Jaho banan pradali za $6,2 miljona. Ciapier mastak vystaviŭ na aŭkcyjon załaty ŭnitaz
Aŭkcyjonny dom Sotheby’s płanuje pačać tarhi pa prodažy załatoha ŭnitaza mastaka Maŭrycya Katełana. Mastacki tvor pierad prodažam budzie vystaŭleny ŭ štab-kvatery aŭkcyjonnaha doma, kab kupcy mahli prateściravać jaho. Pačatkovaja cana — 10 miljonaŭ dalaraŭ.
Pravakacyjny mastak Maŭrycya Katełan, jaki minułym hodam pradaŭ banan, prylepleny skotčam da ściany, za 6,2 miljona dalaraŭ, ciapier vystaviŭ na prodaž unitaz z 101,2 kiłahrama zołata. Ab hetym paviedamlaje The Wall Street Journal.
Zołata — mietał darahi, tamu startavy košt pradmieta mastactva składaje kala 10 miljonaŭ dalaraŭ. Aŭkcyjonny dom Sotheby's, adnak, raźličvaje pradać hety załaty łot značna daražej.
U Sotheby's hety ŭnitaz nazyvajuć idealnym praciaham «bananavaj» historyi, niahledziačy na toje, što stvorany jon byŭ raniej.
Adznačajecca, što ŭnitaz całkam funkcyjanalny, ale karystacca im zabaroniena. Pierad prodažam Sotheby's abiacaje vystavić jaho ŭ prybiralni svajoj novaj štab-kvatery na Manchetanie, kab zacikaŭlenyja mahli acanić jaho «na miescy». Adnak, jak padkreśliŭ ekśpiert Devid Hałpieryn: «My nie chočam, kab ludzi siadzieli na mastactvie».
Skulptura 2016 hoda atrymała nazvu «Amieryka» i pieršapačatkova była zadumana Katełanam jak sposab pastavić pytańnie, jakija prastory ŭ muziei ličacca sakralnymi, a jakija — nieprystojnymi. Pa słovach samoha mastaka, jon chacieŭ pastavić niešta bliskučaje i darahoje ŭ nieprykmietnym miescy.
«Urešcie, my ŭsie adnolkavyja, i my zhadvajem pra heta mienavita tam, u najmienš vysakarodnym i samym nieabchodnym miescy», — skazaŭ mastak.
Choć pieršapačatkova mastak płanavaŭ stvaryć piać adnolkavych viersij svajho tvora, na siońniašni dzień adliŭ tolki dva asobniki «Amieryki». Viersija, jakuju pradaje Sotheby's, pastupiła ad pryvatnaha kalekcyjaniera, jaki nabyŭ jaje ŭ halerei ŭ 2017 hodzie.
Druhi asobnik unitaza byŭ vystaŭleny ŭ Muziei Huhienchajma ŭ Ńju-Jorku ŭ 2016 hodzie. Jon adrazu staŭ chitom: krytyki paraŭnoŭvali jaho z «Fantanam» Marsela Dziušana (1917), a skarystacca załatym tvareńniem paśpieli kala 100 000 naviedvalnikaŭ. Kala prybiralni dziažuryŭ achoŭnik, a prybiralščyki čyścili ŭnitaz prykładna kožnyja 15 chvilin. Tady jaho košt aceńvaŭsia ŭ 2 miljona dalaraŭ.
U 2019 hodzie Huhienchajm adpraviŭ svoj unitaz u Blenchiejmski pałac u Anhlii, dzie jon byŭ ustalavany ŭ prybiralni Uinstana Čerčyla. Na toj momant z-za rostu cen na zołata jaho košt dasiahnuŭ 4 miljony dalaraŭ.
Adnak historyja łota poŭnicca dramatyzmam: adnojčy nočču złodziei, uzbrojenyja kuvałdami, vyłamali ŭnitaz i ŭciakli, što vyklikała surjoznaje zatapleńnie ŭ budynku XVIII stahodździa. Niekalki čałaviek byli aryštavanyja, sam załaty ŭnitaz tak i nie znajšli. Ułady miarkujuć, što jaho, chutčej za ŭsio, pierapłavili.
Jak zaŭvažaje WSJ, kab pabić asabisty rekord Katełana na aŭkcyjonach, łot pavinien być pradadzieny značna daražej za $17,2 miljona. Hetaja suma była vypłačanaja mastaku za stvorany ŭ 2001 hodzie tvor «Jon» (Him) — fihuru Adolfa Hitlera, jakaja staić na kaleniach i vykanana z vosku i smały ŭ rost dziciaci.
Ciapier čytajuć
Były muž błohierki, jakaja razam z 17‑hadovym žanichom šykavała na sabranaje dla chvoraha dziciaci, raskrytykavaŭ tych, chto hetyja hrošy joj pieravodziŭ
Kamientary