Andrej Rasinski. Kadry

Biełaruskaje porna i irlandzki transseksuał

Seksualnyja hulni ŭ karcinach "Jašče pra vajnu" Piatra Kryvastanienki i "Śniadanak na Plutonie" Niła Džordana


Jašče pra vajnu

Śniadanak na Plutonie

BT, 19.55

Jašče pra vajnu (Jeŝio o vojnie)

Biełaruś, 2004, kalarovy, 55 chv.

Režyser: Piotr Kryvastanienka

Roli vykonvajuć: Śviatłana Kažamiakina, Anatol Kot, Viera Palakova, Alaksandar Kananovič

Žanr: Vajskovaja meladrama pavodle apovieści Viktara Kanieckaha "Chto hladzić u abłoki"

Adznaka: 3 (z 10)

U apošniaj pradukcyi «Biełaruśfilmu» — «Jašče pra vajnu» — ekran to zalijecca letnim i lohkim trapiatkim śviatłom, to ŭ kadry paŭstanuć strymanyja zaśniežanyja drevy, a niaŭłoŭny čałaviečy adbitak zadryžyć u zamierzłaj sažałcy.

Tvorca hetych pieknych i prazrystych vyjavaŭ — adna z najlepšych aperatarak Taciana Łohinava. Ale bolš pra film skazać niama čaho. Dakładniej, filmu jak takoha niama.

Jość eklektyčnaja i nikčemnaja historyja «Muž viarnuŭsia z kamandziroŭki», dzie apošniaja moda — čyścieńkija vajskovyja šyneli, a hukavy fon — uračystyja paviedamleńni Infarmbiuro. (Scenar Izoldy Kaviełašvili pavodle apovieści Viktara Kanieckaha).

Jość dźvie hieraini-medsiaściorki, jakija nieviadoma ź jakoj chalery paracca ŭ łaźni i aholenyja biehajuć pa śniezie – što musić aznačać liryčnyja pakuty j rassłableńnie. Zrešty, navat apranutaja žančyna ŭ karcinie vyhladaje nieprystojna: tupyja vočy, chrypły podych, dotyk – i aničoha ŭnutry.

Ź miascovaha kalarytu – staraja babka, jakaja sprabuje razmaŭlać na trasiancy.

Anatol Kot u roli aburanaha muža sprabuje ažyvić hetuju kardonavuju pustatu, ale jahonamu mahutnamu talentu patrebnyja inšyja režysery.

Nieviadoma, na jakuju aŭdytoryju raźličany hety debiut Piatra Kryvastanienki.

Vieteranaŭ nie paradujuć eratyčnyja štampy. Adnak jašče paračka takich filmaŭ – i "Partyzanfilm" śmieła možna pierajmianoŭvać u "Pornafilm".

NTV, 22.50

posterŚniadanak na Plutonie (Breakfast on Pluto)

Irlandyja – Vialikaja Brytanija, 2005, kalarovy, 135 chv.

Režyser: Nił Džordan

Roli vykonvajuć: Kilijan Merfi, Łajam Nisan, Rut Neha, Łoŭrens Kinłen, Styven Ry, Brendan Hlisan, Konar MakIvoj, Hevin Frajdej

Žanr: Kamedyjnaja drama

Adznaka: 7 (z 10).

Irlandzkamu śviataru (Łajam Nisan) padkidajuć dzicia. Chłopčyk vyras u pryjomnaj siamji, nafarbavaŭ vusny, načapiŭ dziavočyja apranachi – i rušyŭ u Londan šukać bijalahičnuju maci. Londan 70-ch sustreŭ transvestyta anhielska-irlandzkimi bojkami, vybuchami j złymi mańjakami…

Irlandzki režyser Nił Džordan – virtuozny majstar hratesku. To ŭ centry ŭvahi niestandartnaja siamja kryvasmokaŭ («Interviju z vampiram»), to kachańnie da transseksuała padryvaje padpolnuju baraćbu («Aburalnaja hulnia»).

Surjoznyja mužčynskija hulni – vajna, teror, palicyjnyja akcyi – efektna travestujucca ŭ «Śniadanku» nia stolki samim hierojem (hienijalnaja hulnia Kilijana Merfi), kolki ŭsioj hlamurnaj estetykaj 70-ch. Malimonnyja farbončyki j karunki, ružovaje j strakataje, pačućciovyja piesieńki pra kachańnie (saŭndtrek – fiška filmu).

Lehkadumnaje apaviadańnie viaduć ptuški malinaŭki (!), televizijnyja pryhažuni – i sam hieroj, jaki dziavočym počyrkam vyvodzić čarhovuju staronku svaich pryhodaŭ. Hetyja pryhody złamali b i Švarcenehiera, ale Patryk śmieła flirtuje na rasstrele (adna z samych śmiešnych scenaŭ karciny), davodzić turemščykaŭ da šalenstva i neŭtralizuje mańjaka tannymi duchami.

Jon chacieŭ znajści maci – a sustreŭ baćku, jaki prypiorsia na pip-šoŭ i spaviadaŭsia «Patrycyi» ŭ svaich hrachoch. Scenka paŭtaraje znakamity epizod ź filmu «Paryž–Techas» Vendersa, ale raskviečanaja iraničnymi tanami. Ź nia mienšaj ironijaj – i z bolšym nadryvam – paŭtoryć Džordan i sceny hipnozu (aryhinał – «Nočy Kabiryi»), dzie lamant pa zhublenaj maci vybuchnie rohatam sytaje publiki.

Ale samyja strašnyja ździeki patonuć u błakitnych vačoch, a surjoznaść spasuje pierad hulnioj.

Kilijan Merfi («Dyskaśvińni», «Načny rejs») demanstruje ihru ekstraklasy. Jaho papiarednija hieroi byli mańjakami j apantanymi zakachanymi. Patryk-Kiten – biaźvinnaja istota nia z hetaha śvietu, čaho dla padryvu surjoznaści paspalitaje publiki dastatkova. Merfi naminavaŭsia na «Załaty hlobus» za najlepšuju mužčynskuju rolu ŭ kamedyi.

Usie filmy

Kamientary

Ciapier čytajuć

Vyjšaŭ na svabodu były top-žurnalist ANT Dźmitryj Siemčanka9

Vyjšaŭ na svabodu były top-žurnalist ANT Dźmitryj Siemčanka

Usie naviny →
Usie naviny

Sienatar Hrem anansavaŭ rekordnyja pastaŭki zbroi Ukrainie paśla zaŭtrašniaj zajavy Trampa14

U Minsku zakryłasia sietka biudžetnaha fastfudu1

Pry pajezdcy ź Biełarusi ŭ Polšču na miažy čakać tolki 6 hadzin, a nazad — sutki2

Biełaruska za svoj košt arhanizavała śviata ŭ rodnaj vioscy, jakaja amal vymierła. Pryjechali adnaviaskoŭcy navat ź Jeŭrasajuza21

U sacsietkach zavirusiŭsia rolik z kaniom, jaki čakaje aŭtobusa na Mahiloŭ VIDEA1

Biełavieškin: «Aziempik» prosta instrumient, a nie niejki cud, jaki ŭsim univiersalna padychodzić4

Najbolš za červień padaraželi buraki, a patańnieła avakada

«Naturalnaja spakusa — uvapchnuć u siabie ŭsio, pra što ŭ niavoli zastavałasia tolki mroić». Były palitviazień Karniej raskazaŭ pra turemny racyjon i jak ad jaho adychodzić4

U Dziaržynsku ŭ dvary doma zaŭvažyli viarbluda VIDEA

bolš čytanych navin
bolš łajkanych navin

Vyjšaŭ na svabodu były top-žurnalist ANT Dźmitryj Siemčanka9

Vyjšaŭ na svabodu były top-žurnalist ANT Dźmitryj Siemčanka

Hałoŭnaje
Usie naviny →

Zaŭvaha:

 

 

 

 

Zakryć Paviedamić