Kachańnie i niaseks

Pra aseksuałaŭ — ludziej, jakim seks biez patreby.

Heta moža być chto zaŭhodna. Čałaviek, jaki pracuje za susiednim kamputaram, žančyna, što jedzie poruč u aŭtobusie, vaš havarki susied, abo pryjaciel — paśpiachovy biznesoviec, i navat pryhažennaja madelka na ekranie. Jość niamała ludziej, jakija na niejkim etapie prosta ŭziali i admovilisia ad seksu, bo im heta nie treba i navat niepryjemna. Usio pra aseksuałaŭ.

1. Tolki biez ruk!

Aseksuały — ludzi, jakija nie adčuvajuć połavaha pociahu ni da koha. Razam z tym, jany mohuć pieražyvać uvieś śpiektr hłybokich emocyjaŭ, adčuvać rodnaść dušaŭ. Jany navat zakochvajucca. Adzinaje, suprać čaho pratestujuć ich duša i cieła, — fizičny kantakt. Abdojmy, pacałunki, pieščy i sami luboščy — nie dla ich. Tak, jany biarucca šlubam, ale abo z padobnymi da siabie, abo kab nastavić akulary hramadstvu, dziela atrymańnia naležnaha statusu.

Jak za ciapierašnim śvietam aseksuały kantaktujuć? Pa našych vulicach ža nie chodziać ludzi z majkami «Ja — aseksuał» (a kali chodziać, dyk jany, chutčej za ŭsio, prosta žartujuć). Akramia vypadkovych źbiehaŭ akaličnaściaŭ, što pryvodziać da sustrečy dvuch ščyrych nieprychilnikaŭ płocievaha kantaktu, pakul što samaje dziejsnaje rašeńnie— sieciva. Tut jany mohuć padzialicca pačućciami abo prosta paznajomicca ź ludźmi, jakija znachodziacca ŭ padobnaj situacyi.

Zrazumieła, lepiej, kali abodva sužency — aseksuały. Jany parazumiejucca z kiva. Ale što možna zrabić, kali adzin z sužencaŭ aseksuał, a druhi — nie? Najpierš treba ahučyć prablemu, nie hulać u maŭčanku. Jość adzin bok, jaki niezadavoleny, i druhi, jaki cierpić hvałt u łožku, ale achviary dźvie. Kali prablema nie vyrašajecca, možna źviarnucca da psichaterapieŭta.

2. Ja nie fryhidny, ja — aseksuał

Koliś aseksualnaść ličyłasia psichičnym zachvorvańniem, ale ciapier psichijatary i psichołahi sumniajucca. U navukoŭcaŭ niama zhody nakont taho, ci aseksualnaść — pieradvyznačanaja schilnaść. Adnyja admysłoŭcy kažuć, što jość ceły śpiektr ludziej z roznym uzroŭniem połavaha pociahu: z adnaho boku taho śpiektru mieściacca apantanyja seksam ludzi, a ź inšaha — aseksuały. Naša (a)seksualnaść, kažuć admysłoŭcy, zaležyć ad vonkavych pryčyn. I padčas asabistych kryzisaŭ abo padčas ciažkich pieryjadaŭ žyćcia našaje žadańnie moža dajści da niama ničoha. I tolki taho. Inšyja śpiecyjalisty ź imi nie pahadžajucca: oj, nie, aseksualnaść — stałaja, niaźmiennaja, adpryrodnaja schilnaść čałavieka.

Jakija pryčyny aseksualnaści?

Fizičnyja. Hienietyčna nizki ŭzrovień harmonaŭ, adkaznych za žadańnie. Inšym seks biez patreby, bo jany majuć niejraendakrynnyja parušeńni ci surjonyja zachvorvańni hałaŭnoha ci śpinnoha mozhu. Peŭnaj častcy ź ich dapamoža miedykamientoznaje rašeńnie. A jašče amal da nula panižajuć žadańnie niekatoryja tabletki suprać ciažarnaści.

Psichičnyja. Absalutnaja adsutnaść połavaha pociahu taksama naradžajecca ŭ psichična chvorych ludziej, naprykład, u paranoikaŭ, jakija ličać, što ŭsie chočuć ekspłuatavać ich cieła, i tamu jany ŭchilajucca ad intymnych kantaktaŭ. Takoje ž niežadańnie moža źjavicca ŭ ludziej zanuranych u hłybokuju, doŭhatryvałuju depresiju.

Psichałahičnyja. Aseksualnaść moža być vynikam pieršaha niaŭdałaha połavaha dośviedu, abo seksualnych dakučańniaŭ, abo zhvałtavańnia. Da takich ludziej varta stavicca nie jak da aseksuałaŭ, a jak da seksualna dezaryjentavanych.

Nie zabudziemsia taksama na siektantaŭ, jakija pavodle svaich vyznańniaŭ nie tolki ŭchilajucca da seksu, ale i ŭsialak pryhniatajuć ułasnyja pačućci.

Hramadskija. A jašče my zabylisia na sacyjalnych pratestoŭcaŭ — ludziej, jakija ličać luboščy prajavaj paniavolenaści čałavieka. U niekatorych vypadkach heta idzie hetak hłyboka, što spryčyniajecca da niepryniaćcia seksu na fizijałahičnym uzroŭni. I znoŭ navukoŭcy ŭ tupiku: ci možna ličyć čałavieka nienarmalnym, niezdarovym tolki tamu, što jon maje aktyŭnuju hramadskuju pazicyju?

• 0
• 0
• 0
• 0
• 0
• 0
• 0
• 0