Jaki płan suprać hibrydnych atak ź Biełarusi abviaściŭ litoŭski ŭrad

U paniadziełak Inha Ruhinienie sklikała pasiadžeńnie Nacyjanalnaj kamisii pa biaśpiecy.

«My nie tolki abmierkavali toje, što adbyłosia na vychodnych, što spracavała, jakija srodki nie spracavali, ale i padrychtavali dakładny ałharytm našych budučych dziejańniaŭ», — raskazała jana ŭ svajoj zajavie, piša LRT.

Pavodle słoŭ Ruhinienie, kožnaje ministerstva atrymała zadańni i ŭžo pačało abo pačnie dziejničać. Pierš za ŭsio, vydzieliła premjer-ministr, palicyja i pamiežniki kansalidujuć svaje siły dla baraćby z kantrabandaj.

«Padrychtavany ŭvieś płan dziejańniaŭ, jak zmahacca suprać kantrabandy, i ŭžo, jak viadoma, na minułym tydni byli zatrymanyja asoby — dalej hetyja dziejańni buduć tolki intensifikavacca», — prainfarmavała premjer-ministr.

Pavodle jaje słoŭ, u kiravańnie situacyjaj dałučajecca Ministerstva zamiežnych spraŭ. Najpierš, jano razam ź Ministerstvam pa spravach ES uzhodnić pakiet dadatkovych sankcyj suprać Biełarusi.

«Heta budzie zroblena chutka. Taksama aktyŭna dasiahajucca damoŭlenaści i viaducca kamunikacyi z našymi sajuźnikami i z našymi susiedkami — Polščaj i Łatvijaj. Luboje našaje dziejańnie ŭzhodniena ź imi, my nie asobnaja dziaržava, my — častka NATA i ES. Usio, što my robim, uzhadniajem ź imi», — skazała Ruhinienie.

Premjer-ministr taksama paviedamiła, što Litva kansultujecca z sajuźnikami, nie adkidajecca mahčymaść havaryć pra aktyvacyju 4‑ha artykuła NATA.

«Hetyja dziejańni znachodziacca ŭ našym paradku dnia», — skazała Ruhinienie.

4‑y artykuł NATA aznačaje kansultacyi Aljansu, padčas jakich razhladajecca, ci ŭźnikaje pahroza dla dziaržavy, jakaja aktyvavała artykuł, i jak na heta reahavać.

Pavodle słoŭ premjer-ministra, užo ciapier urad padrychtavaŭ rašeńnie na nieabmiežavany čas zakryć miažu ź Biełaruśsiu.

Praŭda, buduć dziejničać peŭnyja vyklučeńni.

«Heta značyć, dypłamaty, dypłamatyčnaja pošta zmohuć pieramiaščacca, taksama našyja i hramadzianie ES zmohuć ź Biełarusi trapić da nas, ale ŭvieś astatni ruch budzie zakryty. Tak my pasyłajem sihnał Biełarusi i kažam, što da nijakich hibrydnych atak tut nie buduć talerantnymi, my raspačniom samyja žorstkija miery dla spynieńnia takich atak», — zajaviła Ruhinienie.

Pavodle jaje słoŭ, z paniadziełka armija pačnie prymać «usie miery», nieabchodnyja dla spynieńnia šaroŭ, jakija ŭlatajuć, i ŭžyvać kinietyčnyja srodki dla źbivańnia šaroŭ.

«Tak my pasyłajem sihnał, što my hatovyja pryniać navat samyja žorstkija miery, kali parušajecca naša pavietranaja prastora», — skazała Ruhinienie.

Praŭda, jana nie kankretyzavała, jakimi srodkami buduć źbivacca šary, što ŭlacieli ŭ Litvu.

«Heta adčuvalnaja infarmacyja, ale armija ŭžo padrychtavała płan dziejańniaŭ i budzie pracavać dakładna pavodle ałharytmu. (…) Ałharytm raspracavany ŭ armii, šary buduć źbivacca», — dadała Ruhinienie.

Za kantrabandu buduć karać pazbaŭleńniem voli

Premjer-ministr zajaviła, što ŭ sieradu na pasiadžeńni ŭrada budzie pradstaŭleny novy prajekt papravak da Kryminalnaha kodeksa, jakim źbirajucca ŭzakonić «samy vysoki i žorstki» prysud za kantrabandu — pazbaŭleńnie voli.

«Raniej my havaryli pra hrašovyja štrafy i ich pavieličeńnie, a siońnia ŭžo abmierkavali, što heta mahło b być i pazbaŭleńnie voli», — skazała premjer-ministr.

Premjer-ministr skazała, što Litva razhladaje šary, jakija ŭlatajuć u Litvu, jak hibrydnuju ataku, a biełaruski režym u hetym pracesie ŭdzielničaje svajoj biaździejnaściu.

«Jak vy viedajecie, biaździejnaść — heta taksama dziejańnie. Kali Biełaruś ničoha z hetym nie robić i nie zmahajecca, my taksama adpaviedna aceńvajem hetyja dziejańni. (…) My bačym udzieł [biełaruskaha režymu] praź biaździejańnie. Voś tak. My, biezumoŭna, rasceńvajem heta jak hibrydnuju ataku», — skazała Ruhinienie.

Mietearałahičnyja šary traplali ŭ Litvu i raniej, naprykład, letaś u vieraśni taki šar z kantrabandaj pryziamliŭsia na terytoryi Vilenskaha aeraporta. Pa acency premjer-ministra, siońnia situacyja inšaja z-za najaŭnaści abstalavańnia, jakoje dazvalaje raniej i lepš zaŭvažać abjekty, što ŭlatajuć u Litvu, tamu aeraport zakryvajuć, kali šary jaho jašče nie dasiahnuli.

«Letaś my byli ślapymi kuraniatami i šmat čaho nie bačyli. Dziakuj Bohu, nie adbyłosia katastrofy. My peŭnych abjektaŭ, jakija ruchajucca, nie bačyli, z-za hetaha nie było rašeńniaŭ zakryvać pavietranuju prastoru. (…) Siońnia my majem našmat lepšaje abstalavańnie, možam bačyć našmat bolš, z-za hetaha aceńvajem ryzyki, ličym, što pavinny prymać miery, kab abaranić svaich hramadzian», — zajaviła premjer-ministr.

Ruhinienie taksama padkreśliła, što siońnia Litva moža nazirać kirunak ruchu mietearałahičnych šaroŭ.

«Jašče bolš dakładna zmožam ich kaardynavać, nazirać, arhanizoŭvać pracu aeraporta», — skazała Ruhinienie.

Jana adznačyła, što apošnim časam dla mietearałahičnych šaroŭ spryjalnyja ŭmovy nadvorja.

Pavodle słoŭ premjer-ministra, siońnia my žyviom u «absalutna novaj» realnaści: «Na žal, tak jość, nie mahu paradavać. Žyviom u novaj realnaści, i była adna ataka, kali mihranty išli da nas praź miažu. (…) Spynili — ciapier źjaviŭsia novy srodak. Spynim novy srodak — nichto nie abaronieny, što nie źjavicca jašče adzin».

• 7
• 1
• 1
• 7
• 2
• 0
• 0
• 0