Akcior Idrys Elba i fihurysty Džejn Torvił i Krystafier Dzin byli paśviečanyja ŭ rycary (i damu) Ordena Brytanskaj impieryi

Usiaho sioleta karol nadaŭ hanarovyja tytuły 1157 hramadskim dziejačam, pradstaŭnikam mastactva, navuki, sportu i palityki.

U śfiery sportu, u pryvatnaści, byli adznačanyja trenier i futbalistki žanočaj zbornaj Anhlii, jakaja ŭ hetym hodzie druhi raz zapar vyjhrała čempijanat Jeŭropy.

Džejn Torvił i Krystafier Dzin zavajavali alimpijskaje zołata ŭ parnym fihurnym katańni ŭ 1984 hodzie, a taksama čatyry razy stanavilisia čempijonami śvietu i čatyry razy — čempijonami Jeŭropy. Tytuły rycara i damy (žanočy anałah rycara) Ordena Brytanskaj impieryi jany atrymali jak za spartyŭnyja dasiahnieńni, tak i za hramadskuju dziejnaść.

Sioleta Torvił i Dzin, jakim ciapier 68 i 67 hadoŭ, u apošni raz vyjšli na lod — padčas finału telešou «Tancy na lodzie».

«Dla nas było važna hetym vystupleńniem nahadać pra našu karjeru pierad sychodam na spačyn, a ciapier, u kancy hoda, jašče i atrymać hetu ŭznaharodu. Heta prosta idealnaje zaviaršeńnie ŭsiaho», — skazała Džejn Torvił.

Idrys Elba, ciapier — ser Idrys, viadomy, u pryvatnaści, pa rolach Nelsana Mandeły ŭ filmie «Mandeła: doŭhi šlach da svabody» i detektyva Džona Lutera ŭ sieryjale «Luter». Adnak rycarski tytuł jon atrymaŭ za dabračynnuju dziejnaść: jaho fond Elba Hope Foundation dapamahaje dzieciam.

«Ja spadziajusia, što my zmožam pryciahvać bolš uvahi da taho, nakolki važnaja pastajannaja i praktyčnaja dapamoha moładzi, a taksama da taho faktu, što ŭsie my niasiom adkaznaść za pošuk alternatyvy hvałtu», — skazaŭ ser Idrys, kamientujučy atrymańnie rycarskaha tytuła.

Sam jon u padletkavym uzroście atrymaŭ hrant ad Fondu Prynca Uelskaha na navučańnie ŭ Nacyjanalnym maładziožnym muzyčnym teatry, što ŭ vyniku pryviało jaho da karjery viadomaha akciora.

Hałoŭnaja trenierka žanočaj zbornaj Anhlii pa futbole, hałandka Saryna Vihman, była ŭhanaravana asablivym hanarovym tytułam damy za toje, što druhi raz zapar zavajavała z kamandaj zołata čempijanatu Jeŭropy.

Zamiežniki mohuć atrymlivać rycarskuju stupień Ordena Brytanskaj impieryi, adnak, u adroźnieńnie ad brytancaŭ, im nie naležyć prystaŭka «ser» abo «dama» da imia.

Stupieni Ordena Brytanskaj impieryi nižej za rycarskija atrymali i niekalki futbalistak zbornaj.

Orden Brytanskaj impieryi maje piać asnoŭnych stupieniaŭ, i rycarski tytuł prysvojvajecca tolki pa dźviuch najvyšejšych.

Tytułami nižej za rycarskija byli adznačanyja nie tolki «Lvicy» — tak u Anhlii nazyvajuć svaju žanočuju futbolnuju zbornuju, — ale i hałoŭny trenier i piać spartsmienak «Čyrvonych ružaŭ» — mianuška žanočaj zbornaj pa rehbi. U hetym hodzie jany stali čempijonkami śvietu.

• 1
• 0
• 0
• 0
• 0
• 0
• 0
• 0