Sienatar Durbin: Łukašenka stvaryŭ niaviedamy ŭ suśvietnaj palitycy precedent

U Biełarusi z aficyjnym vizytam pabyvaŭ sienatar Ryčard Durbin. Ciaham dnia jon sustreŭsia ź siemjami palitviaźniaŭ, pradstaŭnikami ŚMI i ministram zamiežnych spraŭ Siarhiejem Martynavym. Na vynikovaj presavaj kanfierencyi jon zaklikaŭ Alaksandra Łukašenku vyzvalić biełaruskich palitviaźniaŭ i spynić kryzis, jaki maje miesca ŭ krainie siońnia.

Ryčard Durbin pryjechaŭ u Biełaruś treci raz. Dva hady tamu ŭ składzie amierykanskaj delehacyi jon sustrakaŭsia z Alaksandram Łukašenkam. Hetym razam Łukašenka jaho nie pryniaŭ.

Metaj svajho vizitu Ryčard Durbin nazvaŭ žadańnie dać jasna zrazumieć biełaruskamu narodu, što za akijanam vielmi ŭvažliva adsočvajuć padziei, jakija adbyvajucca ŭ Respublicy Biełaruś: «Dziejańni biełaruskich uładaŭ, jakija aryštavali bolš za 600 apazycyjnych aktyvistaŭ, a taksama toje, što piać kandydataŭ u prezydenty byli aryštavanyja, a jašče dva kandydaty zastajucca ŭ statusie padazravanych pa kryminalnaj spravie, stvarajuć niaviedamy va ŭsiaśvietnaj palitycy precedent. U krainie nie moža być demakratyčnaj formy kiravańnia, kali projhryš na vybarach Łukašenku aznačaje nakiravańnie naŭprost u turmu», — zajaviŭ amerykanski sienatar.

Padziei ŭ Biełarusi, rašeńni administracyi Łukašenki nie zastalisia niezaŭvažanymi ni ŭ ZŠA, ni ŭ Jeŭrasajuzie, zajaviŭ spadar Durbin.

Sienatar zaklikaŭ biełaruskija ŭłady vyzvalić palitviaźniaŭ, nieadkładna spynić cisk na ich siemji i na advakataŭ. Jon zaznačyŭ, što nielha mirycca z tym, što viaźniam KDB nie dajuć mahčymaści sustrakacca z advakatami, pierapisvacca ź siemjami i atrymlivać naležnaje miedyčnaje absłuhoŭvańnie.

Toje, što biełaruski KDB siońnia pieraškodziŭ Volzie Niaklajevaj uziać udzieł u sustrečy ź im, pačaŭšy ŭ jaje doma ŭ čas spatkańnia pieratrus, a ŭčora nie daŭ vyjechać u Varšavu Miłanie Michalevič, sienatar Durbin nazvaŭ całkam nieprymalnym parušeńniem pravoŭ čałavieka.

Raskazvajučy pra svaju praciahłuju razmovu ź ministram zamiežnych spraŭ Biełarusi Siarhiejem Martynavym, sienatar Durbin skazaŭ, što ich pohlady na situacyju ŭ Biełarusi byli zusim roznyja. U pryvatnaści, Martynaŭ vykazvaŭ zadavalnieńnie tym, jak prajšli vybary ŭ Biełarusi, a sienatar, u svaju čarhu, spytaŭsia — a kolki čałaviek vyrašać uziać udzieł u nastupnych prezydenckich vybarach u Biełarusi, kali ŭ vyniku ciapierašniaj kampanii bolšaść kandydataŭ apynułasia ŭ turmie? Adkazu nie było. Spadar Martynaŭ na ŭsie pytańni amierykanskaha sienatara pra los zatrymanych, pra ŭcisk advakataŭ adkazvaŭ: «Źviartajciesia ŭ Miniust».

Sienatar Durbin taksama paviedamiŭ, što ŭčora jon abmierkavaŭ biełaruskija padziei z kiraŭnictvam Litvy, i zaznačyŭ, što jano vielmi zaniepakojenaje situacyjaj u Biełarusi.

Pra nastupnuju reakcyju ZŠA na padziei ŭ Biełarusi, pra mahčymyja novyja sankcyi adnosna biełaruskich uładaŭ Ryčard Durbin zajaviŭ: «Ja źbirajusia abmierkavać heta ź dziaržaŭnym sakratarom Chiłary Klintan, z pradstaŭnikami Biełaha doma — nakont taho, jakija dalejšyja dziejańni pavinny być ździejśnienyja. Ale ja ščyra spadziajusia, što nie budzie patreby rabić ničoha, ja spadziajusia, što prezident Łukašenka zrazumieje, jak heta niespraviadliva i niesumlenna, i sam prymie rašeńnie spynić hety kryzis. Jon moža heta zrabić. Jon moža vyzvalić palitviaźniaŭ, jon moža zabiaśpiečyć spraviadlivyja jurydyčnyja pracedury i ŭsio zrabić jak u narmalnym demakratyčnym hramadstvie».

• 0
• 0
• 0
• 0
• 0
• 0
• 0
• 0