Paśla 1 lipienia pra biaspłatny Wi‑Fi ŭ Biełarusi možna budzie zabycca
Tak miarkuje Mark Biernštejn, indyvidualny pradprymalnik, pradstaŭnik IT‑biźniesu. Pra nastupstvy ŭvachodžańnia ŭ siłu ŭkaza prezidenta №60 ad 1 lutaha 2010 hoda «Ab mierach pa ŭdaskanaleńni vykarystańnia nacyjanalnaha siehmientu sietki interniet» jon paviedamiŭ 2 červienia ŭ Minsku ŭdzielnikam pasiadžeńnia kruhłaha stała «Biźnies i prava». Mierapryjemstva było arhanizavana Asacyjacyjaj małoha i siaredniaha pradprymalnictva.
Mark Biernštejn ličyć, što
ŭładalniki ustanoŭ, dla klijentaŭ jakich pasłuha Wi‑Fi pradastaŭlajecca biaspłatna, naŭrad ci pojduć na toje, kab fiksavać u žurnale ich źviestki, čas uvachodu ŭ interniet i vychadu ź jaho, rabić inšyja dziejańni, praduhledžanyja ŭkazam.
Heta, pavodle jaho słoŭ, moža adbicca na «zornaści» biełaruskich haścinic, abaviazanych mieć biaspłatnuju pasłuhu biespravadnoha dostupu ŭ interniet. U vyniku stanoviacca vidavočnymi prablemy dla haściničnaha i turystyčnaha biźniesu, skazaŭ Biernštejn.
Jak adznačyŭ pradprymalnik, nieabchodnaść fiksavać kožnaha karystalnika, pieryjad jaho pracy i h.d. stvoryć čerhi ŭ interniet‑kłubach, pazbavić mahčymaści karystacca hetymi pasłuhami padletkaŭ, jakija nie majuć pašpartoŭ.
«Dziakujučy» ŭkazu, zajaviŭ Biernštejn, biełaruskim pradpryjemstvam, jakija prapanoŭvajuć roznyja tavary, pryjdziecca pieranosić svaje interniet‑placoŭki na biełaruski chostynh, kali jany byli ŭ ich za miažoj. «A heta nie tolki staronki, ale i prahramnyja kompleksy, jakija pracujuć zaraz na mahutnaściach u Jeŭropie i ZŠA», — kanstatavaŭ biźniesmien. Akramia taho, rekłamavacca mahčyma budzie tolki ŭ biełaruskim siehmiencie sietki, što stvoryć prablemy dla eksparcioraŭ, ličyć Mark Biernštejn.
Aceńvajučy ŭkaz, kiraŭnik Asacyjacyjaj małoha i siaredniaha pradprymalnictva Siarhiej Bałykin adznačyŭ: «Calali ŭ apazicyju, a trapili ŭ biźnies. U vyniku atrymali pierarehistracyju interniet‑resursaŭ. Dla biźniesu stvaryli prablemu na pustym miescy». Jon prahnazuje, što vynikam uvachodžańnia ŭ siłu prezidenckaha akta stanie skaračeńnie dziejnaści pravajderaŭ, kampanij, jakija pradastaŭlajuć chostynh, i naohuł dehradacyja biełaruskaha siehmienta internieta.
Ciapier čytajuć
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich1
Kamientary