Śpiecdakładčykam AAN pa Biełarusi pryznačany Mikłaš Charašci

Mikłaš Charašci pryznačany śpiecyjalnym dakładčykam pa situacyi ŭ Biełarusi Savieta AAN pa pravach čałavieka. Adpaviednaje rašeńnie było pryniata 28 vieraśnia ŭ Ženievie na 21-j siesii SPČ.

Suprać pryznačeńnia vystupili niekalki krain, u pryvatnaści Rasija i Kuba. Pradstaŭnik Rasii nahadaŭ, što rasijskaja delehacyja jašče na 20-j siesii SPČ u červieni hetaha hoda hałasavała suprać pryniaćcia rezalucyi pa Biełarusi, jakaja praduhledžvała ŭviadzieńnie mandata śpiecdakładčyka. «Ličym jaje praduziataj i kontrpraduktyŭnaj, nakiravanaj na izalacyju Biełarusi, a nie ŭciahvańnie jaje ŭ dyjałoh, — zajaviŭ pradstaŭnik rasijskaj delehacyi. — Z ulikam vykładzienaha my nie padtrymlivajem nivodnaha z kandydataŭ na pasadu śpiecyjalnaha dakładčyka pa stanoviščy ŭ halinie pravoŭ čałavieka ŭ Biełarusi».

Pradstaŭnik Kuby raskrytykavaŭ staršyniu SPČ Łoru Dziupiui Łasier za toje, što adnoj z pryčyn taho, čamu jana spyniła svoj vybar na kandydatury Charašci, stała jaho viedańnie ruskaj movy. Jon taksama padkreśliŭ, što Kuba z samaha pačatku nie padtrymlivała ideju pryznačeńnia śpiecdakładčyka pa Biełarusi.

Łasier u adkaz nahadała pradstaŭniku Kuby, što vybar kandydatury źjaŭlajecca prerahatyvaj staršyni savieta, i jana da hetaha vybaru padyšła z usioj abjektyŭnaściu.

Jak paviedamlałasia, akramia Charašci (Vienhryja), jaki zajmaŭ pasadu pradstaŭnika ABSIE pa svabodzie ŚMI, kansultacyjnaja hrupa rekamiendavała ŭ jakaści kandydataŭ na pasadu śpiecdakładčyka pa Biełarusi byłoha sudździu Strasburhskaha suda Chane-Sovi Hrevie (Narviehija) i jurysta Džareda Hiensiera (ZŠA).

Niahledziačy na toje, što ŭ śpisie pretendentaŭ kansultacyjnaja hrupa na pieršaje miesca pastaviła Hrevie jak pryjarytetnaha kandydata, Łasier spyniła svoj vybar mienavita na Charašci.

Jak patłumačyła ekśpiert u halinie mižnarodnych pravavych miechanizmaŭ Iryna Dziešyvicyna, zhodna z praceduraj pryznačeńnia śpiecdakładčyka kansultacyjnaja hrupa pradstaŭlaje kiraŭniku Savieta pa pravach čałavieka śpis kandydatur na hetuju pasadu. Zatym staršynia savieta pravodzić šyrokija kansultacyi, u tym liku z pradstaŭnikami pastajannych pradstaŭnictvaŭ roznych krain i pravaabaroncami.

Mikłaš Charašci ŭznačalvaŭ misii Arhanizacyi pa biaśpiecy i supracoŭnictvie ŭ Jeŭropie pa nazirańni za vybarami ŭ roznych krainach. Jon taksama zajmaŭ pasadu pradstaŭnika ABSIE pa svabodzie ŚMI, maje vopyt pracy z pravami čałavieka i hramadzianskaj supolnaściu.

Mandaty śpiecdakładčykaŭ AAN pa Biełarusi i Kubie byli skasavanyja Savietam AAN pa pravach čałavieka letam 2007 hoda. Heta adbyłosia ŭ vyniku palityčnaha cisku dziela zachavańnia prava pryznačać dakładčykaŭ pa asobnych krainach i praciahu pracy inšych krainavych dakładčykaŭ. Na skasavańni mandata nastojvali biełaruskija ŭłady, abvinavačvajučy śpiecdakładčyka Adryjana Sieviaryna (Rumynija) u palityčnaj anhažyravanaści i skažonym infarmavańni AAN ab situacyi ŭ krainie.

U lipieni 2012 hoda Saviet AAN pa pravach čałavieka vyrašyŭ znoŭ uvieści mandat śpiecdakładčyka pa Biełarusi, matyvujučy heta šmatlikimi faktami parušeńnia pravoŭ čałavieka. U adkaz aficyjny Minsk zajaviŭ, što nie pryznaje mandat śpiecdakładčyka i nie budzie ź im uzajemadziejničać.

• 0
• 0
• 0
• 0
• 0
• 0
• 0
• 0