Zatrymany inviestar, jaki prasiŭ 5 miljonaŭ dalaraŭ dla Administracyi prezidenta

Infarmacyi ab hetym niečuvanym skandale pakul mała, ale sumy, jakija tam užo fihurujuć, uražvajuć. Havorka idzie ab prodažy 279 ha ziamli kala vioski Łaparavičy Minskaha rajona, raźmieščanaj uzdoŭž Minskaha mora.

Temu padniało Hałoŭnaje ŭpraŭleńnie pa baraćbie z ekanamičnymi złačynstvami (HUBEZ) MUS i Hienieralnaja prakuratura. Havorka idzie pra niejkaha zahadkavaha inviestara, jaki vielmi lohka pry dapamozie Minabłvykankama i Administracyi prezidenta atrymaŭ u svajo rasparadžeńnie 279 ha ziamli kala Minskaha mora.

U śniežni 2009 hoda rašeńniem Minskaha harvykankama było zarehistravana sumiesnaje TAA "OKSIESinviest", jakoje ŭsiaho praz try miesiacy, u lutym 2010 hoda, rašeńniem Minskaha abłasnoha vykanaŭčaha kamiteta atrymała ŭ svajo rasparadžeńnie ahułam 279 ha ziamli dla realizacyi prajekta «Budaŭnictva i ŭvod u ekspłuatacyju pasiołka małapaviarchovaj žyłoj zabudovy z abjektami inžyniernaha absłuhoŭvańnia, kamunikacyjami i abjektami sackultbytu pablizu vioski Łaparavičy».

Prajektam było praduhledžana stvareńnie adzinaj sistemy inžyniernych sietak, unutrykvartalnych daroh, zon adpačynku, abjektaŭ sackultbytu (škoły, dziciačych sadoŭ-jaślaŭ, budaŭnictva hipiermarkieta, aŭtazapravačnaj stancyi, palikliniki, spartyŭnych zbudavańniaŭ, aŭtanomnaj stancyi ačystki ściokavych vod i budaŭnictva artezijanskich śvidravin z kamplektam abstalavańnia pa vodapadrychtoŭcy) i h.d. Ahulny abjom inviestycyj składaŭ kala 430 miljonaŭ jeŭra, pry hetym sam inviestar pavinien byŭ ŭkłaści usiaho kala 7 miljonaŭ dołaraŭ. Usio astatniaje pavinny byli ŭkłaści dolščyki, jakija vykazali b žadańnie žyć u elitnym pasiołku, dy inšyja inviestary, jakija zachacieli b budavać tam hipiermarkiet, AZS, spartyŭnyja zbudavańni.

Praŭda, paśla vydzialeńnia ziamli i zaćviardžeńnia Ministerstvam ekanomiki inviestycyjnaj damovy, ab realizacyi prajekta dva z pałovaj hoda naohuł ničoha nie było čuvać. Da apošniaha času. Na dniach HUBEZ MUS spyniła sprobu handlu toj samaj elitnaj ziamloj, jakaja była vydzielena pad realizacyju inviestrojekta.

Pavodle papiarednich źviestak, dyrektar inviestycyjnaj kampanii STAA «OKSIESinviest», jakaja i pavinna była realizoŭvać prajekt, padbuchtorvaŭ dyrektara inšaj zamiežnaj pryvatnaj kampanii da dačy chabaru słužbovym asobam Administracyi prezidenta i Minabłvykankama «za spryjalnaje rašeńnie pytańnia ab nabyćci va ŭłasnaść u dziaržavy działki ahulnaj płoščaj 279 ha, pradastaŭlenaj STAA «OKSIESinviest» raniej u ramkach inviestycyjnaj damovy». Pryčym suma chabaru ŭražvaje i bje ŭsie rekordy ŭ Biełarusi.

Pavodle apieratyŭnych źviestak, padazravany patrabavaŭ 5 miljonaŭ dalaraŭ i 17 učastkaŭ ziamli (heta jašče kala 500 tysiač dalaraŭ), u tym samym elitnym pasiołku.

Dla paraŭnańnia, na rynku sotka ziamli ŭ Łaparavičach kaštuje kala 3 tysiač dalaraŭ, tak što ahulny košt ździełki (279 ha) skłaŭ bolš za 8 miljonaŭ dołaraŭ. Inšymi słovami, čysty prybytak ad ździełki z ulikam usich vydatkaŭ na chabary atrymlivaŭsia ŭ rajonie 2,5 miljona dalaraŭ.

Pa fakcie padbuchtorvańnia da dačy chabaru ŭ dačynieńni da dyrektara STAA «OKSIESinviest» raspačataja kryminalnaja sprava pa č.5 art.16, 431 i č. 2 Kryminalnaha kodeksa Biełarusi.

Ź infarmacyi, źlitaj z MUS, niajasnymi zastajucca šmat pytańniaŭ. Jakim čynam zusim novaja na rynku kampanija atrymała ŭ svajo rasparadžeńnie hetak prynadny kavałak ziamli? Čamu inviestprajekt tak i nie byŭ realizavany i jakim čynam jon staŭ pradmietam karupcyjnaha handlu? I, samaje hałoŭnaje, jakuju realnuju rolu va ŭsim hetym adyhrali čynoŭniki Administracyi prezidenta i Minabłvykankama? Bo całkam vidavočna, što vyrašyć pytańnie z takim vielizarnym učastkam ziamli, u takim prestyžnym miescy, dy jašče kali jon vyłučany pad realizacyju inviestprajekta, biez udziełu vielmi i vielmi ŭpłyvovych čynoŭnikaŭ nie prosta składana, a niemahčyma.

• 0
• 0
• 0
• 0
• 0
• 0
• 0
• 0