Minčuki kupili abaniemient na płatnuju parkoŭku, a jaje zaniesła śnieham

— Ja pracuju ŭ centry (budynak na adrasie vulica Kalektarnaja, 3a), i varyjantaŭ pastavić mašynu biaspłatna niama. My parkujemsia na placoŭcy pamiž damami pa adrasach Niamiha, 38, i Niamiha, 40 — heta za našym ofisnym budynkam, — raskazała Onliner.by žančyna. Jana patłumačyła, što hetaja parkoŭka płatnaja, abaniemient na miesiac kaštuje 100 rubloŭ.

— 9 studzienia, u piatnicu, stajanka była całkam zaniesienaja śnieham. Ranicaj 12 studzienia tam taksama była tolki kalaina ad mašyn pa centry. U miescach, dzie pavinny stajać aŭtamabili, lažaŭ niekranuty śnieh vyšynioj kala 40 santymietraŭ.

Ludzi sami rydloŭkami čyściać, kab pakinuć mašynu na płatnaj parkoŭcy. My ŭsie ščyra nie razumiejem, za što płacim niemałyja hrošy i chto niasie adkaznaść za toje, što pasłuhi nie vykonvajucca. 2 studzienia — heta nie pieršy dzień śniehapadu, prajšła piatnica, 9 studzienia, kali vypaŭ śnieh, prajšli vychodnyja, kali možna było rasčyścić parkoŭku, ale ranicaj 12 studzienia nie było nivodnaha miesca, kab pakinuć mašynu — usio było zavalena śnieham, — adznačyła surazmoŭca.

Žančyna raskazała, što jaje sproba zajechać na parkoŭku na paŭnapryvadnym usiodarožniku skončyłasia tym, što paśla daviałosia šukać čatyroch pamočnikaŭ i dźvie rydloŭki, kab vyjechać. Pavodle jaje słoŭ, u aŭtorak, 13 studzienia, śnieh užo prybrali.

— Jość rašeńnie haradskoha savieta deputataŭ, u jakim vyznačana, što ŭsie parkoŭki kamunalnaj formy ŭłasnaści ŭ horadzie Minsku prybirajuć harramaŭtadory — terytaryjalna pa miescy znachodžańnia parkoŭki, — paviedamili va ŭstanovie «Parkoŭki stalicy».

Tam ža patłumačyli, što płatnyja parkoŭki arhanizujucca na padstavie rašeńnia Minharvykankama, a sama ŭstanova ažyćciaŭlaje kantrol apłaty, jakaja ŭ poŭnym abjomie pieraličvajecca ŭ biudžet.

Ci možna viarnuć častku srodkaŭ u vypadku, kali z-za nieprybranaha śniehu (ci pa inšych pryčynach) niemahčyma skarystacca parkoŭkaj, na jakuju aformleny abaniemient?

U «Parkoŭkach stalicy» paćvierdzili, što ŭ padobnych vypadkach aŭtamabilisty mohuć źviarnucca pa viartańnie srodkaŭ, i taki zvarot budzie razhledžany ŭ indyvidualnym paradku.

— U pastanovie Savieta ministraŭ ad 5 studzienia 2007 h. № 9 «Ab zaćviardžeńni Praviłaŭ arhanizacyi (budaŭnictva), ekspłuatacyi aŭtamabilnych stajanak i aŭtamabilnych parkovak i karystańnia imi» jość punkt 33, u jakim prapisana, što «apieratar aŭtamabilnaj parkoŭki praduhledžvaje mahčymaść i paradak viartańnia abo pieraraźliku karystalnikam płatnaj aŭtamabilnaj parkoŭki hrašovych srodkaŭ, spłačanych imi ŭ košt apłaty za parkoŭku, u vypadku pierapłaty času znachodžańnia na parkoŭcy abo niemahčymaści karystańnia parkoŭkaj pa pryčynach abmiežavańnia darožnaha ruchu, budaŭniča-mantažnych i ramontnych rabot u miescach jaje raźmiaščeńnia». Najaŭnaść śniehu — heta, u pryncypie, i jość abmiežavańnie darožnaha ruchu, — patłumačyli ŭ adździele pravavoj i kadravaj raboty ŭstanovy.

— Kali karystalnik piša, što z takoj-ta hadziny na takoj-ta parkoŭcy znachodziŭsia śnieh i jon nie mieŭ mahčymaści joju skarystacca, adnak u jaho nabyty abaniemient i jon prosić zrabić pieraraźlik, takoje zvarot budzie razhladacca ŭ indyvidualnym paradku.

U ŭstanovie adznačyli, što takich piśmovych zvarotaŭ pakul nie pastupała, to bok jak takoj praktyki pa ich niama. Pry hetym źviarnuli ŭvahu na taki momant:

— U nas usiudy ŭkazana, što my nie harantujem najaŭnaść miescaŭ (na parkoŭcy). Heta značyć, karystalnik maje prava nabyć abaniemient, ale harantavać svabodnaje miesca my nie majem prava.

• 0
• 0
• 0
• 6
• 0
• 0
• 1
• 0