«Usio heta vielmi sumnieŭna»

Fond spryjańnia intehracyi Biełarusi i Rasiei choča stvaryć «niepalityčny ruch rabočych».

24 vieraśnia ŭ Miensku adbyŭsia Schod pracoŭnych, na jakim prysutničała sotnia delehataŭ z roznych pradpryjemstvaŭ Biełarusi: ad rahačoŭskaha zavodu «Dyjaprajektar» da «Biełaruśkaliju».

Ładziła sustreču hramadzkaje abjadnańnie «Fond sadziejničańnia intehracyi Respubliki Biełaruś i Rasiejskaj Federacyi», kiraŭnikom jakoha źjaŭlajecca sakratar Partyi kamunistaŭ Biełaruskaj Valer Uchnaloŭ. Metaj schodu było stvareńnie ŭ bližejšaj budučyni niepalityčnaha ruchu rabočych, jaki b abaraniaŭ ich pravy. Niahledziačy na deklaravanuju apalityčnaść arhanizacyi, na schod zaprasili palitykaŭ i kiraŭnikoŭ niezaležnych prafsajuzaŭ – Siarhieja Kalakina (PKB), Alaksandra Buchvostava (byłaja Partyja pracy), Anatola Laŭkoviča (sacyjał-demakraty), Hienadzia Fiadyniča (REPAM) dy Alaksandra Jarašuka (Niezaležnyja prafsajuzy).

Bolš čym sam fakt praviadzieńnia schodu, cikavaść vyklikała isnavańnie fondu z takim specyfičnym nazovam. Asabliva kali ŭličyć toje, što kiruje im pradstaŭnik palityčnaj partyi, jakaja ŭvachodzić u kaalicyju demakratyčnych siłaŭ. Ciažka ŭjavić sabie takoje ŭ toj ža Ŭkrainie: lubaja tamtejšaja palityčnaja siła, jakaja b navažyłasia na takoje, sama mała značna zvuziła b pole dla palityčnaj dziejnaści.

Voś što miarkujuć pra heta ŭdzielniki schodu:

Alaksandar Buchvostaŭ, kiraŭnik niezarehistravanaj Partyi pracy: «Na pieršym miescy my bačym abaronu pravoŭ pracoŭnych, asabliva ŭ ciapierašniaj sytuacyi, kali nad usim panuje kantraktnaja systema. Što da «Fondu», to treba zrazumieć, što sabracca takomu pradstaŭničamu schodu ŭ Miensku inšym čynam było b składana. Dyj nazva tut nia maje vyrašalnaha značeńnia. Stvorany fond maje na mecie praanalizavać sytuacyju ŭ roznych sacyjalnych hrupach. Siońnia heta pracoŭnyja kalektyvy».

Anatol Laŭkovič, staršynia BSDP (Hramada): «Pa ščyraści, ja navat nia viedaju pra hety fond amal ničoha, peŭna heta niedziaržaŭnaja arhanizacyja. Nas, palitykaŭ, siudy zaprasili ŭ jakaści haściej. Ad «Hramady» na schodzie było niekalki delehataŭ z rehijonaŭ».

Palitolah Andrej Kazakievič: «Z adnaho boku, kali stvareńnie peŭnaj arhanizacyi nie piarečyć zakonu, to čamu b i nie. Tut hałoŭnaje, jak budzie dziejničać paśla hetaja arhanizacyja, jakija jaje mety i nakolki jany surjoznyja. Ź inšaha boku, ničoha dziŭnaha niama, što partyja -- udzielnica demakratyčnaj kaalicyi -- maje dačynieńnie da stvareńnia fondu z takoj nazvaj – biełaruskija kamunisty nikoli nie chavali svajho bačańnia dačynieńniaŭ z Rasiejaj».

«Usio heta vielmi sumnieŭna», – kaža piśmieńnik Uładzimier Arłoŭ, adkazvajučy na pytańnie pra słušnaść zasnavańnia udzielnikami demakratyčnaj kaalicyi intehracyjnaha fondu. I dadaje: «Heta nahadvaje historyju pra trajanskaha kania».

• 0
• 0
• 0
• 0
• 0
• 0
• 0
• 0