Sudździa suda Centralnaha rajona Homiela Alena Całkova 31 maja pryznała nievinavatym va ŭchileńni ad pryzyvu na vajskovuju słužbu člena relihijnaj abščyny »Śviedki Ijehovy» Dźmitryja Smyka i apraŭdała jaho.
Smyk abvinavačvaŭsia na padstavie č. 1 art. 435 Kryminalnaha kodeksa (uchileńnie ad mierapryjemstvaŭ pryzyvu na vajskovuju słužbu). Prysud, kali nie budzie apratestavany prakuraturaj, nabudzie zakonnuju moc praz 10 dzion.
Nahadajem, małady čałaviek admoviŭsia iści ŭ armiju, spasyłajučysia na svaje relihijnyja pierakanańni, i prasiŭ dać jamu prava alternatyŭnaj słužby.
Kryminalny praces pa spravie člena relihijnaj abščyny pačaŭsia vosieńniu 2009 hoda — 6 listapada sudom Centralnaha rajona Smyk byŭ pryznany vinavatym va ŭchileńni ad mierapryjemstvaŭ pryzyvu i aštrafavany na 100 bazavych vieličyń (3,5 młn. rubloŭ). Homielski abłasny sud pakinuŭ u sile pryhavor rajonnaha suda. Ale 15 sakavika, paśla taho jak Viarchoŭny sud unios pratest na rašeńnie Homielskaha abłasnoha suda, abłsud admianiŭ pryhavor i nakiravaŭ spravu na novy razhlad.
«Ja vielmi zadavoleny, ja ščaślivy, što ŭsio tak zaviaršyłasia. Na samoj spravie ja i raźličvaŭ na takoje rašeńnie, tamu što mnie niama čaho było ŭtojvać i chavać. Ale poŭnuju radaść budu adčuvać praź dziesiać dzion — kali prakuratura nie padaść apielacyju», — prakamientavaŭ rašeńnie suda žurnalistam Smyk. Jon dadaŭ, što zaŭsiody viedaŭ, što «z addanymi Boh abychodzicca addana». «Ja zastavaŭsia addanym Božym normam, tamu Jon i zastupiŭsia za mianie, i plus heta spraviadliva. Liču, što ŭ našaj krainie dastatkova kampietentnyja sudździ, nie pazbaŭlenyja ćviarozaha rozumu, jany vynieśli spraviadlivaje rašeńnie», — skazaŭ małady čałaviek.
«Rašeńnie suda śviedčyć ab tym, što našy ŭłady stali na bolš realistyčnuju pazicyju, tamu što pazicyja, ź jakoj asudžalisia da hetaha pracesu śviedki Ijehovy, zychodziła z taho, što heta moža niejkim čynam padarvać abaranazdolnaść dziaržavy. Potym ułady pierakanalisia, što heta adzinkavyja vypadki, kali ludzi admaŭlajucca i hatovy za svaje pohlady pajści ŭ turmu abo atrymać štraf. Ułady pryjšli da vysnovy, što lepš raspracoŭvać pravavyja asnovy, zakładzienyja ŭ Kanstytucyju, u pryvatnaści ŭ artykuł, dzie havorycca pra alternatyŭnuju słužbu. Toje, što zakon nie raspracavany 14 hadoŭ, — heta niedapracoŭka našych zakanadaŭcaŭ», — adznačyŭ člen Biełaruskaha Chielsinkskaha kamiteta pravaabaronca Viktar Adzinočanka.
Kamientary