Pucin — prykład taho, što samy razumny palityk niazdatny, kali sistema zahannaja. Piša Andrej Dyńko.
Jon nie pje, jak Brežnieŭ, nie chvareje, jak Andropaŭ, i nie paranoik, jak Stalin.Jon nie prastak, jak Mikitka, i nie stary, jak Čarnienka. Jon nie robić reformaŭ, jak Harbačoŭ, i nie demakrat, jak Jelcyn. Jon nie čajnik u ekanomicy i biaśpiecy. Jon pracazdolny i arhanizavany.
Lepšaha vybaru ŭ prychilnikaŭ mocnaj ruki i nacyjanalistyčnaha kursu być nie moža.I voś ža ŭdača — Pucin trapiŭ u pieryjad histaryčna rekordnych, kaśmična vysokich cenaŭ na enierharesursy, jakija ŭtvarajuć lvinuju dolu prybytkaŭ Rasii. Karaciej, usio syšłosia.
Što ž my majem u vyniku?
Rasijski VUP sioleta vyraście na pracenty 3. Zusim mała, kali ŭličyć, što barel nafty kaštuje za 100 dalaraŭ. Pa-za naftahazavaj śfieraj VUP uvohule... nie raście.
Nasielnictva Rasii praciahvaje skaračacca ŭsie hady kiravańnia Pucina. Heta pry tym, što ŭ Rasiju vałam valać hastarbajtary z susiednich krain — biednych, a časta naŭmysna daviedzienych da halečy zadziortymi koštami hazu.
Rasijskaja infrastruktura... Jaje kožny moža pabačyć — pierajedźcie miažu pad Smalenskam.
Kapitał uciakaje z Rasii. Zarabiŭšy hrošy, rasijanin nie choča žyć u Rastovie, jon kuplaje sabie kvateru ŭ Ńju-Džersi.
Prablema Pucina dubl dva ŭ tym, što jamu bolš niama na kaho kivać.Jon kiruje Rasijaj užo 12 hadoŭ. (Łukašenka Biełaruśsiu — až 18, i jon u takoj samaj situacyi.) Heta raniej byli vinavatyja kamunisty, razvał Sajuza, Jelcyn. I na Zachad nie śpichnieš viny — palityka ž samastojnaja. (U Biełarusi ciapier sprabujuć valić na vizavyja sankcyi — śmiech.)
Pry ŭsioj sile Pucina-palityka źmianić, palepšyć Rasiju jamu nie ŭdałosia.Jon zastajecca papularnym, bo naftahazavyja dachody dazvalajuć padnimać zarobki. Ale madel, jakaja zachoŭvaje šmatlikija rysy savieckaha ładu i navat, hłybiej, dasavieckaj Rasii, praciahvaje padtočvać krainu z hihanckimi resursami.
I heta maje jasnyja ekanamičnyja tłumačeńni.
Demakratyja — heta samaja ekanomnaja sistema. Pucin admoviŭsia jeŭrapieizavać palityčny ład i hramadstva — ale aŭtarytaryzm kaštuje hrošaj.
Pucin admoviŭsia adpuścić na svabodu narody Kaŭkaza — ale łajalnaść treba kuplać.
Pucin bačyć stratehičnaj metaj zachavać impieryju, chaj u miakkaj formie, tamu i spansaruje adzin tolki ŭ režym Łukašenki miljardaŭ na siem dalaraŭ u hod.A taki Łukašenka ŭ Kramla nie adzin. Heta tyja samyja hrošy, na jakija možna było b adbudavać darohi i adpravić durniaŭ na kurort — dźvie adviečnyja rasijskija prablemy.
12 hadoŭ kiravańnia Pucina kali što i pakazali, dyk toje, što Rasii dla sapraŭdnaha raźvićcia patrebnyja dalejšyja rynkavyja reformy, a taksama toj duch kankurencyi i tvorčaści, jaki zabiaśpiečvajecca ŭ zachodniaj madeli hramadstva.Rasijskaja elita razumieje heta, ale cynična zachoŭvaje stary ład, bo pry im... praściej uzbahačacca. Na radaść plebsu praskrypcyi padvierhli Bierazoŭskaha, Chadarkoŭskaha, ale ž lehijony roŭnych im praciahvajuć kupacca ŭ naftadalarach. I siabry Pucina siarod ich.
Niama pryčyn dumać, što adnosiny Rasii ź Biełaruśsiu ŭ treciuju šaścihodku Pucina buduć istotna inakšymi, čym raniej.Zastaniecca i fundamientalnaja prablema hetych adnosin — toje, što ŭ ramkach hetaj madeli Biełarusi adviedziena rola vasała Pucina — biadniejšaha, choć i industryjalnaha dadatku da syravinnaj, adstałaj Rasii.
Ciapier čytajuć
Na kanviercie Cichanoŭskaj napisana «Miedviediu O.V.» Što heta za čałaviek?4
Na kanviercie Cichanoŭskaj napisana «Miedviediu O.V.» Što heta za čałaviek?
Chrysta Hrozieŭ: ad ramantyka-radyjoamatara da čałavieka, jaki vykryŭ samyja zmročnyja tajamnicy HRU i FSB. Jak jaho vierbavała śpiecsłužba Luksiemburha i jak jon vymušany chavacca ciapier
Kamientary