Łaźnia na dvaich

Łaźnievy biznes na postsavieckaj prastory mocna abaviazany stvaralniku «Ironii losu» Eldaru Razanavu.

Hety epachalny saviecki film pa siońnia zabiaśpiečvaje amal 100-pracentnuju zapaŭnialnaść łaźniaŭ na Novy hod i, adpaviedna, vysokija prybytki ich haspadaram. «Kali b sustreŭ Razanava, prastaviŭ by jamu dobraha kańjaku», — pryznaŭsia «NN» Ihar, uładalnik katedža z saŭnaj u centry Minska.

Jość i inšaje mierkavańnie: sustreć Novy hod u łaźni — heta značyć, uvajści ŭ jaho čystym, zdarovym i adnoŭlenym, pakinuŭšy ŭsie turboty ŭ hodzie minułym.

Zaraz u Minsku i navakolli jość bahaty vybar łaźniaŭ i saŭnaŭ. Ich kolkaść pavialičvajecca. Na adnym tolki sajcie Parilka.by naličvajecca bolš za 60 takich ustanovaŭ.

Darečy, «łaźnia» i «saŭna» — pa sutnaści, tojesnyja razumieńni. I pieršaje, i druhoje spryjaje vyviadzieńniu šłakaŭ z arhanizmu praz potavydzialeńnie. Prosta ŭ śviadomaści bolšaści ludziej saŭna asacyjujecca ź Finlandyjaj ci Turcyjaj.

Asnoŭnyja paramietry, pa jakich łaźnia adroźnivajecca ad saŭny, — tempieratura i vilhotnaść pavietra. Saŭna praduhledžvaje najaŭnaść basiejna.

Isnujuć i bolš ekzatyčnyja sposaby prapacieć z karyściu dla zdaroŭja.

Infračyrvonaja saŭna ŭjaŭlaje saboj draŭlanuju kabinu, u jakoj ustalavanyja śpiecyjalnyja IČ-nahravalniki. Kabina nahrajecca za 15 chvilin. Niahledziačy na nievysokuju tempieraturu, pot dobra vydzialajecca, a arhanizm prahrajecca nadzvyčaj hłyboka.

A voś kryasaŭna — poŭnaja procilehłaść paryłki. U kryasaŭnie vy ciaham troch chvilin «paryciesia» ŭ vadkim azocie pry tempieratury minus 130 hradusaŭ! Ličycca, što takaja pracedura maje amaładžalny effiekt.

Furaka (afura) — tak zaviecca draŭlanaja bočka, jakuju zapaŭniajuć albo piłavińniem, albo haračaj (ci chałodnaj) vadoj. Draŭlanaje piłavińnie padahrajuć da 50°S. Čałaviek «akunajecca» ŭ piłavińnie pa hrudzi. Pry hetym hałava i serca mocna nie nahrajucca, što važna dla hipiertonikaŭ i ludziej ź inšymi zachvorvańniami. Nahretaje piłavańnie nie tolki sahraje, ale i masiruje cieła.

Dla bolšaści biełarusaŭ naviedvańnie saŭny chutčej sposab adpačyć u kampanii siabroŭ, a nie azdaraŭleńnie.

Časam za pivam, kaljanam, biljardam, basiejnam, masažam ci čymści jašče naviedniki saŭnaŭ uvohule zabyvajuć, navošta jany siudy pryjšli: paparycca.

Darečy, pra «štości jašče». Sa słoŭ Ihara, akazańnie intymnych pasłuhaŭ u saŭnach — heta pieražytki epochi 90-ch. Uzhadajem «Brata-2», dzie hałoŭny hieroj z pryjacielami vyrašaje pytańni ŭ łaźni, a na zadnim fonie milhajuć aholenyja dziaŭčyny. Zaraz prośba «vyklikać dziaŭčat» — chutčej vyklučeńnie z praviłaŭ.

Sama ž tradycyja chadzić u łaźniu pa parach zakładzienaja ŭ našych hienach, ličyć Ihar. Dzie, kali nie ŭ łaźni, začynalisia našy prababuli i pradziaduli? Moža, tamu ich minuła chalera, jakaja zabrała žyćci pałovy Jeŭropy. Cikava, što anhlijskaja karaleva Lizavieta I (XVI st.) myłasia raz na try miesiacy. A ispanskaja Izabieła Kastylskaja (XV st.) — uvohule dvojčy za svajo žyćcio: kali naradziłasia i kali vychodziła zamuž.

Niekatoryja łaźni prapanujuć pasłuhu «łaźnia dla dvaich». Jość admysłovyja prahramy dla maładych.

Ceny ŭ łaźniach Minska pačynajucca ad 20 tysiač rubloŭ za naviedvańnie (hramadskija łaźni). Za 80–150 tysiač za hadzinu možna arandavać saŭnu na 8–12 čałaviek.

Saŭny-luks adroźnivajucca daražejšaj meblaj, technikaj i łaźnievym abstalavańniem. Naprykład, basiejn moža być z džakuzi, a dezinfiekcyja vady — na asnovie aktyŭnaha kisłarodu, što nie razdražniaje skuru. Za dadatkovuju płatu možna naniać banščyka, jaki voźmie na siabie ŭsie kłopaty pa nahravańni i padtrymańni tempieratury ŭ łaźni. Siaredniaja cana — ad $30 (na dvaich) da $80 (dla kampanii da 8 čałaviek) za hadzinu. U navahodniuju noč ceny ŭ darahich saŭnach pačynalisia ad $300.

• 0
• 0
• 0
• 0
• 0
• 0
• 0
• 0