Dźmitryj Vus schudnieŭ na 20 kh, ale admaŭlajecca pisać prašeńnie Łukašenku
Z byłym kandydatam na prezidenta ŭ mahiloŭskaj kalonii №19 sustrełasia žonka Jaŭhienija.
Z byłym kandydatam na prezidenta ŭ mahiloŭskaj kalonii № 19 sustrełasia žonka Jaŭhienija. «Schudnieŭ bolej jak na 20 kiłahramaŭ, ale badziory i kaža, što ni ŭ jakim razie nie padpiša list Łukašenku ab pamiłavańni».
«Pastryhli jaho, -- kaža Jaŭhienija. -- Ale nie zusim, krychu vałasoŭ zastałosia. Trymajecca małajcom. Skazaŭ, davali padpisać papieru, što vinu svaju pryznaje i abiacaje stać na šlach vypraŭleńnia, ale jon admoviŭsia. Jamu pahražali karcaram. Jon skazaŭ, što možacie kudy chočacie sadžać, ale ničoha padpisvać nie budu. Dyk jamu skazali, što da kasacyi čapać nie buduć, ale, maŭlaŭ, raniej ci paźniej jon kančatkova trapić u ichnyja ruki i tady jany viernucca da hetaj razmovy».
Jaŭhienija Vus pierakazała mužu słovy Alaksandra Łukašenki, jaki dniami zajaviŭ adnosna mahčymaha vyzvaleńnia palitviaźniaŭ, što kali da jaho źviernucca piśmova z prośbaj ab pamiłavańni, jon moh by hetyja prośby razhledzieć. «Dla siabie takuju mahčymaść Dźmitryj rašuča adchiliŭ», — kaža žančyna.
Kaža, što lepš tut adsiedzić hetyja 5 z pałovaj hadoŭ, čym budzie pierad im prynižacca i prasić.
Pavodle Jaŭhienii Vus jaje muž pierakanany, što ŭvieś termin jamu ŭsio roŭna nie daviadziecca adsiedžvać, bo «ŭładu pryciśnie ekanamičnaja situacyja». Siarod viaźniaŭ, jakija siadziać razam ź Dźmitryjem Vusam, šmat biznesoŭcaŭ, u tym liku dastatkova viadomych. Bolšaść padtrymlivaje jahonyja mierkavańni i prahnozy adnosna kanca hetaha režymu. «Rozum pieramoža marazm», — paŭtaryła Jaŭhienija słovy muža.
«Vielmi schudnieŭ, asunuŭsia, tvar chudy. Raniej važyŭ kala 130 kilahramaŭ, ciapier 104», -- raskazała žonka Vusa.
Žančyna adznačaje čyściniu u turemnych kalidorach i pakojach, dobraŭparadkavanaść terytoryi i karektnyja pavodziny supracoŭnikaŭ administracyi.
Kamientary