«Kaliści ja kiravaŭ adździełam pad 40 čałaviek». Cimlid nie znajšoŭ pracu ŭ Polščy i ŭładkavaŭsia kasiram

Valeryj maje 15‑hadovy dośvied pracy ŭ IT na pazicyi hiejmdyzajniera. Da hetaha jon pracavaŭ u prodažach, zajmaŭsia zborkaj PK, viedaje anhlijskuju na ŭzroŭni S1 i bazavuju polskuju. U svaju čarhu, u žonki Valeryja jość dvuchhadovy dośvied u padtrymcy, kapirajtynhu i pierakładzie tekstaŭ (akramia anhlijskaj i polskaj, jana viedaje jašče kitajskuju i finskuju movy).

Za try miesiacy muž i žonka tak i nie zdoleli znajści pracu ŭ Polščy pa śpiecyjalnaści. Žurnalisty Devby.io paprasili Valeryja raskazać pra toje, jak jany apynulisia ŭ takoj situacyi.

Rełakacyja i skaračeńnie

— Historyja składanaja. Čym bolš ja dumaju i źbirajusia z dumkami, tym bolš situacyja ŭhaniaje ŭ depresiju. U vyniku ja budu pracavać u «Žabcy» (Żabka — polskaja sietka nievialikich praduktovych mahazinaŭ farmatu «kala doma»), a žonka ŭ klininh uładkavałasia. A kaliści ja byŭ pradziusaram i kiravaŭ adździełam pad 40 čałaviek.

Ale pa paradku. U 2021 ja pracavaŭ u kampanii WannaPlay (biełaruski raspracoŭščyk i vydaviec mabilnych hulniaŭ) pradziusaram. U tym ža hodzie ja pierajechaŭ u Polšču.

Mahčyma, vy čuli, što paśla pačatku vajny WannaPlay skaraciŭ kala 200 čałaviek, abo amal 90% štata. Heta było źviazana z tym, što ŭsie inviestary syšli z kampanii. A kampanija mocna razbazarvała inviestycyi, nu i hrošy chutka skončylisia.

U vyniku ja patrapiŭ pad skaračeńnie i kinuŭsia šukać pracu. Znajšoŭ za miesiac: vybraŭ pieršaje, što trapiłasia pad ruku za plus-minus dobryja hrošy, i ŭkaciŭsia tudy.

Tut dadam, što finansavaja paduška biaśpieki ŭ nas była pieršapačatkova davoli mahutnaja. Ale zaŭvažnaja jaje častka syšła na pierajezd ź pieravozam rečaŭ i kuplu nieabchodnych pradmietaŭ dla žylla (my źniali jaho amal pustym). Nu, i pakul my adaptavalisia da novaha zarobku i da novych cen, naša «paduška» prachudziłasia vielmi mocna.

«Chajp vakoł NFT zacich, prajekt zahnuŭsia. I pačaŭsia cyrk»

Ja ŭładkavaŭsia na addalenuju pracu ŭ kampaniju z ofisam u AAE, jany tam kryptahulni rabili. Płacili stabilna. A ja pasiŭna šukaŭ alternatyŭnuju pracu. Biez asablivaha entuzijazmu, bo rynak staŭ padać usio macniej. I ŭsiudy prapanoŭvali zarobki nižejšyja, čym byŭ u mianie ŭ hetaj emirackaj studyi.

Tut dadam što žonka tady nie pracavała: finansavaje stanovišča dazvalała nam žyć tolki na moj zarobak. Akramia taho, jakraz pierad našym adjezdam ź Biełarusi ŭ jaje pamior baćka. Zrazumieła, ja nie cisnuŭ na jaje z pošukami pracy ŭ taki momant, tym bolš, što dla nas heta było nie krytyčna.

Pakul ja pracavaŭ u toj emirackaj studyi, Web 3‑hulni paśpiachova pamierli, tak i nie raskruciŭšysia. Chajp vakoł NFT zacich, prajekt zahnuŭsia. Stali dumać, jakuju hulniu rabić dalej, ja zapitčyŭ svaju ideju. I pačaŭsia cyrk!

Hulnia była animešnaja, ź siužetam. I SIEO studyi, vidać, jak fanat-animešnik, staŭ prosta piakielna mikramieniedžaryć. Lez prosta ŭ samyja nietry, pastajanna pušyŭ svaje idei (časta fatalnyja) nad idejami astatnich.

Tam było ŭsio, ad patrabavańniaŭ pierapisvać naratyŭ cełymi raździełami da rašeńnia adklučyć zakupku trafiku ŭ samy prybytkovy dla prajekta siezon. Akramia taho, SIEO zabiŭ doŭhaterminovy retenšn, rekłamnuju manietyzacyju i pałovu ofieraŭ (u hiejmifikacyi tak nazyvajuć prapanovy, jakija z dapamohaj hulniavych miechanik padachvočvajuć karystalnikaŭ da ździajśnieńnia pakupak ci inšych metavych dziejańniaŭ).

U hety pieryjad ja litaralna pałovu času traciŭ na toje, kab spračacca ź im pa kožnaj drobiazi, i na biaskoncyja sazvony.

U dadatak u nas uvohule nie było vychodnych u śviatočnyja dni, nie było balničnych. Plus adpačynak praciahłaściu ŭsiaho ŭ dva tydni i z zachavańniem u hety pieryjad tolki 50% ad zarobku.

Uvohule, pracujučy tam, ja zusim ścich, vyhareŭ i straciŭ matyvacyju šukać niešta ŭ fonavym režymie. Choć časam prylatali narmalnyja ofiery. Praŭda, zarobak u ich prapanoŭvali ŭsio nižej i nižej.

Kali da ŭładalnika kampanii dajšła infa ab vychadkach SIEO, było ŭžo pozna. Kampanija zžerła tonu hrošaj, a hrošy ŭładalnik davaŭ sa svajoj kišeni. Mianie pasadzili ŭsio reanimavać, i ŭ pryncypie ja taki zdoleŭ vyvieści hulniu na prymalnuju dachodnaść. Ale było pozna: hrošy skončylisia kančatkova. U vyniku z kampanii vyhnali ŭsich, akramia džunaŭ, kab jany choć niejak rabili hulniu — i padtrymlivali toje, što mahło zarablać.

«Hladžu na ofiery, jakija ŭ pačatku viasny mnie prysyłali, i łokci kusaju»

Pakul razhortvalisia hetyja padziei, maja žonka ŭładkavałasia ŭ sapport amierykanskaj ambasady i ŭžo paŭhoda tam pracavała. I tut zdaryŭsia razvarot palityki ZŠA, źviazany z abrańniem Trampa. Jon daŭ admašku zhortvać uvieś ruskamoŭny sapport. Dadam tut, što žonka pracavała nie tolki z rasijanami, ale i z ukraincami, biełarusami, ruskamoŭnymi hramadzianami krain Bałtyi. Ale ŭ vyniku ŭsich vyhnali, a adździeł zakryli.

Chranałahična śpiarša letam zvolnili žonku, a potym mianie. Pakul u nas zastavałasia choć niejkaja paduška, my šukali pracu pa profili. Ale kali ŭ nas nie zastałosia amal ni kapiejki, my stali sprabavać uładkavacca ŭžo choć kudyści.

Viasnoj rekruciory jašče sami mnie pisali, ale mnie tady zdavałasia, što ŭ nas na prajekcie ŭsio plus-minus narmalna. Ź leta ja staŭ pisać im sam, spačatku laniva, potym usio bolš aktyŭna. Ale adkazaŭ nie było ŭvohule. U rešcie rešt ja pačaŭ masava rassyłać vodhuki na vakansii, i adkazy narešcie pajšli. Praŭda, usie jak pad kapirku: vaš dośvied u apošnija try-piać hadoŭ nie karelujeccaz našym profilem.

Tolki adna ejčar mnie padrabiazna raśpisała, što z-za kryzisu na rynku ciapier stała nastolki šmat kandydataŭ, što možna znajści navat 100%-y metč na samuju vuzkuju śpiecyjalizacyju. Tamu niešta inšaje jany navat nie razhladajuć. Jana ž raskazała, što na kožnuju vakansiju joj lacić u siarednim pa 60‑80 vodhukaŭ u sutki.

Ja hladzieŭ statystyku na polskim sajcie pa pošuku hiejmdeŭ-vakansij skillshot.pl. Tam na niekatoryja vakansii moža prylacieć da tysiačy vodhukaŭ! Tak što ja, u pryncypie, razumieju ciapierašni vybar studyj. Tolki mnie ad hetaha nie lahčej.

Naprykład mnie, jak IP, treba apłačvać uznosy ŭ ZUS [polski anałah FSAN]. A jon śpiecyfična ličycca: pamier apłaty pierahladajuć usiaho raz na hod, i dalej ty choć try razy straci pracu, a płacić pavinien tak, jak paličyli.

Tamu zamarožvaju IP, kab jano hrošy bolš nie žerła. I tak za dva miesiacy nakapała 4400 złotych (1050 jeŭra) daŭhoŭ pa im. I heta jašče nie ličačy padatkaŭ!

Čamu «Žabka»?

Voś tak u vyniku ja staŭ hanarovym kasiram «Žabki», a žonka klinieram. Ciapier hladžu na ofiery, jakija jašče ŭ pačatku viasny mnie prysyłali, i łokci kusaju. Nu dy što ž zrabić.

Na «Žabcy» daviałosia spynicca, bo skončylisia finansy. I pierada mnoj ustała pytańnie: na što ŭvohule žyć?

«Žabka» — heta takoje miesca, dzie całkam dastatkova polskaj na ŭmoŭnym uzroŭni A2. Akramia jaje, ja hladzieŭ, naprykład, zavody. Ale da ich jechać pa paŭtary hadziny, a «Žabka» znachodzicca litaralna ŭ maim domie. Nu i sumoŭjaŭ na jaje niama, jak i na lubuju čarnavuju pracu. Prynamsi, ja nie bačyŭ.

Pa hrošach ciapier, viadoma, prosta piekła. «Žabka», zrazumieła, nie vyrašyła ŭsich prablem. U hetym miesiacy my ŭžo nie možam tołkam zapłacić za žyllo, dziakuj bohu, chutka damova najmu zakančvajecca, i budziem źjazdžać.

Nam ciapier doraha žyć u hetaj kvatery.

• 1
• 0
• 6
• 6
• 2
• 24
• 1
• 0