16 pratestantaŭ carkvy «Novaje žyćcio» raspačali haładoŭku

16 viernikaŭ-pratestantaŭ supołki «Novaje žyćcio» pačali biesterminovy post-haładoŭku ŭ budynku carkvy. Hetak jany namahajucca abaranić budynak, jaki, zhodna z sudovym rašeńniem, majuć vyzvalić 9 kastryčnika. Vierniki ličać, što nastupnym krokam uładaŭ stanie likvidacyja supołki.

Vierniki, jakija trymajuć post-haładoŭku, paviedamili «Svabodzie», što da 9 kastryčnika da ich dałučacca jašče niekalki čałaviek. Natalla Kunaŭskaja raspaviała, što budzie ŭdzielničać u akcyi da kanca.

(Kunaŭskaja: ) «Dla nas vielmi važnyja naš budynak, naša ziamla. Heta toje, što nam naležyć. Ja pierad Boham kazała, što chaču, kab niešta źmianiłasia. Muž, dzieci, mama… Jany mianie padtrymlivajuć».

Siarhiej Cierach apavioŭ, što kožny, chto trymaje post, daŭ raśpisku:

(Cierach: ) «Ja, Cierach Siarhiej Ivanavič, daju zhodu na prymusovy vyvad mianie z haładoŭki ŭ vypadku pahrozy majmu žyćciu. Nu, kali ja śviadomaść straču, albo jašče što takoje… Ja ŭsio dobra razumieju».

Palitolah Uładzimier Mackievič dałučyŭsia da postu viernikaŭ-pratestantaŭ:

(Mackievič: ) «My vierym, što Boh adkazvaje na malitvy čałaviečyja. Post – heta padrychtoŭka da taho, kab našaja malitva była ščyraja j praniknionaja. Haładoŭka ŭ poŭnym sensie jość zajaŭkaj na samahubstva. Viadoma, što heta nie pa-chryścijansku, tamu my idziem na vielmi radykalny post. Na hetyja ŭłady my nijakich spadziavańniaŭ nia majem».

Pastar carkvy «Novaje žyćcio» Viačasłaŭ Hančarenka paviedamiŭ «Svabodzie», što vierniki-pratestanty ŭ zamiežžy na znak salidarnaści ź biełaruskimi viernikami buduć ładzić pikiety kala budynkaŭ ambasadaŭ Biełarusi.

Administratar carkvy Vasil Jurevič paviedamiŭ, što vierniki padali zajaŭku ŭ Mienharvykankam na praviadzieńnie mitynhu 21 kastryčnika.

(Jurevič: ) «U hety budynak my ŭkłali častku svajho žyćcia, nu j svaich srodkaŭ taksama. Heta naš druhi dom. Heta baraćba nie za svaju majomaść, a za los pratestantaŭ u Biełarusi, bo naša dziaržava nia choča nas bačyć na našaj ziamli».

Supołka «Novaje žyćcio» naličvaje bolš za tysiaču viernikaŭ. U budynku carkvy płoščaj 1600 kvadratnych metraŭ dziejničaje niadzielnaja škoła. Vierniki ličać, što ciapier, kali ich, faktyčna, pazbavili jurydyčnaha adrasu, ułady mohuć praz sud pačać praceduru likvidacyi supołki pratestantaŭ.

U 2002 hodzie vierniki nabyli na ŭskrajku Miensku były kałhasny karoŭnik i adramantavali za svaje hrošy. Letaś mienskija ŭłady zabaranili ładzić tam nabaženstvy, a sioleta pieraličyli na rachunak carkvy kala 17 tysiač dalaraŭ kampensacyi za budynak. Za hetyja hrošy vierniki nia zmohuć nabyć navat adnapakajovaj kvatery.

• 0
• 0
• 0
• 0
• 0
• 0
• 0
• 0