści ŭ kampaniju svajho svajaka — na pasadu, dzie možna ničoha nie rabić, ale dobra atrymlivać. Nu, tak heta i ŭ Biełarusi paŭsiul, u tym liku ŭ IT.

Jakoha-niebudź pieraduziataha staŭleńnia da pryjezdžych ja na pracy nie adčuvaju. Mahčyma, jano jość u tych kampanijach, dzie ŭ asnoŭnym miascovyja i ŭsiaho para čałaviek pryjezdžych. A tam, dzie pałova inšaziemcaŭ, taki numar nie projdzie.

Zvykłyja dla IT-kampanii aktyŭnaści tut taksama jość: kursy anhlijskaj, dva razy na hod — karparatyvy, a jašče nas rehularna voziać na ekskursii i na prahułki ŭ hory. 

Znosiny ja maju ŭ asnoŭnym z kalehami. Na vychodnych časta chodzim u kino, na fiestyvali, jeździm pa krainie (byli ŭ Chivie i Samarkandzie).

Uražańni ad Taškienta

Mnie padabajecca. Cicha-spakojna. Tak jak heta musulmanskaja kraina, to na vulicy niama pjanych. Dla mianie heta važki plus. Ałkahol tut nie zabaronieny, ale ŭ zvyčajnych kramach stojek z «ałkaškaj» niama — za vinom treba iści ŭ śpiecyjalizavanuju kramu. Śviežyja frukty — kruhły hod, tannaja, jakasnaja suviaź — nie paraŭnać ź Minskam. Vielmi tanny prajezd u hramadskim transparcie i taksi, adkrytyja miežy.

Tak, horača, ale ŭ Taškiencie śpioka pieranosicca značna lepš, čym u Biełarusi, tak jak pavietra tut suchoje. Heta nie jak u nas, dzie ŭ +27 ź ciabie siem patoŭ sychodzić. U śpioku ja vialikaha dyskamfortu nie adčuvaŭ: navat miascovyja chavalisia, a ja ŭ +44 chadziŭ pa vulicach, i było narmalna.

Ź niezvyčajnaha — ziemlatrusy. Ja ich tut pieražyŭ užo try. Adčuvańni pryblizna jak na paromie Ryha-Stakholm: ty lažyš, a ciabie pakałychvaje. I jašče ptuški pačynajuć hałasić.

Lehalizacyja

Pry zarpłacie peŭnaha ŭzroŭniu možna atrymać IT-vizu. Kali źbiraješsia žyć u krainie doŭha, to možna pretendavać na DNŽ, a potym na hramadzianstva, ale hetaja sistema davoli niepavarotlivaja.

Tak, naprykład, IT-viza vydajecca ŭsiaho na paŭhoda, paśla čaho treba iści ŭ mihracyjku z novym pakietam dakumientaŭ.

Banki pravodziać roznuju palityku ŭ adnosinach da nierezidentaŭ: adny bolš strohija, inšyja — bolš łajalnyja, u druhich dla adkryćcia rachunku patrebna tolki časovaja rehistracyja, identyfikacyjny numar i sim-karta. Samyja łajalnyja pry tabie nadrukujuć bankaŭskuju kartu i addaduć. Inšyja vydaduć kartu tolki praz 2‑3 dni. 

A što z asabistym žyćciom?

U patryjarchalnaj krainie, jak vodzicca, miascovyja dziaŭčaty addajuć pieravahu znosinam ź miascovymi chłopcami. Heta značyć sustrakacca z uźbiečkaj u vas naŭrad ci atrymajecca. Ale, ź inšaha boku, u Taškiencie šmat pryjezdžych dziaŭčat — z Rasii, Kazachstana. Tinder i Badoo tut pracujuć, tak što sa spatkańniami nijakich prablem.

Staŭleńnie inšych biełarusaŭ

Svajaki spačatku mianie nie zrazumieli: kudy ty jedzieš? Jany dumali, što Taškient — heta taki vialiki auł. Ale kali letam ja pryjechaŭ u adpačynak dadomu i pakazaŭ im fatahrafii, jany źmianili staŭleńnie: spadabałasia.

Choć naohuł zaciahnuć u Uźbiekistan inšych biełarusaŭ nie vielmi prosta. Usich pałochaje adlehłaść: dzie Biełaruś, a dzie Uźbiekistan — 4 tysiačy kiłamietraŭ!

Ja sam klikaŭ tavaryša ź Biełarusi. Jon paśla paŭhoda rełakacyi ŭ Hruzii viarnuŭsia ŭ Minsk, pracuje ŭ niejkaj šaraškinaj kantory, a narmalnaj pracy znajści nie moža. Ja kazaŭ jamu: «Pryjazdžaj da nas!», i jon byŭ nie suprać. Ale chatnija, pabadziaŭšysia ŭ Hruzii, ćviorda zajavili, što naŭhad bolš nikudy nie pajeduć.

• 8
• 0
• 0
• 2
• 0
• 0
• 0
• 0