Niaklajeŭ atrymaŭ papiaredžańnie kryminalna-vykanaŭčaj inśpiekcyi za ŭdzieł u Narodnym schodzie

Eks-kandydat u prezidenty Uładzimir Niaklajeŭ, lidar hramadzianskaj kampanii «Havary praŭdu!», 10 kastryčnika atrymaŭ papiaredžańnie kryminalna-vykanaŭčaj inśpiekcyi Leninskaha RUUS Minska za ŭdzieł u Narodnym schodzie, jaki adbyŭsia 8 kastryčnika ŭ stalicy i šerahu inšych biełaruskich haradoŭ.

Jak paviedamiŭ Niaklajeŭ BiełaPAN, 8 kastryčnika supracoŭniki pravaachoŭnych orhanaŭ da jaho prychodzili trojčy: pra niedapuščalnaść udziełu ŭ niesankcyjanavanaj akcyi jaho papiaredzili pierad schodam, adrazu paśla mierapryjemstva i ŭviečary. Padčas adnaho ź vizitaŭ palityku ŭručyli pozvu, zhodna jakoj jon musiŭ pryjści ŭ kryminalna-vykanaŭčuju inśpiekcyju ŭ paniadziełak, 10 kastryčnika, a 12-j hadzinie.

«Ja siońnia ŭ ich źjaviŭsia, i jany mnie ŭručyli aficyjnaje papiaredžańnie, — paviedamiŭ Niaklajeŭ. — Tym samym jany papoŭnili tečku, jakuju jany źbirajuć u sud. Hetaja inśpiekcyja, vidavočna, robić usio pad ciskam inšaj „inśpiekcyi“, bo pa ich tvarach było bačna, što jany sami nie chacieli da mianie prychodzić, vypisvać papiaredžańnie».

U papiaredžańni inśpiekcyi zaznačajecca, što Niaklajeŭ parušyŭ zakanadaŭstva i pry paŭtornym parušeńni jaho sprava budzie nakiravana ŭ sud. Eks-kandydat adznačyŭ, što na dakumiencie jon napisaŭ, što nie zhodny z papiaredžańniem, što «prysud niezakonny» i jon jaho «nie prymaje».

Palityk skazaŭ, što jon adziny z byłych źniavolenych atrymaŭ papiaredžańnie za ŭdzieł u schodzie. «Ja nie viedaju, čamu heta tak», — skazaŭ jon, dadaŭšy, što, vierahodna, «jość ustanoŭka».

3 kastryčnika lidaru «Havary praŭdu!» užo vynosili aficyjnaje papiaredžańnie, źviazanaje ź jaho pajezdkaj 27–30 vieraśnia ŭ Varšavu na samit Uschodniaha partniorstva. Zhodna z rašeńniem suda, Niaklajevu zabaroniena vyjazdžać za miažu.

Nahadajem, 20 maja sud Frunzienskaha rajona Minska pryznaŭ Uładzimira Niaklajeva vinavatym pavodle č. 1 art. 342 Kryminalnaha kodeksa (arhanizacyja i padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich) i pryhavaryŭ da dvuch hadoŭ pazbaŭleńnia voli z adterminoŭkaj vykanańnia prysudu na dva hady. Niaklajeŭ pavinien rehularna adznačacca ŭ milicyi, viartacca dadomu nie paźniej za 22.00, infarmavać milicyju pra svaje pajezdki.

9 vieraśnia sud Leninskaha rajona Minska nakłaŭ na asudžanaha palityka dadatkovyja abmiežavańni pry adbyćci pakarańnia. Niaklajevu, u pryvatnaści, zabaroniena vystupać arhanizataram abo ŭdzielnikam masavych šeściaŭ, demanstracyj, pikietaŭ i inšych masavych mierapryjemstvaŭ; jon nie moža vyjazdžać za miežy Minska bieź piśmovaha dazvołu pravaachoŭnych orhanaŭ i pakidać miežy Biełarusi da zakančeńnia terminu pakarańnia. Palityku taksama pradpisana rehistravacca ŭ pravaachoŭnych orhanach pa miescy žycharstva raz na tydzień i znachodzicca doma štodnia z 20.00 da 6.00.

• 0
• 0
• 0
• 0
• 0
• 0
• 0
• 0