Back in the USSR – heta nia tolki karaokie hitoŭ 60-ch, adnak taksama adradžeńnie najlepšych savieckich žurnalisckich tradycyjaŭ. Feljeton Lolika Uškina.
Back in the USSR – heta nia tolki karaokie hitoŭ 60-ch, adnak taksama adradžeńnie najlepšych savieckich žurnalisckich tradycyjaŭ. Feljeton Lolika Uškina.
Padpisnaja kampanija blizkaja da apahieju, i redaktaram dziaržaŭnych vydańniaŭ, naprykład, Paŭłu Izotaviču, śled užo krepka padumać, jak pavialičyć chieŭru padpisčykaŭ.
Naturalna, možna nadalej adtočvać instrumentar adminprymusu: naprykład, paviesić na Sulimavu kalonku ab chatnich žyviołach i zabaviazać padpisacca na «SB» usich siabroŭ klubaŭ amataraŭ papuhajaŭ.
Mahčymy markietynhavy krok: u kantekście rostu ŭ krainie kolkaści narkamanaŭ zapuścić čutku, što pieradavicy Źmitra Krata ab roście dabrabytu, kali try razy čytać naadvarot, vyklikajuć efekt prychodu, roŭny dvum kasiakam «čujki».
Ja, adnak, prapanuju novy, efektny srodak, jaki chutka pavialičyć kolkaść abanentaŭ dziaržaŭnych ŚMI za košt... apazycyjaneraŭ.
Naturalna, vy skažacie, što ja – krejzi. Apazycyjaneram, jakich u nas, zhadzieciesia, nia mała, «Saŭbiełka» patrebnaja chiba što z metaj vykštałconaj pomsty – chadzić z orhanam administracyi ŭ M-Ž.
Čytać «Saŭbiełku», skaža vam luby admarozak, – toje ž samaje, što ŭ svoj čas hartać savieckuju presu: hazeta nahadvaje praktyčny dapamožnik dla neŭrotykaŭ, jakija lekujucca seansami aŭtatreninhu: usio narmalna… voś prezydent aptymizavaŭ štat Kamitetu dziaržkantrolu… usio narmalna… voś u Łahojskim rajonie pabudavali ahraharadok… ja absalutna spakojny...
Adnak treba zhadać, što ŭ časy lehiendarnych tannych partvajnaŭ «Ahdam» i «777» isnavaŭ admysłovy kod razumieńnia aficyjoznych prahonaŭ.
Naprykład, ab palityčnym upłyvie aparatčyka na kankretny momant sudzili z dystancyi, jakuju jon trymaje ad hiensieka padčas niejkaha puper-važnaha rytuału, kštałtu pracedury machańnia rukami na kramloŭskaj trybunie hrupie himnastaŭ.
Kali «Pravda» pisała ab tym, što spažyvańnie miasa vyklikaje rost kryvianoha cisku, usie prasiakali, što planu pa miasanarychtoŭkach iznoŭ hamon i treba biehčy zapasacca kanservami.
Najlepšyja tradycyi saŭka pavinny adradzicca na staronkach prezydenckaha ruparu, paviarnuŭšy jamu status palityčna zubastaha vydańnia!
Treba prosta raspracavać kod, z dapamohaj jakoha treba čytać teksty i hladzieć fotki na staronkach «Saŭbiełki».
Pierš za ŭsie nieabchodny słoŭnik ezopavaj movy. Hałoŭnuju rolu musiać adyhrać zvyčajna dapamožna-neŭtralnyja ŭ skazie prysłoŭje i prymietnik. Naprykład: leksyčnyja adzinki «efektyŭna» (pierakład: z-pad pałki, pa raznaradcy), «aktyŭna» (na pakazuchu), «aŭtarytetna» (adstojna) i, narešcie, «stabilna» (durań toj, chto ŭ heta pavieryć).
Jak buduć palityčna vostra i pryvabna dla vucha apazycyjanera hučać frahmenty nudnych artykułaŭ «SB»: «Praciahvajecca aktyŭny rost ahraharadkoŭ», «Aŭtarytetny siarod moładzi beeresemaviec», «Rasieja – Biełaruś: čas supracoŭničać stabilna!».
Začytajcie pierakład lubomu baćkafobu, i jahonaj pieršaj reakcyjaj, harantuju, budzie: «Dzie možna padpisacca na Saŭbiełku?»
Kamientary