Łukašenka zaklikaŭ nie šukać «ničoha nadzvyčajnaha» ŭ ratacyi kadraŭ
Łukašenka zaklikaje nie šukać «ničoha nadzvyčajnaha» ŭ ratacyi kadraŭ. Pra heta jon zajaviŭ 25 maja, pradstaŭlajučy novaha staršyniu Minskaha abłasnoha vykanaŭčaha kamiteta Barysa Baturu aktyvu Minskaj vobłaści.
«Pa miery raźvićcia dziaržavy pavinien iści narmalny i naturalny praces stanaŭleńnia i ŭdaskanaleńnia kadravaha patencyjału. Zastoj tut nieprymalny, jaho być nie moža, bo jon pryviadzie, jak pryniata ciapier havaryć, da stahnacyi, rehresu i adkatu nazad», — cytuje Łukašenku pres‑słužba prezidenta.
Kiraŭnik dziaržavy adznačyŭ, što źmiena hubiernatara Minskaj vobłaści nie maje jakoj‑niebudź palityčnaj padaploki. «Usie my budziem narmalna pracavać u orhanach dziaržkiravańnia, kali ŭ nas buduć narmalnyja vyniki ŭ ekanomicy.
Ekanomika — heta hałoŭnaje dla nas», — zajaviŭ Łukašenka.
Jon źviarnuŭ uvahu na nieabchodnaść palapšeńnia kadravaj palityki ŭ staličnaj vobłaści. «Daručeńni navieści ŭ vobłaści paradak z kadrami, jakija ja davaŭ, kali pryznačaŭ raniejšaha hubiernatara, tak i nie vykanany, — padkreśliŭ prezident. — Vy nie zmahli skončyć z čachardoj pry padbory i rasstanoŭcy kiraŭnikoŭ i śpiecyjalistaŭ sielhasarhanizacyj. Ad ich vysokaj źmianialnaści i praciahłych vakansij pakutuje sprava».
Pavodle jaho słoŭ, 19 sielhasarhanizacyj vobłaści i siońnia zastajucca biez kiraŭnikoŭ, niekatoryja — užo bolš za paŭhoda. Siem miesiacaŭ zastavalisia vakantnymi pasady namieśnikaŭ staršyniaŭ Staradarožskaha i Krupskaha vykankamaŭ. Łukašenka adznačyŭ deficyt hałoŭnych śpiecyjalistaŭ u APK. Štohadovaja źmianialnaść hetaj katehoryi rabotnikaŭ u Minskaj vobłaści składaje kala 17%.
Prezident asoba zakranuŭ prablemy pracaŭładkavańnia maładych śpiecyjalistaŭ. «Biez zamacavańnia moładzi na viadučych pasadach va ŭsich śfierach ekanomiki my nie zmožam zabiaśpiečyć pastupalnaje dynamičnaje raźvićcio našaj dziaržavy», — skazaŭ jon. «Heta pavinna być pad žorstkim kantrolem hubiernatara. Kali małady śpiecyjalist źjechaŭ na inšaje pracoŭnaje miesca, vas pavinny nieadkładna prainfarmavać i vy pavinny ŭniknuć i razabracca z tym, chto jaho ŭziaŭ na pracu», — źviarnuŭsia Łukašenka da Batury i jaho namieśnika Valeryja Ivanova.
Havoračy ab pracy Leanida Krupca na pasadzie hubiernatara, prezident adznačyŭ, što jon nie dapuściŭ ekanamičnaha abvału, davoli spakojnaj zastajecca sacyjalna‑palityčnaje stanovišča ŭ rehijonie. Vobłaść urešcie pieraadoleła dźviuchmiljonnuju miažu zboru zbožža, vykonvajecca pastaŭlenaja zadača pa zabieśpiačeńni Minska praduktami charčavańnia. Adnak, padkreśliŭ kiraŭnik dziaržavy,
niama dynamiki ekanamičnaha raźvićcia, i siońnia nieabchodna pavialičvać efiektyŭnaść vytvorčaści ŭ sielskaj haspadarcy.
Što da ciapierašnich kadravych rašeńniaŭ, jon taksama adznačyŭ, što «kadram Minščyny nieabchodny žorstki i pryncypovy styl kiraŭnictva». Prezident upeŭnieny, što «tandem hubiernatara Barysa Batury i jaho pieršaha namieśnika Valeryja Ivanova ŭjaŭlaje saboj spłaŭ vopytu i maładości, zaklikany vyvieści Minskuju vobłaść na lidzirujučyja pazicyi ŭ mnohich śfierach». Pierad novym kiraŭnictvam stajać vielmi adkaznyja i napružanyja zadačy, bo heta asablivy rehijon, raźvićcio jakoha šmat u čym vyznačaje ahulnuju dynamiku sacyjalna‑ekanamičnaha raźvićcia Biełarusi. «Minščyna pavinna być prykładam dla ŭsich rehijonaŭ», — padkreśliŭ Alaksandr Łukašenka.
«Ja vielmi chaču, kab Minskaja vobłaść dadała ŭ tempach. Navat sioleta, zakłaŭšy tym samym asnovy dla budučaj piacihodki. Dadaść Minskaja vobłaść — značna prasuniecca napierad usia kraina. Bo Minščyna — heta asnova, heta vielizarnaja terytoryja z dobrymi ziemlami, vielmi dobrymi ludźmi i vialikimi mahčymaściami», — padkreśliŭ prezident.
Kamientary