Tramp abiacaje vypłacić hramadzianam ZŠA pa $2000 u jakaści dyvidendaŭ ad mytnych pošlin
Prezident ZŠA Donald Tramp zajaviŭ pra namier vypłacić kožnamu hramadzianinu krainy pa $2000 u jakaści «dyvidendaŭ» ad mytnych pošlin. Vyklučeńnie budzie zroblena tolki dla asob z vysokim dachodam.
Tramp zrabiŭ adpaviednuju zajavu ŭ sacyjalnaj sietcy Truth Social. «Dyvidend nie mienš za $2000 na čałavieka (vyklučajučy ludziej z vysokim dachodam) budzie vypłačany kožnamu», — napisaŭ jon.
Tramp śćviardžaje, što kraina «zarablaje na pošlinach tryljony dołaraŭ» i nazyvaje tych, chto suprać hetych pošlin, «durniami». Jon paabiacaŭ, što hetyja hrošy nieŭzabavie buduć vykarystany dla skaračeńnia «kałasalnaha» dziaržaŭnaha doŭhu ZŠA, jaki składaje $37 tryljonaŭ.
U svajoj zajavie Tramp taksama padkreśliŭ, što ZŠA ciapier źjaŭlajucca «samaj bahataj i pavažanaj krainaj u śviecie, z amal nulavoj inflacyjaj i rekordna vysokim fondavym rynkam».
Z momantu ŭstupleńnia Trampa na pasadu ŭ studzieni dachody ZŠA ad mytnych pošlin sapraŭdy vyraśli. Da kanca finansavaha hoda ŭ vieraśni jany dasiahnuli $195 miljardaŭ, što na $118 miljardaŭ bolš, čym hodam raniej.
Pavodle acenak, kali paroh «vysokaha dachodu» budzie ŭstanoŭleny na ŭzroŭni $100 000 u hod, na vypłatu ŭ $2000 zmahli b pretendavać kala 150 miljonaŭ darosłych hramadzian. Heta kaštavała b prykładna $300 miljardaŭ. Kali prava na bonus atrymajuć i dzieci, ahulnyja vydatki jašče ŭzrastuć.
Ciapier čytajuć
Mścisłaŭ Miekta: jašče adzin recydyvist rviecca va ŭładu, prykinuŭšysia śpiecnazaŭcam-jabaćkam16
Kamientary